ဘယ်လမ်းကြောင်းနဲ့ သွားမလဲ မြန်မာမွတ်စလင်

ဧပြီ ၂၂၊ ၂၀၁၄
ရေးသူ- ဦးဦး မှော်ဆရာ

ခု ကျနော်ရေးတဲ့ အကြောင်းအရာက မြန်မာပြည်က ရိုဟင်ဂျာမဟုတ်တဲ့ ကျန်မွတ်ဆလင်တွေ အတွက်ပဲ ဖြစ်ပါတယ်။ ရိုဟင်ဂျာကိစ္စက International Issue ဖြစ်ပြီးသားဖြစ်လို့ သူတို့သွားနေတဲ့ လမ်းကြောင်းက သက်သက် ရှိပါလိမ့်မယ်။ အခြား မွတ်ဆလင်တွေကရော ရိုဟင်ဂျာတွေလို ခွဲခြားဖိနှိပ်မှုတွေ မခံရဘဲ ကျန်တဲ့ တိုင်းရင်းသား မျိုးနွယ်စုတွေနဲ့ တန်းတူ အခွင့်အရေးရနေသလား၊ ညီမျှတဲ့ ဂုဏ်သိက္ခာရှိနေ သလား .. ဒါကို စဉ်းစားရမယ်။

`တန်းတူရနေတယ်၊ ပျော်ပျော်ရွင်ရွင်ပဲ´ ဆိုရင်တော့ ကျနော်ရေးထား တာတွေ ဆက်ဖတ်ဖို့မလိုအပ်ပါဘူး။ ဒါမှမဟုတ် ကျနော်တို့မှာလည်း လိုအပ်ချက်တွေ ရှိနေတယ်၊ နိုင်ငံရေးအရ တိုက်ပွဲဝင်စရာတွေ ရှိနေတယ်´ ဆိုရင်တော့ ကျနော် တွေးမိတာတွေနဲ့ တူမလားလို့ ဆက်ဖတ်ကြည့်ပါ။

မြန်မာမွတ်ဆလင်တွေ ဘာတွေလိုအပ်နေလဲ

–       တန်းတူအခွင့်အရေးရစေဖို့

–       တူညီသော ဂုဏ်သိက္ခာ နဲ့ အသိအမှတ်ပြုမှုရစေဖို့

–       မသေချာ မရေရာမှုတွေ၊ သံသယတွေ လျော့နည်းစေဖို့

–       ငြိမ်းချမ်းစွာ အတူယှဉ်တွဲနေထိုင်နိုင်ဖို့

–       ကြောက်ရွံခြင်း နဲ့ မလုံခြုံမှုတွေကနေ လွတ်ကင်းစေဖို့

–       လွတ်လပ်စွာ ထုတ်ဖေါ်ပြောဆိုခွင့်ရဖို့

–       မြန်မာပြည်ရဲ့ တိုင်းရင်းသားမျိုးနွယ်စုထဲမှ တစ်စုအဖြစ် အသိအမှတ်ပြုစေဖို့

–       ပြည့်ဝတဲ့ နိုင်ငံသားအခွင့်အရေးတွေ ရရှိစေဖို့

–       အုပ်ချုပ်ရေးပိုင်းမှာလည်း သူများနည်းတူ ပါဝင်ဆောင်ရွက်နိုင်စေဖို့ (အဆင့်မြင့်

မွတ်ဝန်ထမ်း မခန့်ခြင်း)

–       တရားဥပဒေရဲ့ အကာအကွယ်ကို တန်းတူရရှိစေဖို့

–       အသက်အိုးအိမ်စည်းစိမ်တွေ လုယူဖျက်ဆီးခံလိုက်ကြရတဲ့ သူတွေကို ပြန်လည်ထူထောင်ပေးနိုင်ဖို့

–       သူတို့နေရာသူတို့ ပြန်ရစေဖို့ (သို့) ဒါနဲ့ တန်ဖိုးချင်းညီမျှတဲ့ အစားပြန်ရစေဖို့

–       ဖျက်ဆီးခံလိုက်ရတဲ့ သာသနိကအဆောက်အအုံတွေ ပြန်ဆောက်ခွင့်ရစေဖို့

–       စိတ်ဒဏ်ရာတွေ ကုစားနိုင်ဖို့

–       မိမိတို့ရဲ့ ရိုးရာယဉ်ကျေးမှု ဓလေ့ထုံးတမ်းတွေကို ထိန်းသိမ်းဆောင်ရွက်နိုင်ဖို့

–       ဘာသာရေးလွတ်လပ်ခွင့် ရရှိစေဖို့

ဒါတွေက ခင်ဗျားတို့လိုအပ်လိမ့်မယ်လို့ ထင်တာတွေကို အကြမ်းဖျင်း ချရေးကြည့်တာပါ။ ဒီလောက် အများကြီးထဲက issue တူတာတွေကို ခေါင်းစဉ် တစ်ခုတည်း အောက်မှာ ထည့်ပြီး ချုံ့လိုက်ရင် အကြောင်းအရာ နည်းသွားလိမ့်မယ်။ ပြီးမှ ဘာကို ဦးစားပေးရမလဲဆိုတာ ရွေးချယ်ရပါမယ်။ အခြား တိုင်းရင်းသားများနဲ့ `တန်းတူအခွင့်အရေး ရဖို့´ ဆိုတဲ့အချက်ကို ကျနော် ဆွဲထုတ်ကြည့်ပါမယ်။ ကျန်တာတွေထဲမှာ ဒီအချက်ကနေ ဆက်စပ်ရရှိလာနိုင်တာတွေ ရှိသလို၊ တပြိုင်နက်လုပ်ဆောင် ရမှာတွေလည်း ရှိပါတယ်။

အရေးကြီးတဲ့ တချက်ပြောဖို့ ကျန်ပါသေးတယ်။ ဒါက ဒီလိုလုပ်ဆောင်တဲ့နေရာမှာ ပါဝင်နေတဲ့ Actors တွေပါပဲ။ ဒါတွေဟာ မြန်မာပြည်က မွတ်ဆလင်တွေရဲ့ လိုအပ်ချက်တွေအတွက် လုပ်ဆောင်တာ ဆိုပေမဲ့ ပေးရမှာက မြန်မာအစိုးရ၊ ကြည်ကြည့်ဖြူဖြူ  ရှိရမှာက ကျန် လူများစုတိုင်းရင်းသားတွေ ..။

တခြားနည်းလမ်း မရှိဘူး။ ဒီတော့ ကိုယ့်ကိစ္စမှာ ကိုယ်တယောက်တည်းနဲ့ မပြီးဘူး။ ကျန်တဲ့ actors တွေရဲ့ အနေအထားကိုလည်း ကြည့်ရမယ်။ ကိုယ့်ကိုယ်ကို မြင်တဲ့ အမြင်နဲ့ မပြီးဘူး။ ကိုယ့်ကို သူတို့ဘက်က ဘယ်လိုမြင်သလဲဆိုတာ ထည့်တွက်ရမယ်။ ကိုယ်က သူတို့ကို ဘယ်လိုမြင်တယ်ဆိုတာနဲ့ မပြီးဘူး။ သူတို့ကိုယ် သူတို့ ဘယ်လိုမြင်တယ်ဆိုတာ ကိုယ်က သူတို့နေရာ ၀င်ပြီးကြည့်ရလိမ့်မယ်။ ဒါမှ ကိုယ်သွားချင်တဲ့နေရာအတွက် လမ်းကြောင်းတစ်ခု ရှာလို့ရလိမ့်မယ်။ (ဒီအကြောင်းအရာတွေကို အကျယ်မရှင်းတော့ဘူး)

ခု ကျနော် ရွေးလိုက်တဲ့ `တန်းတူအခွင့်အရေး´ဆိုတာနဲ့ ပတ်သက်ပြီး ဆက်ပြောမယ်။ မြန်မာပြည်မှာ ဘယ်တိုင်းရင်းသားမှ ပြည့်ဝတဲ့ အခွင့်အရေး မရဘူးဆိုတာ အမှန်ပဲ။ ဒါပေမဲ့ အစ္စလာမ်ဘာသာ ကိုးကွယ်သူဖြစ်ရင် အခွင့်အရေးအပြင် ဂုဏ်သိက္ခာပါ ဆုံးရှုံးသွားတယ်။ တခြားတိုင်းရင်းသားတွေက မြန်မာအစိုးရရဲ့ ဖိနှိပ်မှုကိုသာ ခံစားရတာဖြစ်ပေမဲ့ ၊ ခင်ဗျားတို့က အစိုးရအပြင် သူလိုကိုယ်လို သာမာန် လူတွေရဲ့ အနိုင်ကျင့် စော်ကားမှုတွေကိုပါ ခံလာကြရပြီ။ published media တွေရဲ့ victims တွေ ဘ၀ရောက်နေကြရပြီ။ ကိုယ့်အနေအထားကို ကိုယ် သိဖို့ အရေးကြီးတယ်။ တကယ်တော့ ဒါတွေဟာ နောက်ပိုင်း နှစ် ၄၀ – ၅၀ အတွင်းမှာ တဖြေးဖြေး ဆုံးရှုံးသွားတာပါ။ အရင်တုန်းကတော့ တန်းတူ အခွင့်အရေး ရခဲ့တယ်လို့ ပြောလို့ရပါတယ်။

လက်ရှိအနေအထားကို စဉ်းစားရင် တန်းတူအခွင့်အရေးရဖို့ဆိုတာက မြန်မာပြည်မှာ အပြည့်အ၀ နိုင်ငံသားဖြစ်ဖို့ အရင်ဆုံးလိုပါတယ်။ တခါထပ်ပြီးတွေးကြည့်ရင် လက်ရှိ ၁၉၈၂ နိုင်ငံသား ဥပဒေအရ အပြည့်အ၀နိုင်ငံသား ဖြစ်ဖို့ဆိုရင် တိုင်းရင်းသားစာရင်းမှာ ပါကို ပါရပါလိမ့်မယ်။ ဒီတော့ ကိုယ်သွားရမဲ့နေရာတခုကို စ, ရွေးလို့ရပြီ ထင်ပါတယ်။

ဒီလို မြန်မာပြည်မှာ ရှေးအစဉ်အဆက်နေထိုင်လာခဲ့တဲ့ မျိုးနွယ်စုတွေထဲမှာ ကိုယ်တွေလည်းပါဝင်ကြောင်း ပြဖို့ရာ ဘယ်ပုံ ဘယ်နည်းနဲ့ စချဉ်းကပ်မလဲ။ ခင်ဗျားသာ တဘက်လူဖြစ်ရင် ဘယ်လို အနေအထားမျိုးက ခင်ဗျားအနေနဲ့ ငြင်းဆန်ဖို့ အခက်တွေ့စေမလဲ။ ဒါ အရေးကြီးပါတယ်။ ခင်ဗျားတို့ ရွေးမဲ့ လမ်းကြောင်းကပဲ ခင်ဗျားတို့ကို ပိုလွယ်ကူစေနိုင်သလို၊ ပိုလည်းခက်ခဲသွားစေနိုင်ပါတယ်။ ကျနော့် အမြင်ကိုပြောရရင် ခုမှ အစပဲရှိပါသေးတယ်။ မြန်မာပြည်က မွတ်ဆလင်တွေ အားလုံးကို လွမ်းခြုံနိုင်မဲ့၊ အစိုးရမှတ်တမ်းတွေမှာလည်း ခိုင်ခိုင်မာမာရှိတဲ့ လူမျိုးတမျိုးအမည်နဲ့ စတင်လိုက်တာ အကောင်းဆုံးပါပဲ။

ဒါက နိုင်ငံရေးပါ။ ခင်ဗျားတို့ စိတ်ပါရင် မိသားစုတစ်စုတည်းရဲ့ မျိုးဆက်တွေကနေ လူမျိုးတမျိုးဖြစ်အောင် လုပ်ချင်ရင်တောင် ကိုယ့်ဟာကိုယ် သတ်မှတ်လို့ရပါတယ်။ ဒါကတော့ လူမှုရေးသက်သက်ပါ။

နိုင်ငံရေးအရ တောင်းဆိုရာမှာ ဘာမှ မှတ်တမ်းမှတ်ရာမရှိတဲ့ အနေအထားတွေနဲ့ တောင်းဆိုဖို့ မဖြစ်နိုင်ပါဘူး။ ဒီတော့ ကျနော့်တဦးတည်း အမြင်အရ လူအများစု တယောက်တပေါက် လုပ်ချင်ရာလုပ်ပြီး ကိုယ်သွားချင်တဲ့နေရာနဲ့ ဝေးသွားတာမျိုးထက်စာရင် လူအများစုတစည်းတလုံးတည်း အမည်တစ်ခုအောက်မှာ လုပ်ကိုင်ကြတာကို အားပေးပါတယ်။ ဒီမှာ တစ်ခုပြောလိုတာက ဒီလိုလုပ်ဆောင်တာဟာ ၂၀၁၄ သန်းခေါင်စာရင်းမှာ အသိအမှတ်ပြု ခံရယုံတစ်ခုတည်းနဲ့ပြေလည်အောင် ရှင်းနိုင်မှာမဟုတ်သလို၊ နေ့ချင်းညချင်း ပြေလည်သွားနိုင်တဲ့ ကိစ္စတွေလည်း မဟုတ်ဘူးဆိုတာပါ။ ခင်ဗျားတို့ အလုပ်တွေ အများကြီး လုပ်ရပါဦးမယ်။ ခင်ဗျားတို့အရေးကို ခင်ဗျားတို့ကိုယ်တိုင်လမ်းကြောင်း တစ်ခုချပြီး စ, မလုပ်ရင် ဘယ်သူကမှ လာကူညီနိုင်မှာ မဟုတ်ပါဘူး။ ချထားတဲ့ လမ်းကြောင်း မှန်ဖို့လည်း လိုအပ်ပါတယ်။

နိဂုံးချုပ်အနေနဲ့ ပြောချင်တာက အများအကျိုးအတွက်လို့ ဘယ်လိုပဲပြောပြော၊ လူအများစုနဲ့ သက်ဆိုင်တဲ့ကိစ္စတွေကို ဆောင်ရွက်ရာမှာ အောက်ခြေထိ လူတွေနားလည် လက်ခံလာအောင် ဦးဆောင်သူတွေက ရှင်းပြနိုင်ရမှာဖြစ်သလို၊ ကျန်သူတွေကလည်း လူအများစုရဲ့ အခွင့်အရေးအတွက် ဦးတည်လှုပ်ရှားနေတဲ့ ကိစ္စမှာ ကိုယ်က လက်မခံနိုင်ရင်လည်း ဘာကြောင့် လက်မခံနိုင်လဲဆိုတဲ့ ခိုင်မာတဲ့ အကြောင်းရင်းကို ချပြနိုင်ရမှာဖြစ်သလို၊ ဒီကိစ္စကို တခြားဘယ်လို လုပ်ဆောင်နိုင်မလဲဆိုတဲ့ ( alternative ways ) ကို ချပြနိုင်ရပါလိမ့်မယ်။ ဒါမှလည်း ဒီထက်ပိုကောင်းတဲ့ အတွေးအမြင်တွေနဲ့  ကိုယ့်အခွင့်အရေးကို တောင်းဆိုရာမှာ ပိုမို ထိရောက်တဲ့ လမ်းကြောင်းကို ရွေးချယ်နိုင်ပါလိမ့်မယ်။

ဗိုက်ဆာနေတဲ့သူ နှစ်ယောက်ပေါင်းရင် ဗိုက်ပို မဆာနိုင်ပေမဲ့ ၊ အတွေးအမြင်ရှိသူ နှစ်ဦးပေါင်းရင် ပိုကောင်းတဲ့ အိုင်ဒီယာတွေရလာနိုင်ပါကြောင်း ..

(အတတ်နိုင်ဆုံး အတိုချုံးရေးထားတာဖြစ်လို့ မရှင်းတာရှိရင် ကွန်မန့်ကနေ ဆက်ဆွေးနွေးလို့ ရပါတယ်)

ဦးဦး မှော်ဆရာ
(၁-၁၁-၂၀၁၃)

မှတ်ချက်- ၂၀၁၃ခုနှစ် နိုဝင်ဘာတွင် ဦးဦးမှော်ဆရာ ရေးသားထားသည့် ပိုစ်ဖြစ်ပါသည်။ ဆောင်းပါးရှင်က ဝင်ရောက်ဆွေးနွေးဖို့ ဖိတ်ခေါ်ထားပါတယ်။ မူရင်းပိုစ်မှာ သွားရောက်ပြီး ကော်မန့်ရေးသား ဆွေးနွေးနိုင်ပါတယ်။
Link=>http://goo.gl/vlpJIU