ရပ်တည်မှုလမ်းဆုံ (အတွေးအမြင်)

မတ် ၂၇ ၊ ၂၀၁၄
ရေးသူ- ဂျူလိုင်ရဲရင့်

ခေတ်အဆက်ဆက် မြန်မာ့ရာဇ၀င်ထဲက “တိုင်းရင်းသားများ” လို့ ဆိုရင် အလွန်ရိုးသားယဉ်ကျေးလို့ အေးဆေးတဲ့သူတွေဆိုပြီး ကမ္ဘာကျော်စာရေးဆရာတွေရဲ့ စာအုပ်တွေထဲမှာ မှတ်တမ်းတင်ခံရတဲ့အထိဘဲ။

မြန်မာပြည်က ဗုဒ္ဓဘာသာရဲ့ပုံရိပ်လည်း အလွန်ကောင်းခဲ့တယ်။

ဒီနှစ်ပိုင်းတွေမှာတော့ အမျိုးသားရေးဝတ်ရုံခြုံပြီး အမြတ်ထုတ်နေကြတဲ့ အစွန်းရောက်ဗုဒ္ဓဘာသာဝင်တစ်စုကြောင့် Buddhist from Myanmar/Burma လို့ကြားတာနဲ့ နိုင်ငံတကာကလူတွေ တွန့်ရွံ့မဲ့ရွဲ့လာကြပြီ။

ပြည်တွင်းလုပ်ကြံမီဒီယာက ၀ါဒမှိုင်းတိုက်မှုတွေကို ကျော်ပြီး နိုင်ငံရပ်ခြားမှာရှိနေသူတွေကို လက်တွေ့ ကြည့်ရှုမေးမြန်းနိုင်ပါတယ်။ တကယ့်ဗုဒ္ဓ၀ါဒီစစ်စစ်တွေအဖို့ အချောင်အထင်သေးခံကြရတာ တကယ်ကိုယ်ချင်းစာပါတယ်။

ဘာသာရေးခုတုံးလုပ်ပြီး အကြီးအကျယ်သောင်းကျန်းချိန်တွေမှာ အမှန်ကို ချပြရင်ဆိုင်ရဲကြတဲ့ ဗုဒ္ဓဘာသာဝင်အရေအတွက်က လုံးဝ လက်တစ်ဆုပ်စာသာသာလေး ရှိခဲ့ကြတယ်။ (သူတို့လည်း အမှန်တရားပေါ်ရပ်တည်ကြလို့ တော်တော်လေး အဖဲ့ခံခဲ့ကြရတယ်။ လေးစားလောက်ပါတယ်)။

ကမ်းကုန်အောင် မတရားမှန်းသိပါလျက်ကယ်နဲ့ အများစုက ရေငုံနှုတ်ပိတ်နေခဲ့ကြတယ်။ ဒီအကြောင်းတရားရဲ့အကျိုးဆက်တွေပါဘဲ။

သာသနာတစ်ခုက ဂုဏ်သိက္ခာရှိရှိ ဆက်လက် မတည်တံ့နိုင်ရင် ပြန့်ပွားအောင်ဖြန့်ချိဖို့ ဘယ်လိုမှ မဖြစ်နိုင်ဘူးဆိုတာ သာမန်အသိဥာဏ်နဲ့တောင် စဉ်းစားတတ်ကြပါတယ်။ တစ်နည်းဘဲကျန်ပါတယ်။ ဗုဒ္ဓဘာသာရဲ့ အမည်နာမ၊ အဆောင်အယောင်တွေကို အသုံးချနေတဲ့ သာသနာဖျက်တွေအပေါ်
ဗုဒ္ဓဘာသာဝင်စစ်စစ်များက စုပေါင်း ပယ်လှန်လိုက်ရင် ရှိရင်း စွဲရောင်ဝါတွေ ပြန်လည်ထိန်လင်းလာပါလိမ့်မယ်။

အလားတူစွာဘဲ ဒီရက်ပိုင်း ရခိုင်ပြည်နယ်ထဲ ရခိုင်အုပ်စုများရဲ့ ထင်ရာစိုင်းသောင်းကျန်းမှုဟာ နှစ်နှစ်တာအတွင်း ကမ္ဘာ့မီဒီယာ မျက်နှာပြင်ကနေ ဖော်ပြချက်များက ဒက်ထိကွက်တိ မှန်ကန်ပါကြောင်း မှတ်တိုင်စိုက်ထူလိုက်ခြင်းပါဘဲ။

ဘယ်သူမပြု မိမိမှုပါ။

လူမျိုးစုတစ်စုရဲ့ ကောင်းချက်ဖြစ်စေ ဆိုးချက်ဖြစ်စေ အများအားဖြင့် ကြိုးကိုင်မောင်းနှင်နေကြတာကတော့ အဲ့ဒီသက်ဆိုင်ရာ လူမျိုးစုရဲ့ ခေါင်းဆောင်များဖြစ်ကြတယ်။ ရှေ့ကနွား ဖြောင့်ဖြောင့်မသွားရင် နောက်တော်ပါးများက ကောက်ကွေ့နေမှာ သဘာဝပါဘဲ။

အထိန်းအကွပ်မဲ့ ယုတ်ညံ့လွန်းတဲ့ လူတစ်စုကြောင့် အဲ့ဒီလူမျိုးနွယ်အားလုံး သိက္ခာမဲ့အရှက်ရပြီး ပုတ်ခတ်ရှုတ်ချခံကြရပါလိမ့်မယ်။ ဒါက ကမ္ဘာ့ရာဇ၀င်တစ်လျှောက် သမိုင်းကပေးတဲ့ သင်ခန်းစာပါ။

တဆက်တည်းမှာဘဲ သောက ၀င်လာမိပါတယ်။ အဲ့ဒါနဲ့နွှယ်ပြီး အခြားတိုင်းရင်းသားများဟာလည်း နိုင်ငံတကာအမြင်မှာ ဒီပုပ်ထဲက ဒီပဲတွေပါလို့ ရောချသတ်မှတ်ခံရမှာ စိုးရိမ်စရာပါ။

လူမျိုးရေး ဘာသာရေးဆိုတာ အလွန်အင်မတန်မှ ထိလွယ် ရှလွယ်ဖြစ်သလို အထင်မှားခြင်းရောဂါလည်း ကူးစက်နှုန်း မြန်ဆန်လွန်းပါတယ်။ ဒါကြောင့် အခြားတိုင်းရင်းသားတွေ အနေနဲ့ ငါတို့နဲ့မဆိုင်ဆိုပြီး ရေငုံနှုတ်ပိတ် ဆက်နေကြမလား ………..

တိုင်းရင်းသား ဆိုတဲ့ ဝေါဟာရကြောင့် ထိခိုက်နစ်နာမှု မီးခိုးကြွက်လျှောက် လိုက်လာလေတော့မလား … ဆိုတာကို အစွဲကင်းစွာနဲ့ တွေးတောနေမိပါတယ်။

(ဘာလူမျိုး ဘယ်ဘာသာဝင်ဖြစ်စေ မြန်မာပြည်ကထွက်လိုက်တာနဲ့ နိုင်ငံတကာက ကျွန်တော်တို့ကို Burman/Myanmar ဆိုပြီး ခြုံငုံခေါ်ဆိုကြတယ်။ ကျွန်တော်တို့ရဲ့ ပြည်တွင်းစံနှုန်းသတ်မှတ်ချက်မှန်သမျှ ပြည်တွင်းထဲမှာသာ အလုပ်ဖြစ်ကြောင်း နားလည်ထားကြမယ်ဆိုရင် အကောင်းဆုံးအဖြေ မဟုတ်တာတောင်မှ တစ်စုံတစ်ရာတော့ တုန့်ပြန်ဖြစ်ကြလိမ့်မယ်လို့ မျှော်လင့်မိပါတယ်)။