အစ္စလာမ်ဘာသာဝင်များကို စော်ကားသည့် မှတ်ချက် အတွက် အိုင်ယာလန် ဝန်ကြီးချူပ် လူသိရှင်ကြားတောင်းပန်

ဇွန် ၄ ၊ ၂၀၁၄
M-Media

– မြောက်အိုင်ယာလန် ၀န်ကြီးချုပ် ပီတာရော်ဘင်ဆင်မှာ မြို့တော် ဘဲလ်ဖတ်စ်ရှိ အစ္စလာမ့်စင်တာသို့ ယမန်နေ့က သွားရောက်လည်ပတ်ခဲ့ပြီး အစ္စလာမ် ဘာသာဝင်များနှင့် ပတ်သက်၍ ၎င်းပေးခဲ့သော မှတ်ချက်အတွက် လူသိရှင်ကြား ပြန်လည်တောင်းပန်ခဲ့သည်ဟု သိရသည်။

“ဘဲလ်ဖတ်စ် အစ္စလာမ့်စင်တာက ကျွန်တော့်ရဲ့လည်ပတ်မှုကို ကြိုဆိုခဲ့ပါတယ်။ ပြီးတော့ မိတ်ဆွေပီသမှုနဲ့ လေးစားမှုတွေကိုလည်း ကျွန်တော်ရရှိခဲ့ပါတယ်။ ဒီကိုလာရတဲ့ အကြောင်းအရင်းကတော့ အစ္စလာမ့် လူ့အဖွဲ့စည်းဟာ မြောက်အိုင်ယာလန် လူ့အဖွဲ့အစည်းအတွက် အရေးပါပြီး တန်ဖိုးလည်းရှိတယ်ဆိုတာကို ရှင်းလင်းအောင် လုပ်ချင်လို့ပါ” ဟု ရော်ဘင်ဆင်က မွတ်စလင်ခေါင်းဆောင်များနှင့် တွေ့ဆုံပြီးနောက် ပြောကြားခဲ့သည်ဟု Blefast Telegraph သတင်းစာက ဖော်ပြခဲ့သည်။

လွန်ခဲ့သော ၁၀ ရက်ခန့်က ဘဲလ်ဖတ်စ်မြောက်ပိုင်းမှ ခရစ်ယာန် သင်းအုပ်ဆရာ ဂျိမ်း မက်ကော်နယ်လ်မှာ ၎င်း၏ အစည်းအဝေးတစ်ခု၌ ဗြိတိန်တစ်ဝှမ်းတွင် မွတ်စလင် အခွင့်အရေးဟူသော အနိဌာရုံအသစ် ပေါ်ပေါက်နေသည်ဟု ပြောကြားခဲ့သည်။

DUP ပါတီမှ ၀န်ကြီးချုပ် ရော်ဘင်ဆင်က Irish News သတင်းစာနှင့် အင်တာဗျူးတွင် မက်ကော်နယ်လ်၏ ထိုပြောကြားမှုကို ထောက်ခံသည့် မှတ်ချက်မျိုး ပေးခဲ့သည်။ ထိုမှတ်ချက်ကြောင့် နိုင်ငံတစ်ဝှမ်း ဝေဖန်မှုများ ပေါ်ပေါက်လာခဲ့ပြီးနောက် ရော်ဘင်ဆင်မှာ ပြီးခဲ့သည့် ကြာသာပတေးနေ့က ဘဲလ်ဖတ်စ် အစ္စလာမ့် စင်တာသို့သွား၍ မွတ်စလင်ခေါင်းဆောင်များနှင့် တွေ့ဆုံကာ တောင်းပန်ခဲ့သည်။

သို့သော်လည်း အိုင်ယာလန်ပြည်သူများက စနေနေ့တွင် လူမျိုးရေး ခွဲခြားမှုဆန့်ကျင်ရေး ဆန္ဒပြမှုများကို ပြုလုပ်ခဲ့ကြပြီး ရော်ဘင်ဆင်အနေဖြင့် လူသိရှင်ကြား တောင်းပန်ရန် တောင်းဆိုခဲ့ကြသည်။

“ကျွန်တော့်ဘက်က စိတ်ဆိုးအောင်လုပ်ခဲ့တဲ့ အတွက် တောင်းပန်ပါတယ်လို့ ဒီမှာရှိတဲ့လူတွေအားလုံးကို ရှင်းရှင်းလင်းလင်းပြောခဲ့ပါမယ်။ ကျွန်တော့်စိတ်ထဲမှာ ရှိတဲ့ အရာလေးက တစ်ယောက်ယောက်ကို ထိခိုက်စေတယ်၊ ပူပင်သောကရောက်စေတယ် ဒါမှမဟုတ် စော်ကားသလိုဖြစ်တယ်ဆိုရင် ဖြစ်နိုင်တဲ့ ပုံစံတွေနဲ့ လူသိရှင်ကြား ရှင်းခဲ့ပါ့မယ်” ဟု ယမန်နေ့က ဘဲလ်ဖတ်စ်အစ္စလာမ့်စင်တာသို့ လာရောက်ခဲ့သည့် ရော်ဘင်ဆင်က လူသိရှင်ကြား တောင်းပန်ခဲ့သည်။

အဆိုပါ အစ္စလာမ့်စင်တာတွင် ၁ နာရီခန့် လည်ပတ်ခဲ့သည့် ရော်ဘင်ဆင်မှာ စင်တာက ၎င်းအား နွေးထွေးစွာ ကြိုဆိုမှုအတွက်လည်း ချီးကျူးခဲ့ပြီး အနာဂတ်တွင် ညီညွတ်သော လူ့အဖွဲ့အစည်းတစ်ခု ထူထောင်သွားရန် မျှော်လင့်ကြောင်း ပြောကြားခဲ့သည်။

အိုင်ယာလန်နိုင်ငံတွင် လူဦးရေ ၄.၅ သန်းရှိပြီး ၁.၁ ရာခိုင်နှုန်းမှာ အစ္စလာမ်ဘာသာဝင်များဖြစ်ကြသည်။

Ref: OnIslam & Newspapers