သတင်းစာဆရာကြီး ဟံသာဝတီဦးဝင်းတင်၏ ဈာပနအခမ်းအနား အလွန်စည်ကားခဲ့

ဧပြီ ၂၃၊ ၂၀၁၄
M-Media
လမင်း

ရန်ကုန်  ။       ။       ဟံသာဝတီသတင်းစာဆရာကြီး ဦးဝင်းတင်၏ ဈာပနအခမ်းအနားကို ရန်ကုန်မြို့ ရေဝေးသုသာန်တွင် NLD အဖွဲ့ဝင်များ၊ အခြားနိုင်ငံရေး ပါတီများ၊ စာပေ အနုပညာအသိုင်းအ၀ိုင်းမှပုဂ္ဂိုလ်များ၊ ဆရာကြီးအား ချစ်ခင်လေးစားကြည်ညိုလှသော ပြည်သူအများက ဆရာကြီးအား နောက်ဆုံးအနေဖြင့် သွားရောက်ဂါရ၀ပြုခဲ့ကြပါသည်။

ဆရာကြီး၏နောက်ဆုံးခရီးကို ယုဒသာန်ခန်းမမှ ရေဝေးသုသာန်သို့ ကားအစီး ၁၀၀ ကျော်ဖြင့် လိုက်ပါပို့ဆောင်မည့်သူများကို ပို့ဆောင်ပေးခဲ့ပြီး ဆရာကြီး၏ ဈာပနကိုဂုဏ်ပြုသည့်အနေဖြင့် နိုင်ငံရေးအကျဉ်းသားများနှင့် ဆရာကြီးဦးဝင်းတင်၏တပည့်များက မြောက်ဥက္ကလာအ၀ိုင်းမှ ရေဝေးသုသာန်ထိ လမ်းလျှောက် ဂါရ၀ပြုခဲ့ကြကြောင်းလည်း သိရသည်။

ရေဝေးသုသာန်သို့ကားများမထွက်ခွာမီ ယုဒသာန်တွင်ကျင်းပနေသော အောက်မေ့ဖွယ်အခမ်းအနားတွင် ၈၈ မျိုးဆက်ခေါင်းဆောင်တစ်ဦးဖြစ်တဲ့ ကိုမင်းကိုနိုင်က “ဆရာကြီးရဲ့ဈာပနာဟာ နိုင်ငံတော်ဈာပနာမဖြစ်ပေမဲ့ ပြည်သူ့ဈာပနာဖြစ်ခဲ့တယ်” လို့ပြောကြားခဲ့ပါသည်။

ဆရာကြီး၏ အောက်မေ့ဖွယ်အခမ်းအနားကို မြန်မာနိုင်ငံရှိအနယ်နယ်အရပ်ရပ်မှ ပြည်သူများလာရောက်ခဲ့ကြပြီး လူဦးရေ အလွန်များပြားလွန်းသောကြောင့် လည်းကောင်း၊ ရာသီဥတုပူလွန်းသောကြောင့်လည်းကောင်း လာရောက်သူအချို့မှာလည်း မူးမေ့လဲသူများရှိခဲ့ပြီး နာရေးကုညီမှုအသင်းမှအပြင်သို့ ခေါ်ဆောင် သွားခဲ့ရကြောင်း သိရသည်။

ဆရာကြီးဦးဝင်းတင်သည် ၂၀၁၄ ဧပြီလ ၂၁ ရက်နေ့ နံနက် ၆ နာရီခွဲတွင် ရန်ကုန်ပြည်သူ့ဆေးရုံကြီး၌ ကွယ်လွန်ခဲ့ခြင်းဖြစ်ပြီး ဆရာကြီး၏ဂါရ၀ပြုအခမ်းအနားကို ယုဒသာန်တွင် ၂၁ ၊၂၂ ရက်နှင့် ၂၃ ရက်နေ့လည် ၁၂ နာရီအထိထားရှိကာ ဆရာကြီးကိုချစ်သော ပုဂ္ဂိုလ်များလာရောက်ဂါရ၀ပြုခဲ့ကြပြီး ၂၃ ရက်နေ့ ညနေ ၅ နာရီ တွင် ဂူသွင်းသင်္ဂြိုဟ်ခြင်းကို ပြုလုပ်ခဲ့သည်။