၂၀၂၂ ကမ္ဘာ့ဖလား အိမ်ရှင်ရွေးချယ်မှု အရှုပ်တော်ပုံတွင် ပါဝင်သည်ဆိုသော သတင်း ပလာတီနီငြင်း

ဇွန် ၄ ၊ ၂၀၁၄
M-Media

– ၂၀၂၂ ခုနှစ် ကမ္ဘာ့ဖလားအိမ်ရှင်အဖြစ် ကာတာနိုင်ငံအား ရွေးချယ်မှုအတွက် မသမာမှုများတွင် ပါဝင်ပတ်သက်သည်ဆိုသည့် သတင်းကို ယူအီးအက်ဖ်အေ ဥက္ကဌ ပလာတီနီက ငြင်းဆိုလိုက်သည်။

ကာတာနိုင်ငံမှ ပြိုင်ပွဲကျင်းပခွင့်ရရန် လာဘ်ထိုးခဲ့သည့်ဟု သတင်းများ ထွက်ပေါ်နေသည့် အာရှဘောလုံးအဖွဲ့ချုပ် ဥက္ကဌဟောင်း ကာတာနိုင်ငံသား ဘင် ဟန်မန်းနှင့် ပလာတီနီတို့မှာ လျှို့ဝှက်တွေ့ဆုံခဲ့ကြပြီး၊ ကတာတာနိုင်ငံအတွက် လော်ဘီလုပ်ပေးရန် ထိုတွေ့ဆုံမှုအတွင်း ပလာတီနီက သဘောတူခဲ့သည်ဟု Daily Telegraph သတင်းစာက ဖော်ပြခဲ့သည်။

သို့သော်လည်း ပလာတီနီကမူ ထိုသတင်းမှာ မဟုတ်မှန်ကြောင်း ငြင်းဆိုခဲ့သည်။

“ကျွန်တော်ရဲ့ ပုံရိပ်ကို စွန်းထင်းစေဖို့ ရည်ရွယ်တဲ့ အခြေအမြစ်မရှိတဲ့ ဒီလို ကောလဟာလတွေ ပျံနှံ့တာကို ကျွန်တော်ကတော့ မအံ့သြပါဘူး။ ဒါပေမယ့် ဖီဖာအမှုဆောင်ကော်မတီအဖွဲ့ဝင်တွေ စကားစမြည်ပြောတာကို ပူးပေါင်းကြံစည်မှုအဖြစ် ပြောင်းလိုက်တာကိုတော့ အံ့သြမိပါတယ်။ ကျွန်တော်တို့ဟာ ၂၀၀၂ ခုနှစ်ကတည်းက အမှုဆောင်ကော်မတီဝင်တွေ ဖြစ်တာကြောင့်၂၀၁၀ မှာပြုလုပ်ခဲ့တဲ့ အခမ်းအနားတွေမှာ ဘန် ဟန်မန်းနဲ့ ကျွန်တော်တွေ့ဆုံခဲ့တာကတော့ အမှန်ပါပဲ” ဟု ပလာတီနီက AFP သတင်းဌာနသို့ ပြောကြားခဲ့သည်။

ဘင် ဟန်မန်းလာဘ်ထိုးခဲ့သည်ဆိုသည့် သတင်းအတွက် ဖီဖာက စုံစမ်းစစ်ဆေးမှုများ ပြုလုပ်မည်ဖြစ်ပြီး ဟုတ်မှန်ကြောင်း တွေ့ရှိခဲ့ရပါက ၂၀၂၂ ကမ္ဘာ့ဖလားအိမ်ရှင်အား ပြန်လည်ရွေးချယ်သွားဖွယ်ရှိနေသည်။