အာရှပစိဖိတ်ဒေသ အမေရိကန်၏ ရပ်တည်ချက်မှာ ဗိုလ်ကျမှုသာဖြစ်သည်ဟု တရုတ်ဆို

ဇွန် ၁ ၊ ၂၀၁၄
M-Media

– အာရှပစိဖိတ်ဒေသရှိ အငြင်းပွားမှုများတွင် အမေရိကန်၏ ရပ်တည်ချက်က ဗိုလ်ကျစိုးမိုးမှု၊ ခြိမ်းခြောက်မှုဖြင့် ပြည့်နှက်နေသည်ဟု တရုတ် စစ်တပ်မှ အကြီးတန်း အရာရှိ ၀မ် ဂွမ်ဇွန်းက ယနေ့တွင် ပြောကြားလိုက်သည်။

စင်ကာပူနိုင်ငံတွင် ပြုလုပ်သည့် Shangri-La Dialouge တွင် မိန့်ခွန်းပြောကြားပြီးနောက် သတင်းထောက်များအား ထိုကဲ့သို့ ပြောကြားခဲ့ခြင်းဖြစ်သည်။

ထိုမှတ်ချက်မှာ အမေရိကန် ကာကွယ်ရေး ၀န်ကြီး ချက်ဟေဂယ်က ဒေသတွင်းနှင့် နိုင်ငံတကာ အမိန့်ကို နိုင်ငံများက စိန်ခေါ်ရန်ကြိုးစားသည့်အခါ အမေရိကန်မှာ အခြားနည်းလမ်းကို ရှာဖွေမည် မဟုတ် (စစ်တိုက်မည်)ဟု ပြောကြားမှုကို တုန့်ပြန်ပြောဆိုခြင်းလည်းဖြစ်သည်။

ဟေဂယ်၏ အဆိုပါပြောစကားက အာရှပစိဖိတ်ဒေသအတွင်း ပြဿနာများဖြစ်ပွားရန် ရည်ရွယ်ခြင်းဖြစ်ပြီး တရုတ်နိုင်ငံအနေဖြင့် မဟာမိတ် တပ်များ စစ်ရေးလေ့ကျင့်မှုကို ဆန့်ကျင်သည်ဟု ဂွမ်ဇွန်းက ထည့်သွင်းပြောကြားခဲ့သည်။ ဟေဂယ်က တောင်တရုတ်ပင်လယ်အတွင်း တရုတ်နိုင်ငံ၏ နယ်မြေ ပိုင်ဆိုင်ကြောင်း ပြောဆိုမှုမှာ ဒေသအတွင်း မတည်မငြိမ်ဖြစ်စေပြီး အာရှ၏ နှစ်ရှည်တိုးတက်မှုကိုလည်း ခြိမ်းခြောက်နေခြင်းဖြစ်သည်ဟု ပြောဆိုခဲ့သည်။

တရုတ်သမ္မတ ဇီဂျင်ပင်းကမူ တရုတ်အနေဖြင့် ရန်စသော လုပ်ရပ်ကို လုပ်မည်မဟုတ်ဘဲ အခြားနိုင်ငံများက ပြုလုပ်လျှင်လည်း တရုတ်နိုင်ငံက ပြန်လည် တုံ့ပြန်သွားမည်ဟု သောကြာနေ့က ပြောကြားခဲ့သည်။

ref:aljazeera