ခွဲထွက်ရေးအတွက် ယူကရိန်းအရှေ့ပိုင်း ပြည်သူဆန္ဒခံယူပွဲ  ရလဒ်အား အသိအမှတ် ပြုမည်မဟုတ်ဟု အမေရိကန် သတိပေး

မေ ၁၁၊ ၂၀၁၄
M-Media

– ယူကရိန်းနိုင်ငံ အရှေ့ပိုင်းဒေသများ ယူကရိန်းမှ ခွဲထွက်ကာ လွတ်လပ်သော သမ္မတနိုင်ငံထူထောင်ရေးအတွက် ရုရှားလိုလားသူ ခွဲထွက်ရေးသမားများက ပြုလုပ်သည့် ပြည်သူ့ဆန္ဒခံယူပွဲကို ယနေ့တွင် စတင်ခဲ့သည်ဟု သိရသည်။

မြို့ပေါင်း တစ်ဒါဇင်ကျော်အား လက်နက်ကိုင်များက သိမ်းပိုက်ထားသည့် Donetsk နှင့် Lugansk ပြည်နယ်များတွင် ပြုလုပ်သည့် အဆိုပါ ပြည်သူဆန္ဒခံယူပွဲမှာ ယူကရိန်းနိုင်ငံအတွင်း နိုင်ငံရေး ပြဿနာကို ပို၍ နက်ရှိုင်းစေခြင်းလည်းဖြစ်သည်။

ယူကရိန်းနိုင်ငံအရှေ့ပိုင်းဒေသများ လွတ်လပ်သော သမ္မနိုင်ငံထူးထောင်ရေးအတွက် ပြည်သူများ၏ ထောက်ခံမှုကို ရုရှားက အသိအမှတ်ပြုမည်ဖြစ်သော်လည်း ၂ ပတ်ကြာ ပြုလုပ်မည့် ယူကရိန်း သမ္မတရွေးကောက်ပွဲကို ဆိုးရွားစွာ ထိခိုက်စေမည်ဖြစ်သည်။

အမေရိကန်အစိုးရ ပြောရေးဆိုခွင့်ရှိသူ ဂျန်ဆာကီက ခွဲထွက်ရေးသမားများ၏ အဆိုပါ ပြည်သူ့ဆန္ဒခံယူပွဲမှာ ယူကရိန်းဥပဒေအရ တရားမ၀င်ဘဲ နိုင်ငံ အစိတ်စိတ် အမွှာမွှာဖြစ်ရေးနှင့် ဖရိုဖရဲဖြစ်မှုအတွက် ကြိုးပမ်းမှုသာဖြစ်ကြောင်း၊ နိုင်ငံတကာဥပဒေကို ချိုးဖောက်ခြင်းဖြစ်ပြီး အမေရိကန်ကလည်း ထိုပြည်သူ့ ဆန္ဒခံယူပွဲရလဒ်ကို အသိအမှတ်ပြုမည်မဟုတ်ကြောင်း ယမန်နေ့က ထုတ်ပြန်သော ကြေညာချက်တွင်ဖော်ပြထားသည်။

ယူကရိန်းနိုင်ငံ တည်ငြိမ်ရေးအတွက် ယူကရိန်းရွေးကောက်ပွဲသာလျှင် အရေးပါသည်ဟု အမေရိကန်နှင့် ဥရောပတို့က ရှုမြင်နေကြသည်။

Ref : Aljazeera