၂၀၁၄ ခုနှစ်အကုန်တွင် တရုတ်စီးပွားရေး အမေရိကန်ကို ကျော်လွှားနိုင်ဖွယ်ရှိ

ဧပြီ ၃၀၊ ၂၀၁၄
M-Media
ရဲဝင်း

၂၁ ရာစုနှစ်အတွင်း တဟုန်ထိုး တိုးတက်လာနေတဲ့ တရုတ်နိုင်ငံစီးပွားရေးဟာ ကမ္ဘာ့စီးပွားရေး အင်အားအကြီးဆုံးနိုင်ငံဖြစ်တဲ့ အမေရိကန်နိုင်ငံကို ၂၀၁၄ ခုနှစ်အကုန်မှာ ကျော်တက် သွားလိမ့်မယ်လို့ နောက်ဆုံးထွက်ပေါ်လာတဲ့ စာရင်းအင်း တွက်ချက်မှုတွေအရ သိရပါတယ်။

အမေရိကန်နိုင်ငံဟာ ကမ္ဘာ့စီးပွားရေးမှာ ရှေ့ပြေးနိုင်ငံအဖြစ် ဦးဆောင်နေခဲ့ပြီး ၁၈၇၂ ခုနှစ်ကတည်းက အင်္ဂလန် နိုင်ငံကို ကျော်တက်ခဲ့ပါတယ်။ ၂၀၀၅ ခုနှစ် တွက်ချက်မှုတွေအရ တရုတ်စီးပွားရေးဟာ ၂၀၁၉ ခုနှစ်မှာ အမေရိကန်နိုင်ငံထက် ပိုမို ကြီးထွားသွားလိမ့်မယ်လို့ ဘောဂဗေဒပညာရှင်တွေက တွက်ချက်ထား ခဲ့ပေမယ့် ယခုနှစ် ဧပြီလ ၂၉ ရက်နေ့ထုတ်  International Comparison Program (ICP) ရဲ့ အစီရင်ခံစာမှာတော့ ယခင်တွက်ချက်ထားတာထက် တရုတ်စီးပွားရေးက ပိုမိုအားကောင်းနေတယ်လို့ ဖော်ပြထားပါတယ်။

ကမ္ဘာ့ဘဏ်က ကြီးမှူးတဲ့ International Comparison Program (ICP) ဟာ ကမ္ဘာ့နိုင်ငံ ၁၉၉ နိုင်ငံရဲ့ စီးပွားရေး ပမာဏကို နှိုင်းယှဉ် တိုင်းတာရာမှာ နိုင်ငံတွေရဲ့ ငွေကြေးအရ ဝယ်ယူနိုင်စွမ်း ကွာခြားမှုညွှန်းကိန်း Purchasing Power Parity (PPP) ကိုနှိုင်းယှဉ်တွက်ချက်ပါတယ်။ ကုန်စည်နဲ့ ဝန်ဆောင်မှု ဝယ်ယူနိုင်စွမ်းတွေ အပေါ်မှာအခြေခံတဲ့ ပြည်တွင်းအသားတင် စုစုပေါင်းထုတ်ကုန်တန်ဖိုး (GDP) တွေ ကို နှိုင်းယှဉ်တဲ့နည်း ကိုအသုံးပြုပြီး နိုင်ငံတွေရဲ့ စီးပွားရေး ပမာဏတွေကို နှိုင်းယှဉ်တိုင်းတာတဲ့ နည်းလမ်းဖြစ်ပါတယ်။

ယင်းတွက်ချက်မှုတွေအရ ၂၀၀၅ ခုနှစ်မှာ တရုတ်နိုင်ငံစီးပွားရေးဟာ အမေရိကန်နိုင်ငံစီးပွားရေးရဲ့ ၄၃ ရာခိုင်နှုန်းသာ ရှိခဲ့ပေမယ့် ၂၀၁၁ ခုနှစ်မှာ ၈၇ ရာခိုင်နှုန်း ရှိနေပြီဖြစ်ပါတယ်။ ၂၀၁၁ ခုနှစ်မှာ အမေရိကန်က ရှေ့ပြေးနေပြီး တရုတ်နဲ့ အိန္ဒိယ စီးပွားရေးတွေက ဒုတိယနဲ့ တတိယ စီးပွားရေးအကြီးဆုံးနိုင်ငံတွေ အဖြစ် နေရာယူထားပါတယ်။

၂၀၁၁ ခုနှစ်နဲ့ ၂၀၁၄ ခုနှစ်အကြားမှာ တရုတ်စီးပွားရေးဟာ ၂၄ ရာခိုင်နှုန်းတိုးလာမှာဖြစ်ပြီး အမေရိကန်ကတော့ ၇.၆ ရာခိုင်နှုန်းသာ တိုးလာ လိမ့်မယ်လို့ နိုင်ငံတကာငွေကြေး ရန်ပုံငွေ အဖွဲ့ (IMF) က ခန့်မှန်းထားတဲ့တွက် ၂၀၁၄ ခုနှစ်အကုန်မှာတရုတ် စီးပွားရေးက အမေရိကန်ကို ကျော်တက်ပြီး ကမ္ဘာ့စီးပွားရေးအကြီးဆုံးနိုင်ငံဖြစ်လာပါလိမ့်မယ်လို့ ခန့်မှန်းနေကြပါတယ်။ အိန္ဒိယ နိုင်ငံစီးပွားရေးကလည်း ၂၀၀၅ ခုနှစ်မှာ ဒဿမ နေရာမှာရှိနေခဲ့ပေမယ့် ၂၀၀၅ မှ ၂၀၁၁ ခုနှစ် ကြားကာလအတွင်း နှစ်ဆနီးပါး တိုးမြင့်လာခဲ့တဲ့ အတွက် ယခုအခါ တတိယ နေရာကို ရောက်ရှိလာခဲ့ပါတယ်။

ကမ္ဘာ့လူဦးရေ ၁၇ ရာခိုင်နှုန်းသာရှိတဲ့ အချမ်းသာဆုံးနိုင်ငံတွေဟာ ကမ္ဘာ့ GDP ၅၀ ရာခိုင်နှုန်းပိုင်ဆိုင်တဲ့နိုင်ငံတွေဖြစ်နေပေမယ့် ဖွံ့ဖြိုးဆဲနိုင်ငံတွေရဲ့ စီးပွားရေးကလည်း တိုးမြင့်လာတဲ့အတွက် ကမ္ဘာပေါ်မှာ ဆင်ရဲ-ချမ်းသာ ကွာခြားမှုနှုန်း လျော့ကျလာနေပါတယ်။

ယင်းအစီရင်ခံစာမှာ လူနေမှုစရိတ် အမြင့်ဆုံးနိုင်ငံတွေ အဖြစ်  ဆွဇ္ဇလန်၊ နော်ဝေ၊ ဘာမူတ၊ သြစတေးလျနဲ့ ဒိန်းမတ် နိုင်ငံတွေဖြစ်ပြီး လူနေမှုစရိတ် အသက်သာဆုံးနိုင်ငံတွေ အဖြစ် အီဂျစ်၊ ပါကစ္စတန်၊ မြန်မာ၊ အီသီယိုပီးယားနဲ့ လာအို နိုင်ငံ တို့ဖြစ်တယ်လို့လည်း ဖော်ပြထားပါတယ်။