ဘောလုံး ဂျာနယ်လစ်များအဖွဲ့ FWA မှ ချီးမြှင့်သော အကောင်းဆုံး ကစားသမားဆုကို ဆွာရက်ဇ် ဆွတ်ခူး

မေ ၆ ၊ ၂၀၁၄
M-Media

– ပရီးမီးယားလိဂ် ချန်ပီယံဖြစ်ရေး ရေပန်းစားနေသည့် လီဗာပူးလ်အသင်း တိုက်စစ်မှူး လူးဝစ်ဆွာရက်ဇ်မှာ ဘောလုံးဂျာနယ်လစ်များ အဖွဲ့ FWA က မဲပေးရွေးချယ်သည့် တစ်နှစ်တာ အကောင်းဆုံး ဘောလုံးသမားဆုကို ဆွတ်ခူးရရှိခဲ့သည်ဟု သိရသည်။

မဲပေးသူ ၅၂ ရာခိုင်နှုန်းက ဆွာရက်ဇ်အား မဲပေးခဲ့ကြပြီး အသင်းဖေါ် စတီဗင်ဂျရတ်နှင့် မန်စီးတီး အသင်း၏ အဓိက ကွင်းလယ်လူ ယာယာတိုးယေးတို့က ဒုတိယနှင့် တတိယ အသီးသီး ရရှိခဲ့ကြသည်။

“ဆွာရက်ဇ်ပါတဲ့ ပွဲတစ်ပွဲမှာ အတူကစားခွင့်ရတဲ့ ကစားသမားတွေက ဆွာရက်ဇ်ဟာ သိပ်ကို အံသြစရာကောင်းတဲ့ ကစားသမားဆိုတာ ၀န်ခံခဲ့ကြပါတယ်။ (ဆွာရက်ဇ်ရဲ့) မရပ်မနားကြိုးစား အားထုတ်မှုနဲ့ အများနဲ့မတူတဲ့ နိုးကြားမှုတွေက ခုခံ ကာကွယ်လို့မရတဲ့ ပေါင်းစပ်မှု စွမ်းအားကို ဖြစ်စေပါတယ်။ ဖန်တီးနိုင်စွမ်းနဲ့ ရဲတင်းတဲ့ အဆုံးသတ်မှုတွေကို ပေါင်းထည့်မယ်ဆိုရင်တော့၊ တကယ့်ကို စိတ်လှုပ်ရှားစရာကောင်းတဲ့ ကစားသမားမျိုးဆိုတာ ခင်ဗျားတွေ့ရမှာပါ။ လူးဝစ်ဟာ ကျွန်တော်တို့ ပေးတဲ့ဆုကိုရတဲ့ ထူခြားတဲ့ ကစားသမား စာရင်းတွေထဲမှာ ပါဝင်လာတဲ့ ပြောင်မြောက်တဲ့ ကစားသမားတစ်ဦးပါ” ဟု FWA ဥက္ကဌ အန်ဒီဒန်က ပြောကြားခဲ့သည်။

ပရီးမီးယားလိဂ် ပထမဆုံး ၅ ပွဲအား ပွဲပယ်ပြစ်ဒဏ်ကြောင့် မပါဝင်နိုင့်ခဲ့သော်လည်း ဆွာရက်ဇက်မှာ ဂိုး ၃၀ သွင်းယူထားနိုင်ပြီး ပရီးမီးယားလိဂ် ဂိုးအများဆုံး စာရင်းတွင် ဦးဆောင်နေသည်။ ထို့ကြောင့် ပရီးမီးယားလိဂ် ၃၈ ပွဲတွင် ဂိုးအများဆုံးအဖြစ် ၃၁ ဂိုးသွင်းယူထားနိုင်သည့် ရော်နယ်ဒိုနှင့် အလန်ရှီးယားတို့၏ စံချိန်ကို ချိုးဖျက်ရန် ၂ ဂိုးသာလိုတော့သည်။