ရခိုင်ပြည်က ပဟေဠိဆန်ဆန် သန်းခေါင်စာရင်း

ဧပြီ ၂ ၊ ၂၀၁၄
M-Media
ရေးသား ပေးပို့သူ- ယျာတင်( MYARF)

“သား ဘယ်လိုလဲ…ဘယ်ချိန် ရောက်လာမယ်လို့ ကြားလဲ”

မနက် (၇) နာရီတိတိအချိန်မှာ  ရောက်လာမယ်လို့ ပြောတဲ့ သန်းခေါင်စာရင်းကောက်ခံရေးအဖွဲ့  (၁၁) နာရီထိရောက်မလာခဲ့သောအခါ အဖေ ဖြစ်သူက သူ့ သားလေးကို အပြင်ထွက် စုံစမ်းခိုင်းလိုက်ခြင်းမှ သားလေးပြန်လာလျှင် အဖေဖြစ်သူက မေးလိုက်ခြင်းဖြစ်သည်။

” ဘုန်းကြီးကျောင်းထဲမှာ အစည်းအဝေးပြုလုပ်နေလို့ တဲ့ အဖေ…အုပ်ချုပ်ရေးမှူးး ကတော့ ရောက်လာမယ်လို့ ပြောတာပဲ…”

သားလေးရဲ့ စကားကိုကြားကြားချင်းပဲ အဖေဖြစ်သူရဲ့ ဒေါသစိတ်က အထွဋ်အထိပ်သို့ ရောက်ရှိလာပြီဖြစ်သော်လည်း ကြိတ်မှိတ်ခံထားလိုက်၏ ။

“သန်းခေါင်စာရင်းကိစ္စ ကို ဘုန်းကြီးကျောင်းထဲမှာ ဘာဖြစ်လို့ စည်းဝေးဆွေးနွေးနေရတာလဲ…သေချာနေပြီ…ဟိုတစ်နေ့ တည်းက ထွက်ထွက်နေတဲ့ ကောလဟာလ သတင်းစကားတွေ ကအမှန်ပေကိုး…ရိုဟင်ဂျာလို့ ရေးခွင့်မပြုနိုင်ဘူးတဲ့…အာရ်ကန် ဦးအစကတည်းက ရှိနေတဲ့ လူတွေကို မနေ့ တစ်နေ့ က ဘဲ ခိုးဝင်လာသလိုလိုနဲ့ ပြောတာများ…

ဒီရခိုင်ပြည်နယ်အစိုးရကလည်းနော် …တစ်နိုင်ငံလုံးမှာတစ်မျိုးသူတို့ ဒီမှာ ကြံစည်လုပ်ဆောင်နေတာတစ်မျိုး…ဒီမြန်မာပြည်ကို သူတို့ ရခိုင်တွေ အုပ်ချုပ်နေတာကျနေတာပဲ…တောက် ”  အဖေဖြစ်သူ ဘာသာသူ့ စိတ်ထဲပြောနေမိသည်။

” သား…အဖေ သွားအနားယူလိုက်တော့မယ်…သူတို့ ရောက်လာရင်တော့ သားတစ်ခွန်းပဲအရင်မေးလိုက်…သန်းခေါင်စာရင်းဥပဒေအတိုင်းလုပ်မလား ဒါမှမဟုတ် သူတို့ ရခိုင်တွေရဲ့ ကိုယ်တိုင် ဥပဒေ နဲ့ လုပ်မလား …သန်းခေါင်စာရင်း ဥပဒေအတိုင်း လုပ်မယ်ဆိုမှပဲ အဖေကို အ်ိပ်ရာက နှိုးပေး မဟုတ်ရင်တော့ အကောက်မခံဘူးလို့ ဘဲ ပြောလိုက်တော့…ကြားလားသား…”

အဖေဖြစ်သူရဲ့ ပြတ်ပြတ်သားသား စကားကို ကြားလိုက်မိပြီးသည်နောက် သားလေးရဲ့ မျက်လုံးမှ မျက်ရည်စက်တွေ စီးဆင်းလာနေသည်။

အာဏာရှင်ကြောင့် အတန်ကြာကြာ ဖြစ်တည်ခဲ့တဲ့ အကြောက်တရားတွေ အဖေ့ ရင်ထဲက နှလုံးသားထဲက လွင့်စင်သွားပါပြီလားဆိုတဲ့ အသိတရားက သားလေးကို အပျော်မျက်ရည်တွေ ယိုစေခဲ့တာဖြစ်၏ ။ ပါးပြင်ပေါ် စီးဆင်းလာနေသော အပျော်မျက်ရည်စက်တွေကို လက်ဖဝါးနှင့် အပြုံးမပျက် သုတ်နေရင်း သားလေးက အဖေဖြစ်သူကို ခေါင်းတညိတ်ညိတ်ပြလိုက်သောအခါ အဖေဖြစ်သူလည်း အခန်းထဲဝင်ပြီး အနားယူနေလိုက်တော့သည်။

ဖိနှိပ်လေ သတ္တိမွေးလာလေပဲ ဆိုတာ သားအဖနှစ်ယောက် ကိုယ်တွေ့ ကြုံခဲ့ရတော့သည်။

ယျာတင် ( MYARF)
ဓါတ်ပုံ- Internet

** M-Media သို့ စာဖတ်သူပရိတ်သတ်တစ်ဦး ပေးပို့လာသော ကိုယ်တွေ့ခံစားချက် ဆောင်းပါးတို ဖြစ်ပါတယ်။