ဟိုင်းလတ်ယာဉ်လိုင်းများ မြို့ထဲဝင်ရောက်မှုကို ယာဉ်ထိန်းရဲများမှ ထိရောက်စွာဖမ်းဆီးလျက်ရှိ

မေ ၁၁၊ ၂၀၁၄
M-Media
လမင်း

ရန်ကုန်   ။      ။     ရန်ကုန်မြို့စည်ပင်သာယာနယ်နမိတ်အတွင်း ဟိုင်းလတ်ယာဉ်များ ပြေးဆွဲခွင့်ကို တိုင်းဒေသကြီးအစိုးရမှ ကန့်သတ်တားမြစ်ခဲ့ပြီး ထိုကန့်သတ် ထားသော ဟိုင်းလတ်ယာဉ်များမြို့ထဲသို့ဝင်ရောက်ပြေးဆွဲနေခြင်းကို ရန်ကုန်တိုင်း ယာဉ်ထိန်းရဲတပ်ဖွဲ့ရုံးက မေလ ၁-ရက်နေ့မှ စတင်၍ ထိရောက်စွာဖမ်းဆီးလျက် ရှိကြောင်း သိရသည်။

“ကျွန်တော်တို့တွေ နေ့မှာ မြို့ပြင်က၀င်လာနိုင်တဲ့နေရာ လမ်းဆုံတွေဖြစ်တဲ့ နေရာ ၇ နေရာ၊ ညမှာ ၃ နေရာ မှာစောင့်ပြီး ၀င်လာတဲ့ကားတွေကို ဖမ်းဆီးတာမျိုးတွေကို ပြုလုပ်ပါတယ်။ အခုလောလောဆယ်တော့ ၀င်လာရင် ချလံဖြတ်ပေးပြီး ပြီးသွားပေမဲ့ နောက်ဆိုရင်တော့ ထိရောက်စွာအရေးယူမှာဖြစ်ပါတယ်။ တချို့တွေကလည်း မြို့ထဲကို ဂတ်စ်ဖြည့်မယ်ဆိုပြီး လူတွေတင်ပြီးသွားကြတယ်။ အဲဒါမျိုးတွေကိုလည်း လိုက်ပြီးတော့ဖမ်းဆီးနေပါတယ်” ဟု ရန်ကုန်တိုင်း ယာဉ်ထိန်းရဲတပ်ဖွဲ့ရုံးမှ ဒုရဲမှူး ဦးလင်းထွဋ် ပြောခဲ့သည်။

ယခုကဲ့သို့ ဟိုင်းလတ်ကားများကို ကန့်သတ်ပိတ်ပင်ရခြင်းမှာ ဟိုင်းလတ်ယာဉ်များသည် ပြည်သူလူထုကိုအန္တရယ်ဖြစ်စေနိုင်သောကြောင့် ပြည်သူ့အကျိုးအတွက် ပိတ်ပင်ရခြင်းဖြစ်ကြောင်း၊ ဟိုင်းလတ်ယာဉ်များအစား မီနီဘတ်စ်များတင်သွင်ခြင်းကြောင့် ပြည်သူကို လုံခြုံစေခြင်းတို့ကြောင့် ဟိုင်းလတ်ယာဉ်များ ကန့်သတ် လိုက်ရခြင်းအကြောင်းကို ၎င်းကထပ်လောင်းပြောကြားခဲ့သည်။

စည်ပင်သာယာနယ်နမိတ်အတွင်း “ခ” လိုင်စင် ခရီးသည်တင်ဆောင်သည့် ယာဉ်များကိုသာ ကန့်သတ်ထားခြင်းဖြစ်ပြီး ၎င်း “ခ”ယာဉ်များသည် “က” လိုင်စင် ကုန်ပစ္စည်း သယ်ဆောင်သည့်လိုင်စင်ကို ပြောင်းလဲပါက စည်ပင်သာယာနယ်နမိတ်အတွင်းသွားလာနိုင်ကြောင်းကို မ.ထ.သ (ဗဟို)မှ ဥက္ကဌ ဦးလှအောင်က ပြောကြားခဲ့သည်။

မေလ ၁ ရက်နေ့ပိတ်သိမ်းသည့်အချိန်မှစတင်ကာ မေလ ၁၀ ရက်နေ့ထိ စည်ပင်သာယာနယ်နမိတ်အတွင်း ပြေးဆွဲသည့် ယာဉ်များကို ရန်ကုန်တိုင်း ယာဉ်ထိန်း ရဲတပ်ဖွဲ့ရုံးမှ ၃၇၆ စီးကိုအရေးယူဆောင်ရွက်ပြီးလျက်ရှိကြောင်းကို ရန်ကုန်တိုင်း ယာဉ်ထိန်းရဲတပ်ဖွဲ့ရုံးမှ စာရင်းများအရ သိရသည်။