နှစ်ဆတိုး၍ မကျိုးလိုလျှင် ….. (သူ့အမြင်)

ဧပြီ ၂၈၊ ၂၀၁၄
M-Media
“ဥတ္တရဆူး ” ရေးသားတင်ပြသည်။

ဂုဏ်သိက္ခာရှိစွာနဲ့တောင်းပန်ခြင်းက မေတ္တာနဲ့ကရုဏာကို အစားပြန်ရစေပါတယ်။ ဒုတိယကမ္ဘာစစ်ကာလမှာ ဖက်ဆစ်ဂျပန်တွေရဲ့ လက်သံပြောင်မှုကို ကောင်းကောင်းကြားဖူးကြမှာပါ။

အဲ့ဒီခေတ်ကိုမှီခဲ့တဲ့ ဘိုးသက်ရှည် ဘွားသက်ရှည်များရဲ့ ပြန်လည်လက်ဆင့်ကမ်းမှုကိုလည်း ဖတ်ဖူးကြမှာပါ။

နောက်တစ်ဖက်မှာ ဂျာမဏီက နာဇီဟစ်တလာကိုလည်း တစ်ကမ္ဘာလုံးက မုန်းတီးခဲ့ကြတယ်။ ဖက်ဆစ်တွေနဲ့ နာဇီတွေအပေါ် ကမ္ဘာ့လူသားတွေထားရှိတဲ့ အမုန်းတရားက မကွာခြားလှပါဘူး။ သို့သော် မဟာမိတ်တပ်များက ဟီရိုရှီးမားကို အနုမြူဗုံးကြဲချလိုက်တာနဲ့ ဖက်ဆစ်တွေရဲ့ လည်ဂုတ်ကို တိကနဲဖြတ်တောက်လိုက်သလိုဖြစ်ပြီး တစ်ခါတည်း ပွဲသိမ်းသွားခဲ့တယ်။ နောက်ထပ် ၂ လုံး ၃ လုံးသာ ထပ်ကြဲချလိုက်လို့ကတော့ ကမ္ဘာမှာ ဂျပန်လူမျုိုးဆိုတာကို မနည်းရှာယူရတော့မယ့်အထိ မျိုးပြုတ်သွားနိုင်တယ်။ ကြောက်စရာအဖြစ်ဆိုးကိုတွေ့ရတော့ တစ်ကမ္ဘာလုံး မှင်သက်ကုန်တယ်။ ဒါပေမယ့် မုန်းတီးခြင်းကတော့ ရှိနေဆဲ။

ဂျပန်နည်းတူ ဂျာမဏီလည်း ပြားပြားဝပ်သွားလို့ ဒုတိယကမ္ဘာစစ်မီး ငြိမ်းသွားခဲ့တယ်။

ဒီနှစ်နိုင်ငံမှာ ဂျပန်က ပိုပြီး အမှတ်ရသွားတယ်။ ပိုတော်တယ်လို့ ပြောရမယ်။ ဒီဖြစ်ရပ်ဆိုးအပြီး စစ်ရှုံးခြင်းနဲ့အတူ မရှေးမနှောင်းမှာပဲ ဂျပန်က ကမ္ဘာကို သိက္ခာရှိရှိ တောင်းပန်ဝန်ချမှု ပြုလုပ်ခဲ့တယ်။ တန်ပြန်အကျိုးကျေးဇူးအဖြစ် ကမ္ဘာ့မေတ္တာနဲ့ ကရုဏာကို ရရှိခံစားသွားခဲ့တယ်။ ကမ္ဘာ့လူသားတွေရဲ့ စာနာဖေးမမှုကို ဂျပန်က ခပ်ယူသွားနိုင်ခဲ့တယ်။ ပြာပုံဘ၀ရောက်ပြီး ဦးကျိုးသွားတဲ့ ဂျပန်နိုင်ငံဟာ ဆယ်စုနှစ်အနည်းငယ်အတွင်း ကမ္ဘာကို ခါးစောင်းတင်လို့ ပြန်လည်ဝင်ဆန့်သွားနိုင်ခဲ့တာ ဒီနေ့ထက်ထိပါပဲ။ (နောက်ပိုင်းတော့ ဂျာမဏီလည်း ၀န်ချတောင်းပန်ခဲ့ပါတယ်)။

ဖက်ဆစ်ဂျပန်နဲ့ နာဇီဂျာမန်တွေဟာ လူမျိုးကြီးဝါဒ ထိပ်တန်းတင်ခြင်း၊ ရက်စက်ကြမ်းကြုတ်ခြင်းမှာ ထပ်တူထပ်မျှဖြစ်တယ်။ သို့သော် ဂျပန်က အမြန်ဆန်ဆုံး မာန်ချနိုင်ခဲ့တဲ့အတွက် – မကောင်းသောစံနစ်ကို ချက်ခြင်းစွန့်နိုင်ခဲ့တဲ့အတွက် ဂုဏ်သိက္ခာကို ပြန်လည် အဖတ်ဆယ်နိုင်သွားတာ အထင်အရှားပါပဲ။

ဒုတိယကမ္ဘာစစ်ကာလ အတွင်း စံနစ်တစ်ခုချင်းစီနဲ့ ကမ္ဘာ့တစ်ခြမ်းစီကို ထိုးဖောက်စိုးမိုးလုမတတ်အခြေအနေ ရောက်ခဲ့တဲ့ မဟာအင်အားကြီးနိုင်ငံတွေပင်လျှင် အချိန်တန်လို့ ကျရှုံးတဲ့အခါ ဦးကျိုးမာန်ချ တောင်းပန်ခယမှု ပြုခဲ့ကြရတယ်။

လက်ရှိကျွန်တော်တို့နိုင်ငံမှာ ဖက်ဆစ်တစ်ပိုင်း နာဇီတစ်ပိုင်း ပေါင်းစပ်စံနစ်တစ်ခု လွှမ်းမိုးလာနေတယ်။ ဒါ့အပြင် တစ်ချိန်က အထက်ဖော်ပြပါနိုင်ငံတွေရဲ့ ကမ္ဘာ့ကိုင်လှုပ်မှုနဲ့ နှိုင်းစာရင် ခြေဖျားတောင်မှီမယ် မထင်ပါဘူး။ နိုင်ငံပြင်ပမှာ အမြီးပင်လျှင် ဖြောင့်တန်းအောင် မထောင်နိုင်သေးပါဘူး။ လက်တစ်ဆုပ်စာအင်အားလေးနဲ့ ကမ္ဘာ့အသံကိုအံတုလို့ မာန်ဖီကောင်းနေတုန်း။ တကယ်လို့များ ကျရှုံးခန်းရောက်ခဲ့ရင်တော့ ၀ မရှိဘဲ ၀ိ လုပ်ခဲ့တဲ့အတွက် မိမိရှေ့က နမူနာတွေထက်ပိုပြီး နှစ်ဆတိုး တောင်းပန်ရပါတော့မယ်။ ပြည်သူပြည်သားတွေလည်း နှစ်ဆတိုးလို့ မျက်နှာငယ်ရမယ်။ တိုင်းပြည့်ဒေါက်တိုင်တွေလည်း နှစ်ဆတိုးပြီး ကျိုးသွားနိုင်ပါတယ်။ နှစ်ဆတိုး မောက်မာထားသူများကလည်း နှစ်ဆတိုးလို့ ခံစားကြရမှာ အမှန်ပါ။ ဒါကြောင့်မို့ နှစ်ဆတိုးလို့ မတောင်းပန်လိုရင် မကောင်းတဲ့စံနစ်လမ်းကြောင်းကို ကြိုကြိုတင်တင် နှစ်ဆတိုးပြီး ချေဖျက်ဖို့ အချိန်တန်အခါသင့်နေပြီဖြစ်ကြောင်း သုံးသပ်တင်ပြလိုက်ရပါတယ်။