ဂီတဖြင့် အလှူငွေ ရှာပြီး လက်လုပ်လက်စား ပြည်သူများ အလှူငွေများ စုပေါင်းကာ ကချင်စစ်ဘေး ဒုက္ခသည်များကို လှူဒါန်းခဲ့

ဇွန် ၁၇၊ ၂၀၁၄
M-Media
လမင်း

ရန်ကုန် ။       ။      ကချင်ပြည်နယ် ရှမ်းပြည်နယ်မြောက်ပိုင်းရှိ စစ်ဘေး ဒုက္ခသည်များကို လွတ်လပ်ငြိမ်းချမ်းပန်းရဲ့လမ်း လူမှုကွန်ရက်အသင်း၊ ရွှေသံစဉ် ဂီတ ဖောင်ဒေးရှင်း နှင့် The Action Times Foundation တို့မှ ပူးပေါင်းပြီး ဂီတဖြင့်ဖျော်ဖြေကာ အလှူငွေရှာပြီး သွားရောက် လှူဒါန်းခဲ့ကြရာ လမ်းတစ်လျှောက်တွင် လက်လုပ်လက်စားပြည်သူများ၏ အလှူငွေများဖြင့် ကချင်စစ်ဘေး ဒုက္ခသည်များကို သွားရောက်လှူဒါန်းခဲ့ခြင်းဖြစ်သည်ဟု ဟု The Action Times Foundation မှအတွင်းရေးမှူး မအိန္ဒြာနေနွယ် ကဆိုသည်။

ကချင်ပြည်နယ် အတွင်းရှိ ဒုက္ခသည်စခန်းများကို ၎င်းအဖွဲ့သုံးဖွဲ့ပူးပေါင်းပြီး ဇွန်လ ၁ရက်နေ့မှစတင်ကာ ရန်ကုန်မြို့ အောင်မင်္ဂလာအဝေးပြေးဝင်းတွင် ဂီတဖြင့် ဖျော်ဖြေ အလှူခံပြီး မန္တလေးမြို့၊ ပြင်ဦးလွင်၊ နောင်ချို၊ ကျောက်မဲ၊ သီပေါ၊ လားရှိုး၊ ကွတ်ခိုင်၊ မူဆယ် စသည့်မြို့များတွင် ဖျော်ဖြေခဲ့ကြပြီး ကချင်ဒုက္ခသည် စခန်းများကို အလှူငွေများသွားရောက်လှူဒါန်းခဲ့ခြင်းဖြစ်ကြောင်း သိရသည်။

အရင်က ရှိုးပွဲတွေမှာပဲ သီချင်းဆိုနေရာကနေ လမ်းဘေးမှာဆိုပြီး အလှူငွေရှာရမယ်ဆိုတော့ ရှက်ခဲ့မိကြောင်း သို့သော်လည်း ဒုက္ခသည်စခန်းကလူတွေအတွက် မိမိတတ်နိုင်တဲ့ဘက်ကနေကူညီဆောင်ရွက်ပေးမယ်ဆိုပြီး စိတ်အားထက်သန်စွာဖြင့် ကူညီသီဆိုပေးခဲ့ခြင်းဖြစ်သည်ဟု ရွှေသံစဉ် ဂီတဖောင်ဒေးရှင်းမှ ကချင် အဆိုတော် Mဆိုင်းလာတို့က ၎င်းအစီအစဉ်တွင် ပါဝင်ဖြစ်ခဲ့ကြောင်း ပြောသည်။

၎င်းအဖွဲ့ သုံးဖွဲ့ပေါင်းပြီး ခရီးစဉ်တစ်လျှောက်တွင် ရွှေစင်စင်္ကြာ ကားဂိတ်ပိုင်ရှင်နှင့် ရန်ကုန် နာရေးကူညီမှုအသင်းတို့မှလည်း လှူဒါန်းခဲ့ကြပြီး ငွေသား၊ ဆေးဝါး၊ အသုံးအဆောင်ပစ္စည်း စုစုပေါင်း သိန်း ၃၀၀ ကျော်ရရှိခဲ့သည်ဖြစ်သည်။

ကချင်ဒုက္ခသည်စခန်းတွင် ဒုက္ခသည်ပေါင်း ၅၅၀၀ ကျော်ရှိသည်ဖြစ်ပြီး ယခုလတ်တလော ကျောင်းဖွင့်ရာသီတွင် ကျောင်းနေရွယ်ကလေးများ ကျောင်းတက်နိုင်ရေး အတွက် အဓိကလှူဒါန်းခဲ့ကြောင်း သိရသည်။ ယခုကဲ့သို့လှူဒါန်းခြင်းသည် ပထမဆုံးအကြိမ်ဖြစ်ပြီး နောင်တွင်လည်း သွားရောက်လှူဒါန်းရန် ကြိုးပမ်းလျက်ရှိကြောင်း သိရသည်။