အာဆင်နယ် ချန်ပီယံ အိပ်မက်ပျက်ပြယ်ခြင်းမှာ ဒဏ်ရာရ ကစားသမားများကြောင့်ဟု အာတီတာဆို

ဧပြီ ၁၄။ ၂၀၁၄
M-Media

အာဆင်နယ်အသင်း ချန်ပီယံပြေးလမ်းကြောင်းမှ ဖယ်ပေးခဲ့ရခြင်းမှာ ဒဏ်ရာရ ကစားသမားများကြောင့်ဖြစ်သည်ဟု အာတီတာဆို

– အာဆင်နယ်အသင်း၏ ပရီးမီးယားလိဂ် ချန်ပီယံဖြစ်ရေးအိပ်မက် ပျက်ပြယ်ခဲ့ရခြင်းမှာ ကစားသမားများ ဒဏ်ရာ ရခြင်းကြောင့်ဖြစ်သည်ဟု အသင်း၏ ကွင်းလယ်လူ အာတီတာက ပြောကြားလိုက်သည်။

အာဆင်နယ်အသင်းမှာ ရာသီအစတွင် ပုံစံကောင်းများပြသခဲ့ပြီး ဇယားထိပ်ဆုံးတွင် အချိန်အတော်ကြာ ဦးဆောင်နိုင်ခဲ့သော်လည်း အသင်းရှိ အဓိက ကစားသမားများဖြစ်သည့် အာရွန်ရမ်ဆေး၊ အိုဇေးလ်၊ ဝေါလ်ကော့နှင့် ၀ီလ်ရှိုင်းယားတို့ ဒဏ်ရာကြောင့် အနားယူခဲ့ရပြီး အာဆင်နယ်အသင်းမှာလည်း အဆင့် ၅ နေရာသို့ ရောက်ရှိခဲ့ရကာ လာမည့်နှစ် ချန်ပီယံလိဂ်ဝင်ခွင့်အတွက် အဲဗာတန်အသင်းနှင့် အပြိုင်လုရတော့မည်ဖြစ်သည်။

“ပြီးခဲ့တဲ့ လေးပတ်အတွင်အမှာ အဖြစ်အပျက်တော်တော်များများ ဖြစ်ပွားခဲ့ပါတယ်။ ဒဏ်ရာရကစားသမား ၈ ဦးအထိရှိခဲ့တယ်။ အဲဒီအချိန်မှာ ပြိုင်ဘက်တွေက ကျွန်တော်တို့ထက် ရလဒ်တွေပိုကောင်းခဲ့ပါတယ်။ ဒါဟာ ဒီရာသီရဲ့ အရေးအကြီးဆုံးအချိန်မှာ ကျွန်တော်တို့ရဲ့ ယုံကြည်မှုကို ရိုက်ခတ်စေခဲ့တာပါပဲ” ဟု အာတီတာက Goal သို့ ပြောကြားခဲ့သည်။

ယမန်နေ့က ကစားခဲ့သည့် FA ဖလား ဆီးမီးဖိုင်နယ်ပွဲစဉ်တွင် အာဆင်နယ်အသင်းမှာ ၀ီဂန်အား ပင်နယ်တီ အဆုံးအဖြတ်ဖြင့် အနိုင်ရရှိကာ နောက်ဆုံးဗိုလ်လုပွဲသို့ တက်ရောက်နိုင်ခဲ့ပြီး ဗိုလ်စွဲနိုင်ခဲ့ပါက ၈ နှစ်ကြာ ဆုဖလား မိုးခေါင်မှုကို အဆုံးသတ်နိုင်မည်ဖြစ်သည်။