သေနတ်ပစ် အားကစားဖြင့် နိုင်ငံဂုဏ်ဆောင်ခဲ့သူ လက်ရွေးစင်ဟောင်း ဦးကျော်အေး ကွယ်လွန်

မတ် ၁၇ ၊ ၂၀၁၄
M-Media

သေနတ်ပစ်အားကစားဖြင့် ဆုတံဆိပ်များစွာ ဆွတ်ခူးနိုင်ခဲ့ပြီး တိုင်းပြည်ဂုဏ်ဆောင်ခဲ့သည့် သေနတ်ပစ် လက်ရွေးစင် အားကစားသမားစင်ဟောင်း  ဦးကျော်အေး(ခ) အဗ္ဗဒုလ်ရဟီမ်း (၇၆ နှစ်) ဟာ ပြီးခဲ့တဲ့ မတ်လ ၁၅ ရက် နံနက် ၇ နာရီ  ၂၈ မိနစ်တွင် ကွယ်လွန်သွားခဲ့ကြောင်း သိရှိရပါတယ်။

ကျွန်းဆွယ် နှင့် အရှေ့တောင်အာရှ အားကစားပြိုင်ပွဲများတွင် တိုင်းပြည်အတွက် ဆုတံဆိပ် များစွာ ဆွတ်ခူး ရယူပေးခဲ့တဲ့ ဦးကျော်အေး(ခ) အဗ္ဗဒုလ်ရဟီမ်း ကို ၁၉၃၉ ၊ ဖေဖော်ဝါရီ ၂၈ တွင် အဘ ဦးကျော် (အခွန်ဝန်) နှင့် အမိ ဒေါ်စောတင်တို့မှာ စစ်တွေမြို့တွင် မွေးဖွားခဲ့ပါတယ်
မိဘများမှာ ကမန်တိုင်းရင်းသား များဖြစ်ကြပါတယ်။ ဦးကျော်အေးဟာ ရန်ကုန်မြို့ စိန်ပေါလ်ကျောင်း (ယခု ဗိုလ်တထောင် ၆) မှာ ၁၀ တန်းအောင်မြင်ခဲ့ပြီး ရန်ကုန်တက္ကသိုလ်မှာ ပညာသင်ကြားခဲ့ပါတယ်။ သေနတ်ပစ်အားကစားအပြင် အာကီဒို(ခေါ်) ဂျပန်ကိုယ်ခံပညာရပ်တွင်(SECOND DAN) ရောက်ရှိခဲ့သည် အထိကျွမ်းကျင် တတ်မြောက်သူ တစ်ဦးဖြစ်ပါသည်။ ဦးကျော်အေး၏ သားသမိးများပြောပြချက်အရ သေနတ်ပစ်အားကစားကို လက်ရွေးစင်အဖြစ် ၁၉၆၂ ခုနှစ်နောက်ပိုင်းမှာ စတင်ကစားခဲ့ပြီး ကျွန်းဆွယ်နှင့် နိုင်ငံတကာ ပြိုင်ပွဲများတွင် လက်ရွေးစင်အဖြစ်အကြိမ်ကြိမ် နိုင်ငံကိုယ်စားပြုပြီး ဝင်ရောက်ယှဉ်ပြိုင်ခဲ့သူဖြစ်ပါတယ်။

၁၉၇၂ ခုနှစ် စင်ကာပူ ကျွန်းဆွယ်ပြိုင်ပွဲ နောက်ပိုင်းတွင် လက်ရွေးစင် အားကစားသမားအဖြစ်မှ အနားယူခဲ့ပါတယ်။ အဲဒိနောက် မြန်မာနိုင်ငံ ဆေးဝါးလုပ်ငန်းစက်ရုံ (BPI) မှာ နည်းပြ အလုပ်ရုံမှူးအဖြစ် တာဝန်ထမ်းဆောင်ခဲ့ပြီး ၁၉၈၉ မှာ ဝန်ထမ်းဘဝမှ အနားယူခဲ့ပါတယ်။

ဦးကျော်အေးဟာ ဝန်ထမ်းဘဝမှ အငြိမ်စားယူပြိးနောက်ပိုင်း မိမိကျွမ်းကျင်ရာ အားကစားဖြင့် နိုင်ငံအကျိုးပြုနိုင်ရန် နိုင်ငံ တကာ သေနတ်ပစ်ဒိုင်လူကြီး သင်တန်းများကို မိမိစရိတ်ဖြင့် တက်ရောက်ခဲ့ပြီး International Shooting Sport Federation (ISSF)   နိုင်ငံတကာ သေနတ်ပစ် ဒိုင်လူကြီးလိုင်စင် ကို ရရှိခဲ့ပါတယ်။ ၂၀၀၆ ခုနှစ် ဒိုဟာ အာရှအားကစားပြိုင်ပွဲမှာ သေနတ်ပစ်ဒိုင်လူကြိးအနေဖြင့် သွားရောက်ထမ်းဆောင်နိုင်ခဲ့ပါတယ်။

လွန်ခဲ့ ၂ နှစ်ခန့်မှ အစာအိမ်ကင်ဆာရောဂါခံစားခဲ့ရပြီး ၂၀၁၃ ခုနှစ်နေပြည်တော်မှာ ကျင်းပခဲ့တဲ့ ၂၇ ကြိမ်မြောက် အရှေ့တောင်အာရှအားကစားပြိုင်ပွဲ မီးရှူတိုင် သယ်ဆောင်မယ့် အစီအစဉ်ကို လွဲချော်ခဲ့ပါတယ်။

လူမြင်ကွင်းမှ ကွယ်ပျောက်နေတဲ့  နိုင်ငံဂုဏ်ဆောင် အားကစားသမားကြိးဟာ အစာအိမ်ကင်ဆာရောဂါဖြင့် ပြီးခဲ့တဲ့ မတ်လ ၁၅ ရက်နေ့မှာ ကွယ်လွန်သွားခဲ့ပါပြီ။

ကမန်လူမျိုး အစ္စလာမ်ဘာသာဝင် တဦးဖြစ်တဲ့ ဦးကျော်အေး ကွယ်လွန်ချိန်မှာ ဇနီးဖြစ်သူနဲ့ သားသမိး ၆ ယောက်ကျန်ရစ်ပြီး ကွယ်လွန်တဲ့နေ့ မွန်းလွဲပိုင်းမှာပဲ မြောက်ဥက္ကလာပမြို့နယ် ရေဝေး စန္နီသုသာန်ဥယျာဉ်တော်မှာ အစ္စလာမ်ဘာသာဝ ထုံးစံဖြင့် မြှုပ်နှံသဂြိင်္ုလ်ခဲ့ကြောင်းသိရှိရပါတယ်။

ဓါတ်ပုံ-Kamar Atarturk ပေးပို့ပါသည်။