ဆီးရီးယားဆိုင်ရာ ကုလ-အာရပ်လိဂ် ညှိနှိုင်းရေးမှူး ရာထူးမှနှုတ်ထွက်

မေ ၁၅၊ ၂၀၁၄
M-Media

– လာမည့်ဇွန်လတွင် ရွေးကောက်ပွဲပြုလုပ်ရန် ဆီးရီးယားသမ္မတ အာဆတ်၏ အစီအစဉ်ကို စိတ်ပျက်သည့်အတွက် ဆီးရီးယားဆိုင်ရာ ကုလ-အာရပ်လိဂ်အဖွဲ့ အထူးကိုယ်စားလှယ် လခ်ဒါ ဘရာဟီမီမှာ ရာထူးမှနှုတ်ထွက်ကြောင်း ကြေညာ ခဲ့သည်ဟု သိရသည်။

ထိုနှုတ်ထွက်မှုမှာ မေလ ၃၁ ရက်နေ့မှ စတင်ကာ သက်ရောက်မည်ဖြစ်ကြောင်း ကုလအတွင်းရေးမှူးချုပ် ဘန်ကီမွန်က နယူးယောက်တွင် ယမန်နေ့ကပြုလုပ်သည့် ပူးတွဲ သတင်းစာရှင်းလင်းပွဲ၌ပြောကြားခဲ့သည်။ ဘရာဟီမီကမူ ဆီရီးယားပြည်သူများအား မကူညီနိုင်ခဲ့သည့် အတွက် တောင်းပန်ကြောင်း၊ ဆီးရီးယားပြည်သူ အများစု လိုချင်နေသည့် တည်ငြိမ်အေးချမ်းမှုမှာ သေချာပေါက် ရရှိလိမ့်မည်ဖြစ်ကြောင်း ပြောကြားခဲ့သည်။

အာဆတ်အစိုးရနှင့် အတိုက်အခံတို့၏ ဂျီနီဗာ ငြိမ်းရေးဆွေးနွေးမှုကို ဘရာဟီမီက ၂ ကြိမ်တိုင်တိုင် စီစဉ်ပေးခဲ့သော်လည်း တိကျသည့် အဖြေထွက်လာခဲ့ခြင်း မရှိချေ။ ဆွေးနွေးမှုမှတစ်ဆင့် အပစ်ရပ်ရေး၊ ရင်ကြားစေ့ရေးနှင့် နိုင်ငံရေးပြောင်းလဲမှုများကို ဆက်လက်ဆောင်ရွက် ချင်သော်လည်း ဇွန်လ ၂၁ ရက်နေ့တွင် ရွေးကောက်ပွဲ ကျင်းပမည်ဟု အာဆတ်၏ ကြေညာချက်က ဘရာဟီမီ၏ အားထုတ်မှုကို အချည်းအနှီးဖြစ်စေခဲ့သည်။

ဘရာဟီမီမှာ ရာထူးမှနှုတ်ထွက်ချင်ကြောင်း လွန်ခဲ့သည့် တစ်နှစ်ကျော်ကတည်းက လူသိရှင်ကြား ပြောဆိုထားခဲ့သည်။ ၃ နှစ်ကျော်လာပြီဖြစ်သည့် ဆီးရီးယားပြည်တွင်းစစ် အတွင်း လူပေါင်း တစ်သိန်းခွဲကျော်သေဆုံးခဲ့ပြီး ၉ သန်းခန့်မှာ အိုးအိမ်စွန့်ခွာ ထွက်ပြေးနေရသည်။