ယင်းလပ် အပါအ၀င် ဖမ်းဆီးထားသည့် ထိုင်းနိုင်ငံရေးသမားများအား ထိုင်းစစ်တပ်ပြန်လွှတ်ပေး

မေ ၂၈ ၊ ၂၀၁၄
M-Media

– စစ်တပ်မှ အာဏာသိမ်းပြီးနောက်ပိုင်း စစ်တန်းလျားတွင် ထိန်းသိမ်းခြင်းခံခဲ့ရသည့် ထိုင်းဝန်ကြီးချုပ်ဟောင်း ယင်းလပ်ရှင် နာဝပ်ထရာမှာ ယနေ့တွင် ပြန်လည် လွတ်မြောက်လာသည်ဟု သိရသည်။

ယင်းလပ်အပြင် အစိုးရလိုလားသူ ရှပ်နီခေါင်းဆောင်များဖြစ်ကြသည့် Chatuporn Prompand၊ Nattavut Saikua၊ Verakant Musikapong၊ Weng နှင့်Tida Tojirakarn တို့ကိုလည်း စစ်တပ်က သတင်းထောက်များရှေ့တွင် လွှတ်ပေးခဲ့ပြီး ၎င်းတို့ကမူ ထိန်းသိမ်းခံရခြင်းနှင့်ပတ်သက်၍ မည်သည့် မှတ်ချက်မှ မပေးခဲ့ချေ။

ပြီးခဲ့သည့်တစ်ပတ် ကြာသာပတေးနေ့က အာဏာသိမ်းပြီးနောက် ထိုင်းစစ်တပ်မှာ ယင်းလပ်အပါဝင် ယခင်အစိုးရအရာရှိဟောင်းများနှင့် နိုင်ငံရေးသမားဟောင်း ၂ဝဝ ကျော်အား ထိန်းသိမ်းခဲ့ပြီး ယခုအခါ ၁ဝဝ ကျော် ပြန်လွှတ်ပေးခဲ့ပြီဖြစ်သည်။ စစ်တပ်မှ ပြောရေးဆိုခွင့်ရှိသူ ဗိုလ်မှူးကြီး Winthai Suvaree  ကမူ ထိန်းသိမ်းခံခဲ့ရသူအားလုံး စစ်တပ်က ကောင်းမွန်စွာ ဆက်ဆံခဲ့သည်ဟု ပြောကြားခဲ့သည်။

ထိုင်းစစ်တပ်မှာ ထိုင်းနိုင်ငံရေးလှုပ်ရှားမှုများအား ဂရုတစိုက် စောင့်ကြည့်နေသည်ဟု သတင်းများ ထွက်ပေါ်နေပြီး အင်တာနက် အသုံးပြုမှုအပါအ၀င် ကန့်သတ်မှုများလည်း ရှိနေသည်ဟု လေ့လာသူများက ဆိုသည်။

Ref: ဆင်ဟွာ