ခရိုင်းမီယား လွတ်လပ်ရေး ကြေညာခြင်း တရားဝင်သည်ဟု ရုရှာပြော

မတ် ၁၂၊ ၂၀၁၄
M-Media

– ခရိုင်းမီယား ပါလီမန်မှ ရုရှားထောက်ခံသူများက ဆုံးဖြတ်သော ခရိုင်းမီယားဒေသ လွတ်လပ်ရေး ကြေညာချက်မှာ တရား ဥပဒေနှင့် ညီညွတ်သည်ဟု ရုရှားနိုင်ငံခြားရေး ၀န်ကြီးဌာနက ပြောကြားလိုက်သည်။

ယူကရိန်း၏ ရုရှားထောက်ခံသော သမ္မတ ယာနူကိုဗစ်ခ်ျ ပြုတ်ကျသွားပြီးနောက် ခရိုင်းမီးယားဒေသတွင် နိုင်ငံရေး မတည်ငြိမ်မှုများဖြစ်ပေါ်လာခဲ့သည်။ ထို့နောက် ဒေသအား ရုရှား ပိုင်နက်အတွင်းသို့ သွတ်သွင်းရန်အတွက် ခရိုင်းမီးယားပါလီမန်က ဆုံးဖြတ်ခဲ့ကာ ပြည်သူဆန္ဒခံယူပွဲကို လာမည့် တနင်္ဂနွေနေ့တွင် ပြုလုပ်ရန် စီစဉ်ထားသည်။

ယမန်နေ့နံနက်ပိုင်းတွင် “ကိုယ်ပိုင်အုပ်ချုပ်ခွင့်ရ ခရိုင်းမီးယားဒေသနှင့် စီဗက်စ်စတိုပိုလ် မြို့တော်၏ လွတ်လပ်ရေးကြေညာချက်” ကို ခရိုင်းမီယားပါလီမန်ရှိ ဥပဒေပြုအမတ် ၈၁ ဦးအနက် ၇၈ ဦးက ထောက်ခံခဲ့သည်။ ထိုအကြောင်းအရာနှင့်ပတ်သက်၍ ရုရှားနိုင်ငံခြားရေး ၀န်ကြီးဌာနက ယမန်နေ့တွင် ကြေညာချက်တစ်စောင် ထုတ်ပြန်ခဲ့ပြီး ထိုကြေညာချက်တွင်

“ခရိုင်းမီယားပါလီမန်က ဆုံးဖြတ်ချက်ဟာ ဥပဒေနဲ့ လုံးဝညီညွတ်တယ်လို့ ရုရှားနိုင်ငံခြားရေး ၀န်ကြီးဌာနက မှတ်ယူပါတယ်” ဟု ဖော်ပြထားသည်။

အဆိုပါ လွတ်လပ်ရေးကြေညာချက်အား တရားမ၀င်ဟု ယူကရိန်းအစိုးရသစ်က ပြောကြားခဲ့ပြီး ရုရှားနိုင်ငံသို့ ၀င်ရောက်ရန်အတွက် တမင်ဖန်တီးခြင်းသာဖြစ်သည်ဟုဆိုသည်။ အနောက်နိုင်ငံများလည်း ၁၆ ရက်နေ့တွင်ပြုလုပ်မည့် ပြည်သူ့ဆန္ဒခံယူပွဲအား တရားဝင်အဖြစ် သတ်မှတ်မည်မဟုတ်ဟု ပြောကြားခဲ့သည်။ ထုပ်ပယ်ခံခဲ့ရသည့် ရုရှားထောက်ခံသူသမ္မတဟောင်း ယာနူကိုဗစ်ကမူ ယူကရိန်းအစိုးရသစ်မှာ ပြည်တွင်းစစ်ဖြစ်အောင် ဖန်တီးနေသည်ဟု စွပ်စွဲခဲ့သည်။

ခရိုင်းမီယားဒေသအနေဖြင့် ရုရှားနိုင်ငံအတွင်းသို့ဝင်ရောက်ရန်အတွက် ထိုကဲ့သို့ မဲခွဲခြင်းမှာ ဆိုဗီယက်ယူနီယံ ပြိုကွဲပြီးနောက်ပိုင်း ပထမဆုံးပြုလုပ်ခြင်းလည်းဖြစ်သည်။