ဓာတ်ဆီဆိုင် ဆောက်လုပ်နေမှု ဖျက်သိမ်းရန် ဆန္ဒဖော်ထုတ်

ဖေဖော်ဝါရီလ ၂၆၊ ၂၀၁၄
M-Media
လမင်း

ရန်ကုန်။ ။ အင်းစိန် မြို့နယ် ရွှေပြည်သာ တံတားလမ်းမကြီးဘေး တညင်းကုန်းဘူတာ အမှတ် ၄/၅ နယ်မြေတွင် ဓာတ်ဆီဆိုင်ဖွင့်ရန် အတွက် ပြုလုပ်နေမှုကို ရွှေပြည်သာ မြို့နယ်နေ ပြည်သူပြည်သားများမှ ဖေဖော်ဝါရီလ ၂၄ ရက်နေ့တွင် ဆန္ဒဖော်ထုတ်ခဲ့ကြသည်။

‘အန်တီတို့ကတော့ အခုလိုလူနေအိမ်တွေ ကြားထဲမှာ ဆီဆိုင်ဆောက်မှာကို လုံးဝကိုခွင့်မပြုနိုင်ဘူး။ အခုလည်း အန်နီက ဦးဆောင်ပြီး ဆန္ဒဖော်ထုတ်နေတာပါ။ အရမ်းကိုပြည်သူတွေ အတွက် အန္တရယ်ရှိပါတယ် အိမ်တွေက ကပ်နေကြတာလေ။ အန်တီတို့ ကတော့ ရပ်ဆိုင်းတာကို မလိုချင်ဘူး အပြီးဖျက်သိမ်းပေးတာကိုပဲ လိုချင်တာပါ’ဟု ဦးဆောင် ဆန္ဒပြသသူ ဒေါ်မျိုးမျိုးအေးကပြောကြားခဲ့သည်။

ဆောက်လုပ်နေသည့် ဓာတ်ဆီဆိုင်နှင့်အနီးတွင် မဟာ ဂတ်စ်ပိုက်လိုင်း၊ ဂတ်စ် ဆိုင်တစ်ဆိုင်နှင့် အိမ်ခြေများ များပြားလွန်းသောကြောင့် ဆီဆိုင်ဆောက်လုပ်မှုကို တားမြစ်ခဲ့ကြကြောင်း သိရပါသည်။ ဆန္ဒဖော်ထုတ်သူများသည် တရားဝင်ခွင့်ပြုမိန့်ဖြင့် ‘ဓာတ်ဆီဆိုင်ဆောက်လုပ်မှု ချက်ချင်းရပ်’၊ ‘ပြည်သူ့ဆန္ဒကို လေးစားပါ’ စသည့်ပိုစတာများကို ကိုင်ဆောင်ပြီး လူဦးရေ ၁၀၀ ကျော်မှ ဆန္ဒဖော်ထုတ်ရာတွင် ပါဝင်ခဲ့ကြသည်။