မူဝါဒချမှတ်ရန် မြို့နယ် ပေါင်းစုံမှ ၈၈ မျိုးဆက် (ပွင့်/လင်း) ကွန်ရက်များ ၂ ရက်ကြာ တွေ့ဆုံဆွေးနွေးမည်။

ဖေဖော်ဝါရီ ၂၈၊ ၂၀၁၄
M-Media
လမင်း

ရန်ကုန်။       ။ ၈၈ မျိုးဆက် (ငြိမ်းချမ်းရေးနှင့် ပွင့်လင်းလူ့အဖွဲ့အစည်း) ဟာ ဆိုင်းဘုတ်တစ်ခု အဖွဲ့အစည်းတစ်ခု မဟုတ်ပါဘူးလို့ ၈၈ မျိုးဆက် (ငြိမ်းချမ်းရေးနှင့် ပွင့်လင်းလူ့အဖွဲ့အစည်း) နိုင်ငံတဝှမ်းမှာ ရှိတဲ့ ကွန်ရက်တွေ အားလုံးတွေ့ဆုံဆွေးနွေးပွဲတွင် ၈၈ မျိုးဆက် (ငြိမ်း/ပွင့်) ခေါင်းဆောင် ကိုမင်းကိုနိုင်ကပြောကြားခဲ့ပါသည်။

“ကျွန်တော်တို့ ၈၈ အဖွဲ့ဟာ ဆိုင်းဘုတ်တစ်ခု အဖွဲ့အစည်းတစ်ခု မဟုတ်ပါဘူး။ အဲဒီအဖွဲ့ရှိတဲ့မြို့ဟာ ငြိမ်းငြိမ်းချမ်းချမ်းရှိပြီး ပွင့်ပွင့်လင်းလင်းဖြစ်စေချင်တဲ့ သဘောပါ။ ကျွန်တော်တို့အဖွဲ့က တစ်ဦးတစ်ယောက်က ထောက်ပံ့ထားတဲ့ အဖွဲ့မျိုးလည်း မဟုတ်ပါဘူး” ဟု ၎င်းကဆက်လက် ပြောကြားခဲ့ပါသည်။

၈၈ မျိုးဆက် (ငြိမ်းချမ်းရေးနှင့် ပွင့်လင်းလူ့အဖွဲ့အစည်း) သည်မြန်မာနိုင်ငံ အနှံ့အပြားတွင်ရှိသည့် မြို့နယ်ရုံးများကိုခေါ်ယူတွေ့ဆုံပြီး မူဝါဒချမှတ်ရန်၊ ရှေ့ဆက်လုပ်ဆောင်သွားမည့် လုပ်ငန်းစဉ်များအကြောင်းများနှင့်ပတ်သက်ပြီး ဆွေးနွေးပွဲတစ်ရပ်ကိုပြုလုပ်ခဲ့ပါသည်။

မြို့နယ်ဆက်ဆံရေးရုံးများနှင့် တွေ့ဆုံဆွေးနွေးပွဲကို ဖေဖော်ဝါရီလ ၂၈ ရက်နှင့် မတ်လ ၁ ရက်နေ့တို့တွင် နှစ်ရက်တိုင်တိုင် ကျင်းပသွားမည်ဖြစ်ပါသည်။ မြို့နယ်ပေါင်း ၁၀၀ ကျော်မှ ကိုယ်စားလှယ်များ ၂၀၀ ကျော်တက်ရောက်ပြီး ရရှိသောဆွေးနွေးချက်များကို စုစည်းတင်ပြသွားမည်ဖြစ်ပြီး စည်းမျဉ်း စည်းကမ်းများကို ထုတ်ပြန်သွားမည်ဖြစ်ကြောင်းသိရပါသည်။