ဗလီဝတ်ကျောင်းတော်၏ အရေးပါမှု ကဏ္ဍမြှင့်တင်ရန် အမေရိကန်မှ မွတ်စလင်မ် ရှေ့ဆောင်ဆရာ ကြိုးပမ်း

ကိုင်ရို။ ဟူစတန်ရှိ အစ္စလာမ့်စင်တာတစ်ခုမှ ဗလီဝတ်ကျောင်းတော်များ၏ အရေးပါမှုကို ဆော်အော်ခြင်းဖြင့် အီမာမ်(ရှေ့ဆောင်ဆရာတော်)များ မေ့လျော့နေသော ရည်ရွယ်ချက်များကို ပြန်လည်အသက်သွင်းလိုက်သည်။ ၀တ်ပြုရန်လာသူတို့အား အချိန်ကို တန်ဖိုးထားလေးစားရန်၊ ကျန်းမာရေးသတိရှိရန်နှင့် စီးပွားရေးလုပ်ဆာင်မှု စသည်တို့နှင့်ဆိုင်သော တရားဒေသနာတော်များဟောကြားရန်ဖြစ်သည်။

“ဗလီဝတ်ကျောင်းတော်တွေရဲ့ အဆင့်အတန်းကို ကျွန်တော်တို့အမြဲတမ်း မေ့လျော့နေပါတယ်။ တမန်တော်မြတ် မုဟမ္မဒ်သခင်(ဆွ) လက်ထက်ကဆိုရင် ဗလီဝတ်ကျောင်းတော်တွေဟာ ၀တ်ပြုရာနေရာသက်သက်ထက်ကို ပိုပါတယ်။” ဟု ဟူစတန် Third Ward ရှိ အီဗရာဟင် အစ္စလာမ့်စင်တာ (Ibrahim Islamic Center) ၏ ရှေ့ဆောင်ဆရာတော်  ခါလစ်ရရှတ်ဒ် (Khalis Rashaad) က Houston Chronicle (တက္ကဆက်ပြည်နယ်တွင် ထုတ်ဝေသောသတင်းစာ) သို့ ပြောကြားသည်။

အဆိုပါစင်တာသည် အယ်မေဒါလမ်းမရှိ ရှော့ပင်းမောတခုတွင် တည်ရှိပြီး စင်တာ၏ဖေ့စ်ဘွက်မန်ဘာများ စုပေါင်းထည့်ဝင်လှူဒါန်းငွေဖြင့် ရပ်တည်နေခြင်းဖြစ်သည်။အခြားဗလီဝတ်ကျောင်းတော်များကဲ့သို့ မျက်နှာကျက်တွင် အလှဆင်ထားသော မီးဆိုင်းများ၊ ဗလီဝတ်ကျောင်းတော်များ၏ အမှတ်အသားဖြစ်သော အမိုးခုံး၊ မင်နာရာ(ဗလီမျှော်စင်) စသည်တို့ မပါရှိချေ။သုံးလသာရှိသေးသော ထိုစင်တာ၏ နံရံများတွင်လည်း ကုရ်အာန်ကျမ်းတော်မြတ်၏ ဒေသနာတော်များအား ရေးချယ်ထားသော ကမ္ဗလာသုံးထည်သာ ချိတ်ဆွဲထားသည်။

“ဒေါ်လာသန်းချီတန်တဲ့(ဂုဏ်ရှိတဲ့) ဗလီဝတ်ကျောင်းတော်တစ်ခုဖြစ်ဖို့ပါ။ ဒါပေမယ့် ခပ်လျော်လျော် ပရောဂျက်တွေ၊ အတွေးအမြင် အယူအဆတွေ ရှိနေမယ်ဆိုရင်တော့ ကျွန်တော်တို့ရဲ့ရည်ရွယ်ချက် ဆုံးရှုံးတာပါပဲ။” ဟု အသက် ၃၉ နှစ်အရွယ်ရှိ ထို ဗလီဝတ်ကျောင်းတော်၏ ရှေ့ဆောင်ဆရာတော်တစ်ပါးက ပြောကြားသည်။

ထိုမြို့အတွင်းရှိ ဗလီဝတ်ကျောင်းတော်များ၏ အဓိကလုပ်ဆောင်ချက်များမှာ တနေ့ ဆွလာသ် ငါးကြိမ်ဝတ်ပြုခြင်း၊ သောကြာနေ့ဝတ်ပြုခြင်းနှင့် ဘာသာရေးသင်တန်းများ သင်ကြားပို့ချခြင်းတို့သာ ဖြစ်ပြီး အီဗရာဟင် အစ္စလာမ့်စင်တာမှာ တမူထူးခြားသည်။Community center တခုကဲ့သို့ဖြစ်ပြီး စင်တာကို စီမံခန့်ခွဲသူများက မြို့၏ ကျင်ဆင်းနေသော စီးပွားရေးကဏ္ဍကို မြှင့်တင်နိုင်သော အစီအစဉ်များစွာကို အကောင်အထည်ဖေါ်ရန် လုပ်ဆောင်လျက်ရှိသည်။

အစားအသောက်များ ဖြန့်ဖြူးခြင်း၊ တရားဝင် အလုပ်အကိုင်ရရှိအောင် ဆောင်ရွက်ပေးခြင်း၊ အကျဉ်းသားများပြန်လည်ထူထောင်ရေးလုပ်ငန်းများ လုပ်ဆောင်ခြင်း၊ မူးရစ်ဆေးဝါးနှင့် အရက်စွဲနေသူများအား အဟာရထိန်းညှိပေးခြင်းနှင့် လေ့ကျင်ခန်းများလုပ်ဆောင်စေခြင်း စသည့် လမ်းညွှန်မှုများ လုပ်ဆောင်ခြင်း၊ အခမဲ့ဆေးကုသမှုအစီအစဉ်များ ဆောင်ရွက်ခြင်းနှင့် စီပွားစီမံပညာနှင့် ငွေးကြေးစီမံခန့်ခွဲမှုသင်တန်းများပေးခြင်း စသည်တို့ဖြစ်သည်။

“ကျွန်တော်တို့ရဲ့အစီအစဉ်ကတော့ အဖွဲ့အစည်းတော်တော်များများ မလုပ်ကြတဲ့ ဒီလို ပရောဂျက်တွေကို တကယ်လိုအပ်နေတဲ့နေရာတွေမှာ လုပ်ဆောင်ပေးဖို့ပါပဲ။ ဗလီဆိုတာ အဆောက်အဦး တစ်ခုသက်သက်မဖြစ်ရပါဘူး။ ကျွန်တော်တို့ ပတ်ဝန်းကျင်ကို ထွက်ကြည့်ရမယ်။ ပြီးတော့ သူတို့ အခြေအနေအတွေအလိုက် အရေးတကြီးလိုအပ်နေတာတွေကို ဖြည့်ဆည်းပေးရပါမယ်။ ” ဟု ရရှတ်ဒ် က ဆိုသည်။

သူက တမန်တော်မြတ် မုဟမ္မဒ်သခင်(ဆွ) အချိန်ကာလတွင်ရှိခဲ့သော ဗလီဝတ်ကျောင်းတော်များ၏ ပုံစံအတိုင်း ပြန်လည်ဆန်းသစ်ရန် မျှော်လင့်ထားသည်။ တမန်တော်မြတ်လက်ထက်တွင် မွတ်စလင်နှင့် မွတ်စလင်မဟုတ်သူများပါ ဗလီဝတ်ကျောင်းတော်များသို့ လာရောက်ကြကာ စီပွားရေးနှင့် ပက်သက်သည့် အကြံဉာဏ်များရယူခြင်း၊ လူမှုရေးဆိုင်ရာကိစ္စရပ်များအား ဆွေးနွေးအဖြေရှာခြင်း၊ ထိုဗလီဝတ်ကျောင်းတော်များမှ ကူညီထောက်ပံမှုများအား လက်ခံခြင်းများ ရှိခဲ့ကြသည်။

ပတ်ဝန်းကျင်အား ကူညီထောက်ပံ့ခြင်း။

ဗလီဝတ်ကျောင်းတော်၏ ရှေ့ဆောင်ဆရာတော်အဖြစ် အခမဲ့ တာဝန်ထမ်းဆောင်ခြင်းဖြင့် ရရှတ်ဒ်က ပတ်ဝန်းကျင်အား ပြန်လည်ပေးဆပ်ရန် မျှော်လင့်ထားသည်။

“ဒါဟာ ကျွန်တော်အများကြီး(အကူအညီ) ရယူခဲ့တဲ့ ပတ်ဝန်းကျင်အတွက် ပြန်လည်ပေးဆပ်မှုတစိတ်တပိုင်းပါပဲ။” ဟု သူက ဆိုသည်။ ရရှတ်ဒ်သည် Third Ward တောင်ပိုင်းရှိ ခရစ်ယာန်ဘာသာဝင် အဘိုး၊ အဘွားတို့၏ နေအိမ်တွင် မွေးဖွားကြီးပြင်းခဲ့ပြီး ဆယ်ကျော်သက်ကာလများတွင် မူးယစ်ဆေးစွဲခဲ့ကာ ရာဇ၀တ်မှုများနှင့်လည်း ငြိစွန်းခဲ့သည်။ အထက်တန်းကျောင်းမှထွက်ပြီး၊ အိမ်မှထွက်ပြေးခဲ့သည်။

ထိုသို့ အဆိုးဆုံးအခြေအနေ ကြုံတွေ့နေရချိန်တွင် ထိုဒေသရှိ မွတ်စလင်များက သူ၏ဘ၀အား ပြန်လည်တည့်မတ်လာစေရန် အတူတကွကူညီဖေးမခဲ့ကြသည်။ထို့နောက် သူသည် ကျောင်းပြန်တက်ခဲ့ပြီး၊ အစ္စလာမ်သာသနာကိုလည်း သက်ဝင်ယုံကြည်လာခဲ့သည်။ နောက်ပိုင်းတွင် စာရင်းအင်းနှင့် စီးပွားစီမံပညာ အဓိကဖြင့်ဘွဲ့ရခဲ့ပြီး စီးပွားရေးစီမံခန့်ခွဲမှုဖြင့် မဟာဘွဲ့ရခဲ့လေသည်။

ယခုအခါ စာရင်းကိုင်အဖြစ် လုပ်ကိုင်နေပြီး၊ ရှေ့ဆောင်ဆရာတော်အဖြစ် တာဝန်ထမ်းဆောင်ကာ မိသားစုနှင့်အတူ ပျော်ရွှင်စွာနေထိုင်လျက်ရှိသည်။သားသမီးနှစ်ယောက်၏ ဖခင်ဖြစ်သော အီမာမ်ရရှတ်ဒ်သည် ဗလီဝတ်ကျောင်းတော်များတွင် ခေါင်းဆောင်အဖြစ် ဆောင်ရွက်နေသော အမေရိကန်မွတ်စလင်များထဲမှ တစ်ဦးဖြစ်လေသည်။

သုံးနှစ်တာသင်ယူရသော အီမာမ်လေ့ကျင့်သင်ကြားရေးသင်တန်း(imam training course) ကိုလည်း ယမန်နှစ်က ပြီးဆုံးအောင်မြင်ခဲ့လေသည်။ ထိုသင်တန်းကို ပါဆိုမြို့ (El Paso-တက္ကဆက်ပြည်နည် အနောက်ပိုင်းရှိမြို့) ဘွား မွတ်စလင် အီမာမ် ၀ါဇီအလီ (Wazir Ali) က ဖွင့်လှစ်သင်ကြားခြင်းဖြစ်ပြီး သူသည်ဟူစတန်တောင်ပိုင်းရှိ ဗလီဝတ်ကျောင်းတော်တစ်ခုကို ဦးဆောင်နေသူလည်းဖြစ်သည်။

“ကျွန်တော်ရဲ့ရည်ရွယ်ချက်ကတော့ အစ္စလာမ်ရဲ့ စစ်မှန်တဲ့ အနှစ်သာရနဲ့၊ အစ္စလာမ့်ရဲ့တန်ဖိုးကို နားလည်တဲ့ မွတ်စလင်ခေါင်းဆောင်တွေကို မွေးထုတ်ပေးဖို့ပါပဲ။ နောက်ပြီး လူ့ဘ၀ရဲ့ အခြေခံအကျဆုံးလိုအပ်ချက်ဖြစ်တဲ့ ဖွံ့ဖြိုးတိုးတက်မှုကို အားပေးမြှင့်တင်ပေးဖို့လည်းဖြစ်ပါတယ်။” ဟု အလီက ဆိုသည်။

အီဗရာဟင် အစ္စလာမ့်စင်တာ၏ ပထမဆုံး ပရောဂျက်ဖြစ်သော “ရောင်းရင်းများအား ကူညီမှု အစီအစဉ်”ကို လာမည့် ဇွန်လတွင် စတင်ရန် စီစဉ်ထားရှိလေသည်။အိမ်နီးချင်းများအား လက်လှမ်းကူညီမှုအဖြစ် စင်တာအဖွဲ့ဝင်များက နေရာများသတ်မှတ်ကာ Third Ward ပတ်ဝန်းကျင်ရှိ လူများအား အခမဲ့ ကျန်းမာရေးစစ်ဆေးပေးခြင်း၊ အရက်နှင့်မူးယစ်ဆေးစွဲနေသူများနှင့် ဆွေးနွေးခြင်း၊ အစားအသောက်ဆိုင်ရာ အကြံဉာဏ်များပေးခြင်း၊ လတ်ဆတ်သော သစ်သီးဝလံများဝေငှခြင်းများကို ဆောင်ရွက်မည်ဖြစ်သည်။

“တခြားဘာသာတရားတွေရဲ့ အဖွဲ့အစည်းတွေက အကူအညီပေးနေတာတွေကို ကျွန်တော်တို့က ဘေးကနေထိုင်ပြီး ကြည့်နေရတာမျိုး မလိုချင်တော့ပါဘူး။” ဟု ရရှတ်ဒ်က ပြောကြားခဲ့လေသည်။

မူရင်းကိုးကားသတင်း >> Click here

ဘာသာပြန်>> ဝေဇင်