တူရကီနှင့် ပူးပေါင်းပြီး အကြမ်းဖက်ဝါဒတွန်းလှန်သွားမည်ဟု အီရန်သမ္မတ ပြော

ဇွန်လ ၉ ရက်၊ ၂၀၁၄
M-Media

– အစ္စလာမ်ကမ္ဘာတွင် တူရကီနှင့် အီရန်တို့မှာ အရေးပါသောနိုင်ငံများဖြစ်ပြီး အရှေ့အလယ်ပိုင်းတွင် အကြမ်းဖက်မှုနှင့် အစွန်းရောက်ဝါဒအား တွန်းလှန်ရန် မိမိတို့ နှစ်နိုင်ငံက ဆုံးဖြတ်ထားသည်ဟု တူရကီသို့ အလည်အပတ်ရောက်ရှိနေသည့် အီရန် သမ္မတ ရူဟာနီက ပြောကြားလိုက်သည်။

၂ ရက်တာကြာမြင့်သည့် အဆိုပါလည်ပတ်မှုအတွင်း နိုင်ငံရေး၊ စီးပွားရေးနှင့် ယဉ်ကျေးမှုဆိုင်ရာ နှစ်နိုင်ငံ ဆက်ဆံရေးကို ဆွေးနွေးခဲ့ကြသည်ဟု ရူဟာနီနှင့် တူရကီသမ္မတ အဘ်ဒူလာ ဂူလ်တို့ ပူးတွဲထုတ်ပြန်သော ကြေညာချက်တွင်ဖော်ပြထားသည်။ ထို့ပြင် ၎င်းတို့နှစ်နိုင်ငံ ဆက်ဆံရေးကို အေးခဲစေသည့် ဆီးရီးယား ပြဿနာကိုလည်း ဆွေးနွေးခဲ့ကြသည်။

နှစ်နိုင်ငံကုန်သွယ်ရေးပမာဏမှာ ကန်ဒေါ်လာ ၁၅ ဘီလီယံရှိပြီး ၃၀ ဘီလီယံအထိ တိုးလာရန် ပစ်မှတ်ထားနေသည်ဟု အဘ်ဒူလာဂူလ်က ပြောကြားခဲ့သည်။ ထို့ပြင် အရှေ့အလယ်ပိုင်းဒေသအတွင်း နျူကလီးယားစွမ်းအင်ကို ငြိမ်းချမ်းသော ရည်ရွယ်ချက်ဖြင့် အသုံးပြုခြင်းကို ထောက်ခံပြီး ဒေသတွင်း မည်သည့်နိုင်ငံမှ နျူလက်နက် ပိုင်ဆိုင်ရန် မသင့်ဟု ၎င်းက ထည့်သွင်း ပြောကြားခဲ့သည်။

ရူဟာနီကလည်း ထိုပြောကြားချက်ကို ထောက်ခံခဲ့ပြီး ဒေသတွင်း တည်ငြိမ်ရေးအတွက် ဆောင်ရွက်ရန် နိုင်ငံအားလုံးကို တိုက်တွန်းခဲ့သည်။ အီရန်မှာ ဆယ်စုနှစ် တစ်ခုအကြာ ကြာမြင့်နေသည့် နျူပြဿနာအား အဆုံးသတ်နိုင်ရန် အင်အားကြီး ၆ နိုင်ငံနှင့် နောက်ဆုံးအဆင့် ဆွေးနွေးမှုများကို မကြာမီ ပြုလုပ်သွားရန်ရှိနေသည်။

Ref:  Al Jazeera and agencies