စစ်တွေ မငြိမ်သက်မှု လူစုခွဲရာ တစ်ယောက် သေဆုံး

မတ် ၂၇ ၊ ၂၀၁၄
BBC (မြန်မာပိုင်း)

စစ်တွေမြို့မှာ ဖြစ်ခဲ့တဲ့ မငြိမ်မသက် ဖြစ်မှုကြောင့် ရဲတွေက ခြောက်လှန့် ပစ်ခတ် လူစုခွဲရာမှာ အသက် ၁၁ နှစ်အရွယ် ကလေးမ တစ်ယောက် သေဆုံးသွားခဲ့တယ်လို့ မြန်မာနိုင်ငံ ရဲတပ်ဖွဲ့ လုံခြုံရေးနဲ့ ထောက်လှမ်းရေးအဖွဲ့ ဒုတိယ ညွှန်ကြားရေးမှူး ဒုတိယ ရဲမှူးကြီး မင်းအောင်က ဘီဘီစီကို ပြောပါတယ်။

စစ်တွေမြို့က အန်ဂျီအို ဝန်ထမ်း နိုင်ငံခြားသူ အမျိုးသမီးက သာသနာ့ အလံကို မဖွယ်မရာ ပြုလုပ်တယ် ဆိုပြီး အန်ဂျီအို ရုံးတွေကို စစ်တွေ ဒေသခံတွေက ခဲတွေ တုတ်တွေနဲ့ ဝိုင်းဝန်း ဖြိုဖျက် တိုက်ခိုက်ခဲ့ပြီးတဲ့နောက် ပုဒ်မ ၁၄၄ ညမထွက်ရ အမိန့် ထုတ်ပြန်ထား ပါတယ်။

တိုက်ခိုက်သူတွေဟာ အုပ်စုလိုက် အဖွဲ့တွေ ခွဲပြီး တိုက်ခိုက်ခဲ့တာကို ထိန်းသိမ်းဖို့ ခက်ခဲတဲ့အတွက် ညမထွက်ရအမိန့် ထုတ်ပြန်ရတာ ဖြစ်တယ်လို့ စစ်တွေမြို့နယ် ရဲတပ်ဖွဲ့မှူးက ဘီဘီစီကို ပြောပါတယ်။

မတ်လ ၂၆ ရက် ဗုဒ္ဓဟူးနေ့က စတင် ဖြစ်ခဲ့တဲ့ အဲဒီ တိုက်ခိုက်မှုဟာ ည ၁၂ နာရီ အကျော်ထိ ထိန်းမနိုင် သိမ်းမရ ဖြစ်လာတဲ့အတွက် ရဲတပ်ဖွဲ့က သေနတ်တွေ မိုးပေါ်ထောင် ပစ်ပြီး လူစုခွဲခဲ့ရပါတယ်။

နောက်တစ်နေ့ ကြာသပတေးနေ့မှာလည်း မကျေနပ်တဲ့ သူတွေက မနက်ပိုင်းကနေ ညနေပိုင်းအထိ အန်ဂျီအိုတွေရဲ့ နေအိမ်တွေကို တိုက်ခိုက် ခဲ့ကြတဲ့အတွက် အန်ဂျီအိုရုံး အတော်များများ ပျက်စီးသွားခဲ့ရပါတယ်။

လောလောဆယ် နိုင်ငံခြားသားတွေ အပါအဝင် အန်ဂျီအို ဝန်ထမ်းတွေကို အာဏာပိုင်တွေက မနက်ပိုင်းအထိ ရဲစခန်းမှာ ခေါ်ယူ ထားတယ်လို့ ရဲစခန်းကို ရောက်ရှိတုန်း အန်ဂျီအို မြန်မာဝန်ထမ်း တစ်ယောက်က ဘီဘီစီကို ပြောပါတယ်။

ရုန်းရင်း ဆန်ခတ်မူတွေ ဖြစ်ပွားခဲ့တဲ့အတွက် စစ်တွေမှာ ဈေးတွေနဲ့ ဆိုင်ခန်းတွေကို ပိတ်ထားခဲ့ရပါတယ်။

ဒါပေမယ့် ကုလသမဂ္ဂ ဘက်ကတော့ သာသနာ့အလံကို အန်ဂျီအို ဝန်ထမ်းက မဖွယ်မရာ ပြုလုပ်တယ် ဆိုတာဟာ မှန်ကန်မှု မရှိဘူး၊ ကောလဟာလ ပြောကြတာလို့ ဘီဘီစီကို ပြောပါတယ်။

ရန်ကုန်မှာ ရှိတဲ့ အမေရိကန် သံရုံးက အခု လတ်တလော ဖြစ်ရပ်တွေနဲ့ ပတ်သက်ပြီး စိုးရိမ်မကင်းကြောင်း ကြေညာချက် ထုတ်ပြန်ပြောဆိုပါတယ်။

Photo Credit- Pho Zaw (ရဲအရာရှိ) FB မှ ကူးယူဖော်ပြပါသည်။

http://www.bbc.co.uk/burmese/burma/2014/03/140327_sittwe_ngo_144.shtml