အစ္စရေး၏ တရားမ၀င် အိမ်ယာ ဆောက်လုပ်မှုများအား နောက်ဆုတ်ရန် အီးယူ တိုက်တွန်း

ဧပြီ ၁၉၊ ၂၀၁၄
M-Media

– အစ္စရေး-ပါလက်စတိုင်း ငြိမ်းချမ်းရေးဆွေးနွေးပွဲအား ယိုင်နဲ့စေသည့် ပါလက်စတိုင်းပိုင် အနောက်ဘက်ကမ်းခြေတွင် အိမ်ရာများတည်ဆောက်ရန် ကြေညာမှုများ ကဲ့သို့သော အစ္စရေး၏ လတ်တလောလုပ်ရပ်များအား နောက်ဆုတ်ရန် အီးယူ နိုင်ငံခြားရေးရာ အကြီးအကံ ကက်သရင်း အရ်ှတန်က တိုက်တွန်းလိုက်သည်။

ဘက်သလီဟမ်တောင်ဘက် Gush Etzion အနီးရှိ ဒေသအား အစ္စရေးပိုင်နယ်မြေအဖြစ်ကြေညာကာ၊ တောင်ဘက် ဟေဘရွန်မြို့တွင် ဂျူးအခြေချ အိမ်ရာများ ဆောက်လုပ်ရန် အစ္စရေး၏ ဆုံးဖြတ်ချက်အား အလွန်စိုးရိမ်မိကြောင်း ယမန်နေ့က ၎င်း၏ရုံးမှ ထုတ်ပြန်သောကြေညာချက်တွင် အရှက်တန် က ရေးသားဖော်ပြထားသည်။

ထို့ပြင် ပါလက်စတိုင်းတို့၏ နေအိမ်နှင့် ပိုင်ဆိုင်မှုများအား ဆက်လက်ဖျက်ဆီးဖြိုချခြင်းနှင့် အီးယူမှ ပေးပို့သည့် လူသားချင်းစာနာထောက်ထားမှုဆိုင်ရာ အကူအညီများအား ပြည်သူ့ဘဏ္ဍာအဖြစ် သိမ်းယူခြင်းတို့မှာလည်း စိုးရိမ်စရာပင်ဖြစ်သည်ဟု အရ်ှတန်က ထည့်သွင်းဖော်ပြခဲ့သည်။

ဂျေရုစလင်အနီး အနောက်ဘက်ကမ်းခြေရှိ အီးယူ၏ ငွေကြေးအကူအညီဖြင့် တည်ဆောက်ထားသော ကယ်ဆယ်ရေးအိမ်ရာအများအပြားအား အစ္စရေးက ဖြိုဖျက်ခဲ့သည်ဟု ယခုလအစောပိုင်း အီးယူမှ ထုတ်ပြန်သော အစီရင်ခံစာတွင် ဖော်ပြထားသည်။

Ref : Aljazeera