ရွေးကောက်ပွဲဝင်ရန် အီဂျစ် စစ်တပ် အကြီးအကဲ အလ်စီစီ ယူနီဖောင်းချွတ်

မတ် ၂၇၊ ၂၀၁၄
M-Media

– ဒီမိုကရေစီနည်းကျ ပထမဆုံးတင်မြှောက်ခဲ့သော သမ္မတ မော်စီအား ဖြုတ်ချခဲ့သည့် အီဂျစ် စစ်တပ် အကြီးအကဲ အဘ်ဒဲလ် ဖာတာ အလ်စီစီမှာ ရှေ့လတွင် ပြုလုပ်မည့် ရွေးကောက်ပွဲ၌ ပါဝင်ယှဉ်ပြိုင်ခွင့်ရရန် ရာထူးမှ နှုတ်ထွက်ခဲ့သည်ဟု သိရသည်။

စစ်ယူဖောင်း အပြည့်အစုံ ၀တ်ထားကာ နိုင်ငံအား ယမန်နေ့က မိန့်ခွန်းပြောကြားခဲ့သည့် စီစီက ၎င်းအနေဖြင့် စစ်ဝတ်စုံဝတ်ခြင်းမှာ နောက်ဆုံးဖြစ်ပြီး နိုင်ငံအားကာကွယ်ရန် ယူနီဖောင်း ချွတ်တော့မည်ဖြစ်ပြီး၊ ရွေးကောက်ပွဲတွင် လွယ်လွယ်ကူကူအနိုင်ရရန် မျှော်လင့်ကြောင်း ပြောကြားခဲ့သည်။

“နိုင်ငံရဲ့အကျိုးအတွက် ကျွန်တော့်ဘ၀တစ်ခုလုံးကို စစ်တပ်မှာကုန်ဆုံးခဲ့ပါတယ်။ အီဂျစ်နိုင်ငံရဲ့ သမ္မတနေရာမှာ ယှဉ်ပြိုင်ဖို့ ဆန္ဒရှိတယ်ဆိုတာကို ကျွန်တော်ပြောပါမယ်။ ပြီးတော့ ခင်ဗျားတို့ဆီကထောက်ပံ့မှုဟာ ကျွန်တော့်ကို ဒီလိုအခွင့်အရေး ပေးပါလိ့မ်မယ်” ဟု ပြောကြားခဲ့သည်။

ထို့ပြင် အီဂျစ်နိုင်ငံအား အကြမ်းဖက်များက ခြိမ်းခြောက်နေပြီး၊ တိုင်းပြည်၏ ဂုဏ်သိက္ခာ ပြန်လည်ရရှိရေးကိုလည်း ထည့်သွင်းပြောကြားခဲ့သည်။ အသက် ၅၉ နှစ်အရွယ်ရှိ စီစီမှာ လာမည့်လတွင်ပြုလုပ်မည့် ရွေးကောက်ပွဲတွင် အနိုင်ရရှိမည်ဟု အများစုက မျှော်မှန်းထားကြသည်။ စီစီ သမ္မတဖြစ်လာပါက ၁၉၅၂ ခုနှစ်မှစတင်ကာ စစ်တပ်က  ကျောထောက်နောက် ခံပြုထားသည့် သမ္မတ နိုင်ငံအား အုပ်ချုပ်သည့် စနစ်မှာ အီဂျစ်တွင် ပြန်လည် ထွန်းကားလာဖွယ်ရှိနေသည်။

တိုင်းပြည်၏ ပထမဆုံး ဒီမိုကရေစီနည်းကျ ရွေးကောက်တင်မြှောက်ခဲ့သည့် သမ္မတ မိုဟာမက်မော်စီအား ဖြုတ်ချခဲ့ပြီးနောက် စီစီမှာ နိုင်ငံတွင်  သြဇာရှိသောသူ တစ်ဦးဖြစ်လာခဲ့သည်။ ထို့နောက် မော်စီ၏ မွတ်စလင်ညီနောင်များအဖွဲ့ဝင်များကို ဖမ်းဆီးထိန်းသိမ်းခဲ့ပြီး ထိုအဖွဲ့ကိုလည်း အကြမ်းဖက်အဖွဲ့ဟု ကြေညာခဲ့သည်။

ထို့ပြင် ယခုသီတင်းပတ်အတွင်း မွတ်စလင်ညီအကိုများအဖွဲ့ဝင် ၅၀၀ ကျော်အား သေဒဏ်ပေးခဲ့သေးသည်။