အဲဗာတန်ကို ဂိုးပြတ်ရှုံးပြီး ချန်ပီလိဂ် ဝင်ခွင့် ရုန်းကန်ရတော့မည့် အာဆင်နယ်၊ လီဗာပူးအမှားမရှိ နိုင်ပွဲဆက်

ဧပြီ ၇ ၊၂၀၁၄
M-Media

အဲဗာတန်ကိုရှုံးပြီး ချန်ပီယံလိဂ် ၀င်ခွင့်အတွက် ရုန်းကန် ရတော့မယ့် အာဆင်နယ်၊ အမှားအယွင်းမရှိဘဲ ဇယား ထိပ်ဆုံးနေရာကို ဆက်လက် ရယူထားနိုင်တဲ့ လီဗာပူးလ်တို့ရဲ့ ပရီးမီးယားလိဂ် ပွဲစဉ် ၃၃ စူပါဆန်းဒေးပွဲများ

– ယမန်နေ့ညက ကစားခဲ့တဲ့ ပရီးမီးယားလိဂ်ပွဲစဉ် ၃၃ ဆူပါဆန်းဒေး ၂ ပွဲမှာ အဲဗာတန် အသင်းဟာ အဆင်နယ်ကို ဂိုးပြတ်နဲ့ နှိပ်ကွပ်နိုင်ခဲ့ပြီး၊ လီဗာပူလ်းကလည်း ဂျရတ်ရဲ့ ပင်နယ်တီဂိုးတွေနဲ့ ၃ မှတ်ရခဲ့ပါတယ်။

ရာသီအစ ခြေစွမ်းကောင်းတွေပြသပြီး ပရီးမီယားလိဂ်ဇယားကို အချိန်အတော်ကြာ ဦးဆောင်ထားနိုင်ခဲ့တဲ့ အာဆင်နယ်တို့ နောက်ပိုင်းမှာတော့ အဓိက ကစားသမားတွေ ဒဏ်ရာရရှိမှု၊ ပွဲထွက်ကစားသမားတွေ ခြေစွမ်း မပြနိုင်မှု စတာတွေကြောင့် ရလဒ်ဆိုးများကို ဆက်တိုက်တွေ့ကြုံလာခဲ့ရပါတယ်။ မနေ့ညက ကစားခဲ့တဲ့ပွဲမှာလည်း အဲဗာတန်ကို ၃ ဂိုးပြတ်နဲ့ ရှုံးခဲ့ပြီး ရာသီအစက ချန်ပီယံဆုကိုမှန်းနိုင်ခဲ့တဲ့ အာဆင်နယ်တို့ အခုအချိန်မှာတော့ ချန်ပီယံလိဂ်ဝင်ခွင့်နေရာအတွက်ပါ စိုးရိမ်လာခဲ့ရပါပြီ။

ပရီးမီးယားလိဂ် နောက်ဆုံး ၅ ပွဲစလုံး အနိုင်ကစားထားနိုင်တဲ့ အဲဗာတန်တို့ ပွဲစတာနဲ့ အာဆင်နယ်ကို ဖိအားပေးနိုင်ခဲ့ပြီး ၁၄ မိနစ်မှာပဲ ဦးဆောင်ဂိုး စသွင်းနိုင်ခဲ့တာပါ။ အာဆင်နယ်တို့ ချေပဂိုးရဖို့ ကြိုစားခဲ့ပေမယ့် အရာမထင်ခဲ့ဘဲ အဲဗာတန်ကသာ ပွဲကိုစိုးမိုးထားနိုင်ခဲ့ပြီး အာဆင်နယ်ဂိုးသမား ရှက်ဇက်နီ အဲဗာတန်တိုက်စစ်ရဲ့ ကန်သွင်းချက် တော်တော်များများကို လက်စွမ်းပြ ကာကွယ်သွားနိုင်လို့သာ ဒီထက် ဂိုးမပြတ်ခဲ့တာပါ။ အဲဗာတန်အသင်းအတွက် ဒုတိယဂိုးကို ၃၄ မိနစ်မှာ တိုက်စစ်မှူး လူကာကူ တစ်ကိုယ်တော်အစွမ်းပြ သွင်းယူနိုင်ခဲ့တာဖြစ်ပြီး ၆၂ မိနစ်မှာ အာတီတာရဲ့ ကိုယ့်ဂိုးကိုယ်သွင်းမှုကြောင့် အိမ်ရှင်တို့ တတိယဂိုး ရခဲ့ပါတယ်။

ဒီပွဲအနိုင်ကြောင့် အဲဗာတန်တို့ရဲ့ ချန်ပီယံလိဂ်ဝင်ခွင့်ရရေး မျှော်လင့်ချက်ဟာ အားကောင်းလာခဲ့ပြီး အာဆင်နယ်ကတော့ ၁၇ နှစ်အတွင်း ပထမဆုံးအကြိမ် ချန်ပီယံလိဂ် ၀င်ခွင့်မလွဲချော်အောင် ရုန်းကန်ရတော့မှာဖြစ်ပါတယ်။ အာဆင်ဝင်းဂါကလည်း အာဆင်နယ်အသင်းအတွက် ချန်ပီယံလိဂ် ၀င်ခွင့်ဟာ ခက်ခဲခဲ့ပြီလို့ ပွဲအပြီးမှာ ၀န်ခံသွားခဲ့ပါတယ်။

မနေ့ကပွဲမှာ မန်စီးတီး၊ ချယ်ဆီးတို့ အနိုင်ရသွားတဲ့အတွက် အမှားခံလို့မရတဲ့ လီဗာပူးလ်ကလည်း အဝေးကွင်းမှာ ဂျရတ်ရဲ့ ပင်နယ်တီတွေနဲ့ အဖိုးတန် ၃ မှတ်ရခဲ့ပါတယ်။ စတားရစ်ခ်ျ၊ ဆွာရက်ဇ်၊ စတာလင်၊ ဂျရတ်တို့နဲ့ လူစုံခဲ့တဲ့ လီဗာပူးလ်တို့ ၀က်စ်ဟမ်းကွင်းဖြစ်ပေမယ့် ဘောလုံးပိုင်ဆိုင်မှုအသာနဲ့ ကစားနိုင်ခဲ့ပြီး ဂိုးသွင်းခွင့်လည်း တော်တော် များများ ရခဲ့ပါတယ်။ ပထမပိုင်းရဲ့ အစောပိုင်းမိနစ်တွေကတည်းက ၀က်စ်ဟမ်းဂိုးပေါက်ကို ခြိမ်းခြောက်နိုင်ခဲ့ပေမယ့် ဦးဆောင်ဂိုးကိုတော့ ၄၄ မိနစ်မှာမှ ရခဲ့တာဖြစ်ပြီး ၀က်စ်ဟမ်းနောက်ခံလူ တွမ်ကင်ရဲ့ ဧရိယာအတွင်း လက်ထိမှုကြောင့် ရတဲ့ပင်နယ်တီကို ဂျရတ်က ကန်သွင်းယူခဲ့တာပါ။ ဒါပေမယ့် ပထမပိုင်း နာကျင်အချိန်ပိုမှာပဲ အိမ်ရှင်တို့ ချေပဂိုးရခဲ့ပြီး နိုဘယ်လ်ရဲ့ ထောင့်ကန်ဘောအကျမှာ ဒီမဲလ်က သွင်းယူပေးခဲ့တာဖြစ်ပါတယ်။

ဒုတိယပိုင်းမှာ အိမ်ရှမ်တို့ အပိုင်ဂိုးသွင်းခွင့် ၂ ကြိမ်လောက်ရခဲ့ပြီး ဂိုးအဖြစ်မပြောင်းလဲနိုင်ခဲ့သလို၊ လီဗာပူးလ် တိုက်စစ်မှူးတွေရဲ့ ကန်သွင်းချက်တွေကလည်း ဂိုးမ၀င်ခဲ့ပါဘူး။ ၇၁ မိနစ်မှာတော့ လီဗာပူးလ်တို့ အနိုင်ဂိုးထပ် ရခဲ့ပါတယ်။ လီဗာပူးလ်နောက်ခံလူ ဖလန်ဂန်ကို ၀က်စ်ဟမ်းအလယ်တန်းလူ မက်သယူးတေလာက ဧရိယာအတွင်းမှာ ပြစ်ဒဏ် ကျူးလွန်ခဲ့တဲ့အတွက် ရရှိတဲ့ပင်နယ်တီကို ဂျရတ်က အမှားအယွင်းမရှိ ကန်သွင်းယူနိုင်ခဲ့တာပါ။ လီဗာပူးလ်ဟာ ဒီပွဲအနိုင်ကြောင့် ပရီးမီးယားလိဂ်ဇယားကို ၇၄ မှတ်နဲ့ ဆက်လက် ဦးဆောင်နေပြီး ချန်ပီယံဖြစ်ရေး အိပ်မက်ဟာ တစ်ဖြည်းဖြည်းနဲ့ နီးကပ်လို့လာခဲ့ပါပြီ။

ဒီတစ်ပတ် ပရီးမီးယားလိဂ် ရလဒ်များကတော့ အောက်ပါအတိုင်းဖြစ်ပါတယ်။

အဲဗာတန် ၃-၀ အာဆင်နယ်
ဝက်စ်ဟမ်း ၁-၂ လီဗာပူးလ်
မန်စီးတီး ၄-၁ ဆောက်သက်တမ်
အက်စတွန်ဗီလာ ၁-၂ ဖူလ်ဟမ်
ကာဒစ်ဖ် ၀-၃ ခရစ္စတယ်ပဲလေ့စ်
ဟားလ်စီးတီး ၁-၀ ဆွမ်ဆီး
နယူးကာဆယ် ၀-၄ မန်ယူ
နော်ဝစ်ခ်ျ ၀-၁ ၀က်စ်ဘရွန်း
ချယ်ဆီး ၃-၀ စတုတ်