ကျွန်းပိုင်ဆိုင်မှုကိစ္စ တစ်ဖက်သတ် ဆောင်ရွက်ခြင်း မပြုရန် တရုတ်အား အမေရိကန် သတိပေး

ဧပြီ ၆၊ ၂၀၁၄
M-Media

– ဂျပန်နှင့် အခြားသော အရှေ့တောင် အာရှနိုင်ငံများနှင့် ဖြစ်ပွားနေသည့် နယ်မြေပိုင်ဆိုင်မှု အငြင်းပွားခြင်းများကို ဖြေရှင်းရာတွင် တစ်ဘက်သတ် ဆောင်ရွက်မှုများ မပြုလုပ်ရန် အမေရိကန် ကာကွယ်ရေးဝန်ကြီး ချက်ဟေဂယ်က တရုတ်နိုင်ငံအား သတိပေး ပြောကြားခဲ့သည်။

တရုတ်နိုင်ငံ၏ စစ်ရေးပြင်ဆင်မှု၊ အရှေ့တရုတ်ပင်လယ်ရှိ ဂျပန်နိုင်ငံနှင့် အငြင်းပွားနေသော ကျွန်းစုအား ရဲရဲတင်းတင်း လုပ်ကိုင်ဆောင်ရွက်နေမှုများကြောင့် စိုးရိမ်မှုများ တိုးပွားလာနေသည့် မဟာမိတ် ဂျပန်နိုင်ငံသို့ အလည်အပတ်ရောက် ရှိစဉ်အတွင်း ချက်ဟေဂယ်က ယခုကဲ့သို့ သတိပေးခဲ့ခြင်းဖြစ်သည်။ ဟေဂယ်မှာ မနက်ဖြန်တွင် တရုတ်နိုင်ငံသို့ သွားရောက် လည်ပတ်မည်ဖြစ်သည်။

“အင်အားကြီးနိုင်ငံတစ်ခုမှာ ကြီးမားတဲ့ တာဝန်ယူမှုလည်း ရှိရပါမယ်။ တရုတ်နိုင်ငံဟာ အင်အားကြီး နိုင်ငံတစ်ခုပါ” ဟု ဟေဂယ်ကဆိုပြီး တရုတ်နိုင်ငံ၏ စစ်အင်အား အသုံးပြုမှုနှင့် စပ်လျဉ်း၍လည်း တရုတ်နိုင်ငံနှင့် ဆွေးနွေးသွားမည်ဟု ထည့်သွင်းပြောကြားခဲ့သည်။

ဟေဂယ်မှာ ပြီးခဲ့သည့် သီတင်းပတ်ကလည်း အရှေ့တောင်အာရှနိုင်ငံများမှ ကာကွယ်ရေးဝန်ကြီးများနှင့် အစည်းအဝေးတစ်ခု ပြုလုပ်ခဲ့ပြီး တောင်တရုတ်ပင်လယ်အတွင်း ဖြစ်ပွားနေသည့် ပိုင်ဆိုင်မှုအငြင်းပွားခြင်းများနှင့် ပတ်သက်၍ အမေရိကန်မှာ စိုးရိမ်မှု ကြီးထွားလာနေသည်ဟု သတိပေးခဲ့သည်။