အာဏာသိမ်း ထိုင်းစစ်တပ်ကို ဆန့်ကျင်ရန် ဝန်ကြီးဟောင်း တဦးက အဖွဲ့ တခု ဖွဲ့

ဇွန်လ ၂၄ ရက်၊ ၂၀၁၄
M-Media

– ရွေးကောက်တင်မြှောက်ထားသည့် အရပ်သားအစိုးရအား ပြီးခဲ့သည့်လက ဖြုတ်ချကာ အဏာသိမ်းခဲ့သော ထိုင်းစစ်တပ်ကို ဆန့်ကျင်သော ‘Free Thai’ အမည်ရှိ အဖွဲ့တစ်ခုကို ယခင် ကတ်ဘိနတ် ၀န်ကြီးဟောင်းတစ်ဦးက ဖွဲ့စည်းခဲ့သည်ဟု သိရသည်။

ထိုအဖွဲ့မှာ “ဒီမိုကရေစီနှင်လူ့အခွင့်အရေးအတွက် ထိုင်းပြည်သူများ လွတ်မြောက်ရေးအဖွဲ့” ဖြစ်ပြီး မိမိကိုယ်တိုင်မှာလည်း ထိုအဖွဲ့တွင် အထွေထွေအတွင်းရေးမှူးအဖြစ် တာဝန်ယူထားသည်ဟု ယခင်အာဏာရ ဖြူထိုင်းပါတီမှ ခေါင်းဆောင် ချာရူပွန် ရူအန်ဆူဝမ်က ၎င်း၏ Facebook စာမျက်နှာပေါ်၌ ယနေ့တွင် ရေးသားခဲ့သည်။

ထို့ပြင် ထို Free Thai အဖွဲ့၏ ရည်ရွယ်ချက်မှာ စစ်တပ်နှင့် အာဏာရှင်ဆန်သော အုပ်ချုပ်မှုမျိုးအား ဆန့်ကျင်ရန်၊ ဒီမိုကရေးစီနည်းကျ အုပ်ချုပ်ရေးအား မြှင့်တင်ရန်နှင့် ငြိမ်းချမ်းရေး၊ လွတ်လပ်မှု၊ သာတူညီမျှစနစ်နှင့် လူ့ဂုဏ်သိက္ခာတို့အား အားပေးရန်ဖြစ်သည်ဟု ၎င်းက ဖော်ပြခဲ့သည်။ သို့သော် မည်ကဲ့သို့ လှုပ်ရှားဆောင်ရွက်နေသည်ဆိုသည်နှင့် မည်သူများက ထိုလှုပ်ရှားမှုတွင် ပါဝင်သည်ကို ရူအန်ဆူဝမ်က ဖော်ပြခဲ့ခြင်းမရှိချေ။

ယခင် ပြည်ထဲရေးဝန်ကြီးဟောင်း ရူအန်ဆူဝမ်မှာ ထိုင်းစစ်တပ်က အာဏာသိမ်းပြီးနောက် ကမ္ဘောဒီယားနိုင်ငံသို့ တိမ်းရှောင်သွားသည်ဟု သတင်းထွက်ခဲ့သော်လည်း ကမ္ဘောဒီယားအာဏာပိုင်များကမူ ငြင်းဆိုခဲ့ပြီး နိုင်ငံအတွင်း လျှို့ဝှက် နိုင်ငံရေးလှုပ်ရှားမှုများ ပြုလုပ်ရန် မည်သည့် နိုင်ငံခြားသားကိုမှ ခွင့်ပြုမည်မဟုတ်ဟု ပြောကြားခဲ့သည်။

ဓါတ်ပုံ အညွှန်း- အာဏာသိမ်း ထိုင်းစစ်တပ်ကို ဆန်ကျင်ဆန္ဒပြနေသည့် ပြည်သူတစ်ဦး Photo: EPA