အသင်းရှိ လူငယ်များကို အခွင့်အရေးပေးသင့်သည်ဟု စပါးနည်းပြ ရှားဝုဒ်ဆို

မတ် ၂၉ ၊ ၂၀၁၄
M-Media
– ငွေကြေးမြောက်များစွာအသုံးပြု၍ လူသစ်ခေါ်ယူခြင်းထက် အသင်းရှိလူငယ်ကစားသမားများအား ယုံကြည်မှုရှိကာ အခွင့်အရေးပေးသင့်သည်ဟု စပါးအသင်းနည်းပြ တင်ရှားဝုဒ်က ပြောကြားလိုက်သည်။

စပါးအသင်းမှာ ပြီးခဲ့သည့်နွေရာသီက အသင်းတိုက်စစ်မှူး ဂါရက်ဘေးလ်ကို စံချိန်တန်ပြောင်းရွှေ့ကြေးဖြင့် ရီးယဲလ်အသင်းသို့ ရောင်းချခဲ့ပြီးနောက် နည်းပြဟောင်း ဗီလာဘိုအာ့စ်က ပေါင်သန်း ၁၀၀ ကျော်အသုံးပြုကာ ကစားသမားအသစ်များ ခေါ်ယူခဲ့သည်။

သို့သော်လည်း စပါးအသင်းမှာ ပရီးမီးယားလိဂ်တွင်ရုန်းကန်ခဲ့ပြီး၊ ဘိုအာ့စ်ကိုလည်း ပြီးခဲ့သည့်နှစ် ဒီဇင်ဘာလတွင်  စပါးအသင်းမှ ထုတ်ပယ်ခဲ့ကာ ရှားဝုဒ်နှင့် အစားထိုးခဲ့သည်။ ရှားဝုဒ်က အသင်း၏ လူငယ်ကစားသမားများဖြစ်ကြသည့် နဘီလ်း ဘန်တာလဘ်နှင့် ဟယ်ရီကိန်းတို့အား ပထမအသင်းတွင် နေရာပေးခဲ့ပြီး ၎င်းတို့မှာလည်း ခြေစွမ်းပြနိုင်ခဲ့သည်။

“အသင်းကထွက်တဲ့ ကစားသမားတွေသာ (အသင်းအတွက်) အကောင်းဆုံးကစားသမားတွေဖြစ်တယ်လို့ ကျွန်တော်အမြဲတမ်းယုံကြည်ထားပါတယ်။ ခင်ဗျားဟာ ခရစ္စတီယာနို ရော်နယ်ဒိုကို ရကောင်ရမှာဖြစ်ပေမယ့် သူ့အတွက် ပိုက်ဆံအများကြီးပေးရမှာပါ” ဟု ရှားဝုဒ်က The Independent သတင်းစာသို့ ပြောကြားခဲ့သည်။

၁၈ လ ကာလတိုစာချုပ်ဖြင့်သာ ခန့်အပ်ခြင်းခံထားရသည့် ရှားဝုဒ်မှာ အသင်းတွင် ကြာရှည်ရှိနေရန် မသေချာဘဲ စပါးအသင်းကလည်း နည်းပြသစ်များကိုရှာဖွေလျက်ရှိသည်။ ရှားဝုဒ်ကမူ မိမိအနေဖြင့် အမြင့်ဆုံးကို မျှော်မှန်းမထားကြောင်း၊ သို့သော်လည်း နည်းပြသစ်မှာ အသင်းနှင့် အံမ၀င်မည်ကို စိုးရိမ်မိကြောင်း ထည့်သွင်းပြောကြားခဲ့သည်။