အိမ်ကွင်းမှာ အနိုင်ယူပြီး ချန်ပီယံလိဂ် ကွာတား ဖိုင်နယ်တက်သွားခဲ့တဲ့ ချယ်ဆီးနဲ့ ရီးယဲလ်

မတ် ၁၉၊ ၂၀၁၄
M-Media

ချန်ပီယံလိဂ် ၁၆ သင်းအဆင့် ဒုတိယကျော့ပွဲစဉ် ၂ ခုကို  ဒီနေ့မနက်မှာကစားခဲ့ပြီး မော်ရင်ဟိုရဲ့ ချယ်ဆီးနဲ့ အန်ဆယ်လော့တီရဲ့ရီးယဲလ်တို့ နောက်တစ်ဆင့်ကို အခက်အခဲမရှိ တက်ရောက်နိုင်ခဲ့ပါတယ်။

ပထမအကျော့ တူရကီမြေမှာ ၁ ဂိုးစီ သရေနဲ့ ပွဲပြီးခဲ့ပေမယ့် ဒီနေ့ပွဲမှာတော့ အိမ်ရှင်ချယ်ဆီးတို့ သက်တောင့်သက်သာရှိခဲ့ပါတယ်။ အီတူး၊ ကာဟေးလ်၊ ၀ီလီယံ၊ ဟာဇာ့ဒ်တို့နဲ့ လူစုံခဲ့တဲ့ချယ်ဆီး ကစားကွက်အသာနဲ့ ဖိကစားနိုင်ခဲ့ပြီး အနိုင်ဂိုးတွေကိုလည်း ပထမပိုင်းမှာ ရရှိခဲ့တာပါ။ ဂါလာတာစာရေးအသင်းကတော့ ချယ်ဆီးကို အဖက်ဖက်က မယှဉ်နိုင်ခဲ့ဘဲ ချယ်ဆီး ဂန္တ၀င်တိုက်စစ်မှူးဟောင်း ဒရော့ဘာလည်း ဂိုးသွင်းခွင့် ၂ ကြိမ်လောက်သာရရှိခဲ့ပါတယ်။ ချယ်ဆီးအသင်းရဲ့ ဂိုးတွေကိုတော့ ၄ မိနစ်မှာ အီတူးနဲ့ ၄၂ မိနစ်မှာ ကာဟေးလ်တို့က သွင်းယူပေးခဲ့တာပဲဖြစ်ပါတယ်။

ရီးယဲလ်တို့ကလည်း အိမ်ကွင်း ဘာနေဗျူးမှာ ရော်နယ်ဒိုရဲ့ သွင်းဂိုး ၂ ဂိုးနဲ့အတူ နောက်တစ်ဆင့်ကို တက်ရောက်သွားနိုင်ခဲ့ပါတယ်။ ပထမအကျော့မှာ စံချိန်တင် ၆ ဂိုး ၁ ဂိုးနဲ့အနိုင်ရရှိခဲ့တဲ့အတွက် ဒီနေ့ပွဲမှာတော့ ဘေးလ်၊ ဒီမာရီယာတို့ကို အရန်စာရင်းမှာ ထည့်ထားခဲ့ပါတယ်။ ဒါပေမယ့် ၈ မိနစ်မှာပဲ ဂျီစီ ဒဏ်ရာရသွားတဲ့အတွက် ဘေးလ်နဲ့ လူစားထိုးခဲ့ရပါတယ်။ နောက်တစ်ဆင့်တက်ရေး မျှော်လင့်ချက် မရှိသလောက်နည်းနေပေမယ့် ရှော်လ်ကာတို့ အကောင်းဆုံးကစားနိုင်ခဲ့ပြီး ချေပဂိုး ၁ ဂိုးတောင်ပြန်သွင်းနိုင်ခဲ့ပါသေးတယ်။ ရီးယဲလ်အတွက် ဂိုးတွေကိုတော့ ရော်နယ်ဒိုက ၂၁ မိနစ်နဲ့ ၇၃ မိနစ်မှာ တစ်ဂိုးစီနဲ့၊ ၇၅ မိနစ်မှာ မော်ရာတာက ၁ ဂိုး သွင်းယူပေးခဲ့တာပါ။ ဒီဂိုးတွေကြောင့် ရော်နယ်ဒိုဟာ ချန်ပီယံလိဂ်သွင်းဂိုး ၁၃ ဂိုးအထိ ရှိလာခဲ့ပါတယ်။

ဒီနေ့မနက် ချန်ပီယံလိဂ် ရလဒ်များကတော့ အောက်ပါအတိုင်းဖြစ်ပါတယ်။

ချယ်ဆီး ၂-၀ ဂါလာတာစာရေး (နှစ်ကျော့ပေါင်း ၃ ဂိုး ၁ ဂိုးဖြင့် ချယ်ဆီး နောက်တစ်ဆင့်တက်)
ရီးယဲလ် ၃-၁ ရှော်လ်ကာ (နှစ်ကျော့ပေါင်း ၉ ဂိုး ၂ ဂိုးဖြင့် ရီးယဲလ် နောက်တစ်ဆင့်တက်)