ဖိလစ်ပိုင်နှင့် အမေရိကန်တို့ ကာကွယ်ရေးဆိုင်ရာ သဘောတူစာချုပ်ချူပ် အမေရိကန်စစ်သားများ ပိုမိုချထားခွင့်ရမည်

ဧပြီ ၂၉ ၊ ၂၀၁၄
M-Media

ဖိလစ်ပိုင် နိုင်ငံအတွင်း အမေရိကန်၏ စစ်အင်အား ပိုမိုချထားမည့် စစ်တပ်ဆိုင်ရာ သဘောတူညီချက် စာချုပ်တစ်ခုကို အမေရိကန်နှင့် ဖိလစ်ပိုင်တို့က လက်မှတ်ရေးထိုးခဲ့ကြသည်ဟု သိရသည်။

အိုဘားမား၏ အာရှခရီးစဉ်တွင်း ဖိလစ်ပိုင်နိုင်ငံသို့ မလာရောက်မီ နာရီပိုင်းအလိုက ဖိလစ်ပိုင် ကာကွယ်ရေးဝန်ကြီး ဗော်လတိုင်းယား ဂက်ဇ်မင်နှင့် ဖိလစ်ပိုင်ဆိုင်ရာအမေရိကန် သံအမတ်ကြီး ဖီးလစ် ဂိုးလ်ဘာ့ဂ်ျတို့ ဖိလစ်ပိုင်နိုင်ငံအတွင်း အမေရိကန်စစ်သားများ ပိုမိုချထားရေး သဘောတူညီချက်အား လက်မှတ်ထိုးခဲ့ကြခြင်းဖြစ်သည်။

ထိုသဘောတူညီချက်က နှစ်နိုင်ငံအကြား မဟာဗျူဟာကြသည့် ခိုင်မာသော မိတ်ဖက်နိုင်ငံအဖြစ် အသိအမှတ်ပြုမှုဖြစ်သည်ဟု ဖိလစ်ပိုင်အစိုးရက ဆိုသည်။ အမျိုးသားရေးဝါဒီများက ဆန့်ကျင်နေပြီး ဖိလစ်ပိုင်၏ ၁၉၈၇ အခြေခံဥပဒေကလည်း ခွင့်ပြုခြင်းမရှိသောကြောင့် ထိုသေဘာတူညီချက်တွင် အမေရိကန် စစ်စခန်းများ ပြန်လည်ဖွင့်လှစ်ရန် မပါဝင်ဟု ဂိုးလ်ဘာ့ဂ်ျက ဆိုသည်။

သို့သော်လည်း ထိုသဘောတူညီချက်အရ အမေရိကန်စစ်သားများမှာ ဖိလစ်ပိုင်နိုင်ငံတစ်ဝှမ်းရှိ ဖိလစ်ပိုင် စစ်စခန်းများအတွင်းသို့ ၀င်ထွက် သွားလာခွင့်ရမည်ဖြစ်သည်။

နိုင်ငံခြားရေးရာ ဖိလစ်ပိုင်ဆီးနိတ်ကော်မတီ ဥက္ကဌ မီရီယမ် ဒီဖန်ဆာ ဆန်တီယာဂိုကလည်း ယခုကဲ့သို့ သဘောတူညီချက်စာချုပ် ချုပ်ဆိုနိုင်ခြင်းက ဖိလစ်ပိုင်နိုင်ငံအတွက် အကျိုးကျေးဇူးနည်းငယ်ရရှိပြီး အမေရိကန်အတွက် ပို၍ အကျိုးဖြစ်ထွန်းစေသည်ဟု ဆိုသည်။

ထို့ပြင် ဖိလစ်ပိုင်အပါအ၀င် ပတ်ဝန်းကျင်နိုင်ငံများက အမေရိနကန်နှင့် သဘောတူစာချုပ်များ ချုပ်ဆိုနိုင်ခဲ့ခြင်းကြောင့် အမေရိကန်မှာ တရုတ်အား ၀ိုင်းထားနိုင်ပြီဟု ၎င်းက ထပ်လောင်းပြောကြားခဲ့သည်။ ဖိလစ်ပိုင်နိုင်ငံမှာ တောင်တရုတ်ပင်လယ်အတွင်းရှိ ကျွန်းတစ်ကျွန်း ပိုင်ဆိုင်မှုအတွက် တရုတ်နိုင်ငံနှင့် အချင်းများနေရသည်။

aljazeera