ပြင်သစ်မြေမှာ ဒူးထောက်ခဲ့ရတဲ့ ချယ်ဆီး၊ အိမ်ကွင်းမှာ အမှားမရှိခဲ့ဘဲ ၁၀-ကြိမ်မြောက် ချန်ပီယံလိဂ်ဖလား အိပ်မက်

ဧပြီ ၃၊ ၂၀၁၄
M-Media

ပြင်သစ်မြေမှာ ဒူးထောက်ခဲ့ရတဲ့ ချယ်ဆီး၊ အိမ်ကွင်းမှာ အမှားမရှိခဲ့ဘဲ ၁၀ ကြိမ်မြောက် ချန်ပီယံလိဂ်ဖလား အိပ်မက်နဲ့ နီးကပ်လာတဲ့ ရီးယဲလ်တို့ရဲ့ ချန်ပီယံလိဂ် ကွာတားဖိုင်နယ် ပထမအကျော့ ပွဲများ

– ချန်ပီယံလိဂ် ကွာတားဖိုင်နယ် ပထမအကျော့ လက်ကျန် ၂-ပွဲကို ယနေ့မနက်မှာကစားခဲ့ပြီး အိမ်ရှင်တွေဖြစ်တဲ့ ရီးယဲလ်နဲ့ ပီအက်စ်ဂျီတို့ ဒေါ့မွန်၊ ချယ်ဆီးတို့ကို ဂိုးပြတ်နဲ့နိုင်ခဲ့ပါတယ်။

၁၀ ကြိမ်မြောက် ချန်ပီယံလိဂ်ဖလား ဆွတ်ခူးဖို့ ကြိုးစားနေတဲ့ ရီးယဲလ်တို့ ဘာနေဗျူးမှာ ဂျာမန်ကလပ် ဒေါ့မွန်အသင်းကို သက်တောင့်သက်သာကစားပြီး ၃-ဂိုးပြတ်နဲ့အနိုင်ရခဲ့တာပါ။ မနှစ်က ချန်ပီယံလိဂ် ဗိုလ်လုပွဲမှာ ဘိုင်ယန်ကိုရှုံးပြီး ဒုတိယရခဲ့တဲ့ ဒေါ့မွန်တို့ရဲ့ ကစားပုံဟာ စွဲမက်စရာမရှိခဲ့ဘဲ တစ်ပွဲလုံးမှာမှ ရီးယဲလ်ဂိုးပေါက်ကို ၂-ကြိမ်လောက်သာ ခြိမ်းခြောက်နိုင်ခဲ့ပါတယ်။

ရီးယဲလ်ကတော့ ရော်နယ်ဒို၊ ဘေးလ်၊ ဘန်ဇီမာတို့ တိုက်စစ်အတွဲနဲ့ ဒေါ့မွန်ဘက်ကို ခြိမ်းခြောက်နိုင်ခဲ့ပြီး ရော်နယ်ဒို၊ ဘေးလ်တို့ရဲ့ ဖရီးကစ်ကန်ချက်တွေ ဂိုးမ၀င်တာကြောင့်သာ ဒီထက်ပိုပြီး ဂိုးမပြတ်ခဲ့တာပါ။ ရီးယဲလ်အတွက်ဂိုးတွေကိုတော့ ရော်နယ်ဒို၊ ဘေးလ်နဲ့ အစ္စကိုတို့က ၁ ဂိုးစီ သွင်းပေးခဲ့ကြ ပါတယ်။

ပြင်သစ်မြေမှာသွားကစားခဲ့တဲ့ မော်ရင်ဟိုရဲ့ ချယ်ဆီးတို့ ကစားပုံကောင်းခဲ့ပြီး မိနစ် ၆၀ အထိ သရေ ရထားခဲ့ပေမယ့် ပွဲအပြီးမှာတော့ ၃ ဂိုး ၁ ဂိုးနဲ့ ပီအက်စ်ဂျီကို အရှုံးပေးခဲ့ရပါတယ်။ ချယ်ဆီးရဲ့ ပွဲထွက်လူစာရင်းမှာ တိုက်စစ်မှူး တစ်ယောက်မှ မပါခဲ့ဘဲ တောင်ပံကစားသမား အန်ဒရီရှရဲလ်ကို အထောင်တိုက်စစ်မှူးအဖြစ် သုံးခဲ့တာက ထူးခြားမှုတစ်ခုပါ။ ဒါပေမယ့် အိမ်ရှင်ပီအက်စ်ဂျီကိုတော့ ကောင်းကောင်းယှဉ်ကစားနိုင်ခဲ့ပါတယ်။

ပွဲအစ ၄ မိနစ်မှာ အဖွင့်ဂိုးရလိုက်တာက ပီအက်စ်ဂျီတို့အတွက် စိတ်ဓာတ်ရေးရာ အသာစီးရမှု ဖြစ်ခဲပါတယ်။ ဒီဂိုးကိုတော့ တယ်ရီရဲ့ခေါင်းတိုက် ဖျက်ထုတ်မှု လာဗက်ဇီဆီရောက်သွားပြီး သူက ရင်ဘတ်နဲ့တစ်ချက်ထိန်းကာ ဘယ်ခြေနဲ့ လှလှပပကန်သွင်းယူခဲ့တာပါ။ ၂၇ မိနစ်မှာတော့ ချယ်ဆီးတို့ ချေပဂိုးရခဲပါတယ်။ အော်စကာကြောင့် ရတဲ့ ပင်နယ်တီကို ဟဇာ့ဒ်က အမှားအယွင်းမရှိ ကန်သွင်းယူခဲ့တာပါ။ နောက်ပိုင်းမှာလည်း ချယ်ဆီးတို့ ကစားပုံကောင်းခဲ့ပြီး ၃၉ မိနစ်မှာ ၀ီလီယံရဲ့ကန်တင်မှုကို ဟာဇာ့ဒ်မြေမကျကန်သွင်းချက် တိုင်ထိထွက်ခဲ့တာက ချယ်ဆီးတို့အတွက် နစ်နာမှု ဖြစ်ခဲ့ရပါတယ်။

ဒုတိယပိုင်းအစမှာတော့ အိမ်ရှင်တို့ ဖိကစားနိုင်ခဲ့ပေမယ့် ချယ်ဆီးခံစစ်ကို ထိထိရောက်ရောက် ခြိမ်းခြောက်နိုင်ခြင်း မရှိခဲ့ပါဘူး။ ဒါပေမယ့် လိုအပ်တဲ့ အနိုင်ဂိုးတွေကိုတော့ ပီအက်စ်ဂျီတို့ ရရှိခဲ့ပါတယ်။ ၆၁ မိနစ်မှာ ဘယ်ခြမ်းက ဖရီးကစ်ကန်ချန် ချယ်ဆီးနောက်ခံလူ လူးဝစ်နဲ့ထိကာ တစ်ဂိုးရခဲ့ပြီး၊ ဒုတိယပိုင်း နာကျင်အချိန်ပိုမှာ ပက်စ်တိုရီက ချယ်ဆီးနောက်ခံလူ ၂ ယောက်ကို လှလှပပ ကျော်ဖြတ်ပြီး ဂိုးသမား ပိတ်ထားတဲ့ ထောင့်ကျဉ်းထဲကို ကန်သွင်းယူနိုင်ခဲ့တာဖြစ်ပါတယ်။

မော်ရင်ဟိုရဲ့ ချယ်ဆီးကတော့ အိမ်ကွင်းပွဲစဉ်မှာ အနည်းဆုံး ၂ ဂိုးပြတ်နဲ့ အနိုင်ကစားရတော့မှာဖြစ်ပြီး၊ နောက်တစ်ဆင့်တရက်ရေးအတွက် ရုန်းကန်ရတော့မှာပါ။

ယနေ့မနက် ချန်ပီယံလိဂ်ကွာတားဖိုင်နယ် ရလဒ်များကတော့ အောက်ပါအတိုင်းဖြစ်ပါတယ်။

ရီးယဲလ် ၃-၀ ဒေါ့မွန်
ပီအက်စ်ဂျီ ၃-၁ ချယ်ဆီး