ဆရာတော် ဦးရက္ခ၀ံသ မှ လက်ကျန် နိုင်ငံရေး အကျဉ်းသားများ လွတ်မြောက်ရေး တောင်ကြီးမှ ရန်ကုန်ထိ ဆွမ်းဘုန်းမပေးဘဲ လမ်းလျောက် ဆန္ဒထုတ်ဖော်မည်

မတ် ၃၊ ၂၀၁၄
M-Media
လမင်း

ရန်ကုန်။       ။ နိုင်ငံရေးအကျဉ်းသားများလွတ်မြောက်မှုအတွက် ဆရာတော် ဦးရက္ခ၀ံသမှ စတုတ္တအကြိမ်မြောက်အဖြစ်  အစာငတ်ခံ၍  တောင်ကြီးမြို့ ပင်လုံကျောက်တိုင်မှစ၍ ရန်ကုန်မြို့ မြို့တော်ခန်းမ ရှေ့ထိ ဆုတောင်း မေတ္တာပို့သသွားမည်ဟု မြန်မာဂျာနယ်လစ်ရုံးခန်းတွင် ပြုလုပ်သော သတင်းစာရှင်းလင်းပွဲတွင် ပြောကြားခဲ့သည်။

“ဦးဇင်း တို့ရဲဘော်တွေက အကျဉ်းထောင်ထဲမှာရှိနေတုန်းပါပဲ။ ငြိမ်းချမ်းရေးကို တကယ်လိုလားတယ်ဆိုရင် နိုင်ငံရေး အကျဉ်းသားတွေ ထောင်ထဲမှာ မထားပါနဲ့ လွှတ်ပေးပါ။ ၂၀၁၃ မှာ နိုင်ငံရေး အကျဉ်းသားတွေ မရှိစေရဘူးလို့ ကမ္ဘာကသိအောင် နိုင်ငံတော် သမ္မတကြီးက ကတိပြုခဲ့တယ်။ ဒါပေမဲ့ ၃၃ ဦးကျန်ရှိနေသေးတယ်။

ဒါကြောင့် ဦးဇင်းက လက်ကျန်နိုင်ငံရေး အကျဉ်းသားတွေ အတွက် ဆက်လက်ဆုတောင်း မေတ္တာပို့သပေးသွားမှာပါ” ဆရာတော် ဦးရက္ခ၀ံသ ကမိန့်ကြားခဲ့သည်။ ဆရာတော်သည် တောင်ကြီးမြို့မှ ရန်ကုန်မြို့ မြို့တော်ခန်းမရှေ့သို့ ယခုတစ်ပတ်အတွင်း စတင် လမ်းလျောက် မေတ္တာပို့သမည်ဖြစ်ပြီး တစ်ရက်လျှင် မိုင် ၂၀ မှ ၂၅ မိုင်ထိ လမ်းလျောက်သွားမည်ဖြစ်ပါသည်။ ဆရာတော်သည် လမ်းလျောက်နေစဉ် ကာလအတွင်း ဆွမ်းဘုန်းပေးခြင်း မရှိဘဲ ရေ၊ အချိုရည် တို့ကိုသာ ဘုန်ပေးသွားမည်ဖြစ်ပါသည်။ လမ်းလျောက်နေစဉ် ကျန်းမာရေးအတွက် လိုအပ်ပါက ဆေးကုသမှုကိုခံယူသွားမည်ဖြစ်သည်။

ဆရာတော်သည် ပထမအကြိမ် အဖြစ် ၃-၈-၂၀၁၃ မှ ၈-၈-၂၀၁၃ ထိအစာငတ်ခံတောင်းဆိုခြင်း၊ ဒုတိယအကြိမ်အဖြစ် ရန်ကုန်မှ မန္တလေးသို့  ၁၁-၈-၂၀၁၃ တွင်ခြေလျင် လမ်းလျောက်တောင်းဆိုပြီး တတိယအကြိမ်အဖြစ် ၁-၁၀-၂၀၁၃ နေ့တွင် မန္တလးမြို့ မဟာမြတ်မုနိဘုရားကြီးမှ ရခိုင်ပြည်နယ် ကျောက်တော်မြို့ရှိ မဟာမြတ်မုနိဘုရားထိ  လမ်းလျောက် အစာငတ်ခံတောင်းဆိုမှု ၈ ရက်မြောက်နေ့တွင် သမ္မတဦးသိန်းစိန်မှ ၅၆ ဦးလွှတ်ပေးခဲ့သောကြောင့် ဆရာတော်မှ တောင်းဆိုမှုကိုရပ်ဆိုင်းခဲ့ပါသည်။

သို့သော်နှစ်ကုန်တွင် နိုင်ငံရေးအကျဉ်းသားများ ရှိနေသေးသောကြောင့် ဆရာတော်သည် မကွေးမြို့မှ ရခိုင်ပြည်နယ်သို့ ဆက်လက်ချီတက်ခဲ့ပါသည်။

ယခုတွင်လည်း ကျန်ရှိနေသေးသော နိုင်ငံရေးအကျဉ်းသား ၃၃ ဦးတို့အတွက် စတုတ္တအကြိမ်မြောက် ဆရာတော်မှ ဆွမ်းဘုန်းမပေး လမ်းလျောက်ဆန္ဒထုတ်ဖော် သွားမည်ဟုသိရပါသည်။