ယာဉ်မတော်တဆမှု လျော့အောင် ဆိုင်ကယ် မစီးခိုင်းတာဟု ရန်ကုန်တိုင်း ယာဉ်စည်းကမ်း ထိန်းသိမ်းရေးပြော

ဧပြီ ၁၁၊ ၂၀၁၄
M-Media
လမင်း

ရန်ကုန်။      ။ ရန်ကုန်တိုင်းဒေသကြီးတွင် ၂၀၁၄ ခုနှစ်၌ ယာဉ်တိုက်မှုကြောင့် သေဆုံးသူဦးရေမှာ တစ်လထက် တစ်လမြှင့်တက်လာကြောင်း ရန်ကုန်တိုင်းဒေသကြီး ယာဉ်စည်းကမ်း ထိန်းသိမ်းရေးကြီးကြပ်မှု ကော်မတီထံမှတဆင့် သိရှိရပါသည်။

၂၀၁၄ မတ်တွင် ရန်ကုန်တိုင်းဒေသကြီး အတွင်း ယာဉ်တိုက်မှုပေါင်း ၁၇၁ ခုဖြစ်ပွားခဲ့ပြီး ၂၁၇ ဦးဒဏ်ရာရခဲ့ပြီး သေဆုံးသူ ၃၆ ဦးရှိခဲ့သည်။ ရန်ကုန်တိုင်းဒေသကြီး ယာဉ်စည်းကမ်း ထိန်းသိမ်းရေးကြီးကြပ်မှုကော်မတီမှ အဆင်မြင့် အရာရှိတစ်ဦးက “ကျွန်တော်တို့ဒီလို တစ်လနဲ့တစ်လ မြှင့်တက်လာတာကို လျော့ကျသွားအောင် လုပ်ဆောင်နေပါတယ်။ ပညာပေး လုပ်ငန်းတွေကိုလည်း ရုပ်မြင်သံကြားတွေကနေ၊ လက်ကမ်း စာစောင်တွေထုတ်ပြီး လုပ်နေပါတယ်။ ယာဉ်တိုက်မှု တစ်ခုဖြစ်ပြီဆိုရင် အဲဒီတစ်မှုထဲမှာ လူတွေနှစ်ယောက် သုံးယောက်သေနေကြတာ။ ကားတွေလည်း စည်းကမ်းရှိ၊ လူတွေလည်း စည်းကမ်းရှိရင် ယာဉ်တိုက်မှုနှုန်းတွေလျော့ကျသွားမှာပါ” ဟူ၍ပြောခဲ့သည်။

ယာဉ်တိုက်မှုများလျော့နည်းစေရန်အတွက်လည်း ရန်ကုန်တိုင်းဒေသကြီး ယာဉ်စည်းကမ်း ထိန်းသိမ်းရေးကြီးကြပ်မှု ကော်မတီမှ ရန်ကုန်တိုင်း အတွင်း သက်ဆိုင်ရာ ဌာနများမှ ခွင့်ပြုထားသော မော်တော် ဆိုင်ကယ်များမှအပ တစ်ခြား ခွင့်မပြုထားသော ဆိုင်ကယ်များကိုလည်း ထိရောက်စွာ ဖမ်းဆီးအရေးယူ လျက်ရှိနေကြောင်း သိရသည်။

“ယာဉ်မတော်တဆမှုလျော့နည်းအောင် ကျွန်တော်တို့က ဆိုင်ကယ်တွေကို မစီးခိုင်းတာပါ။ တချို့တွေက စီးနေကြတုန်းပဲ။ တွေ့ရင်တော့ ဖမ်းပါတယ်။  အခုမတ်လထဲမှာ ဆိုင်ကယ် ၄၀၃ စီးဖမ်းဆီးမိပါတယ်။ လိုင်စင်ရှိက ၂၇၉ စီး၊ လိုင်စင်မဲ့က ၁၂၄ စီးဖမ်းမိပါတယ်။ ဖမ်းမိတာတွေကိုလည်းအရေးယူထားပါတယ်။ လိုင်စင်မရှိတဲ့ ဆိုင်ကယ်တွေဆိုရင် ပြည်သူပိုင် သိမ်းထားလိုက်ပါတယ်” ဟု ရန်ကုန်တိုင်းဒေသကြီး ယာဉ်စည်းကမ်း ထိန်းသိမ်းရေးကြီးကြပ်မှုကော်မတီမှ တာဝန်ရှိသူတစ်ဦးကပြောကြားခဲ့သည်။

ယာဉ်မတော်တဆဖြစ်မှုကြောင့် သေဆုံးသူ ဦးရေမှာ ဇန်န၀ါရီလတွင် ၂၇ ဦး၊ ဖေဖော်ဝါရီလတွင် ၃၁ ဦးနှင့် မတ်လတွင် ၃၆ ဦးရှိရာ တဖြည်းဖြည်းနှင့် မြှင့်တက် လာကြောင်းကို တွေ့ရသည်။