အာဂျင်တီးနား၊ ဆွဇ်လန်၊ ပြင်သစ် ၊ နိုက်ဂျီးရီယားတို့ နောက်တဆင့်တက်၊ ၂၀၁၄ ကမ္ဘာဖလားရဲ့ ပထမဆုံး ဟက်ထရစ်ရှင်ပေါ်ထွက်

ဇွန်လ ၂၆ ရက်၊ ၂၀၁၄
M-Media

– ကမ္ဘာ့ဖလားအုပ်စု E နဲ့ အုပ်စု F တို့ရဲ့ အုပ်စုနောက်ဆုံးပွဲစဉ်တွေကို မနေ့ညနဲ့ ဒီနေ့ မနက်တွေမှာ ကစားခဲ့ကြပါတယ်။

အုပ်စု E

ပြင်သစ် ၀-၀ အီကွေဒေါ
ဆွဇ်လန် ၃-၀ ဟွန်ဒူးရပ်စ်

၂ ပွဲကစား ၆ မှတ်ရထားတဲ့ ပြင်သစ်နဲ့ ၂ ပွဲကစားလေးမှတ်ရထားတဲ့ အီကွေဒေါတို့ရဲ့ပွဲမှာတော့ ဂိုးမရှိသရေနဲ့ ပွဲပြီးခဲ့ပါတယ်။ ဒီပွဲအနိုင်ရမှ နောက်တစ်ဆင့် တက်နိုင်မယ့် အီကွေဒေါတို့ ကြိုစားကစားခဲ့ပေမယ့် ပြင်သစ်တို့ကို မယှဉ်နိုင်ခဲ့ဘဲ ဒုတိယပိုင်းမှာ အားထားရတဲ့ ကွင်းလယ်လူ ဗလင်စီယာ အထုတ်ခံခဲ့ရပါတယ်။ ပြင်သစ်တို့ကတော့ အုပ်စု ပထမနဲ့ နောက်တစ်ဆင့်တက်ခဲ့ပြီး နိုက်ဂျီးရီးယားနဲ့ တွေ့ဆုံရမှာဖြစ်ပါတယ်။

ဟွန်ဒူးရပ်စ်နဲ့ ကစားခဲ့တဲ့ ဆွဇ်လန်အသင်းကတော့ လူငယ်တောင်ပံကစားသမား ရှာကီရီရဲ့ ဟက်ထရစ်နဲ့အတူ နောက်တစ်ဆင့်ကို တက်ရောက်နိုင်ခဲ့ပါတယ်။ ဘောလုံးပိုင်ဆိုင်မှု အသာမရခဲ့ပေမယ့် ဂိုးသွင်းခွင့်မှာတော့ ဆွဇ်လန်တို့ ပိုသာခဲ့ပြီး ဟွန်ဒူးရပ်စ်ရဲ့ တစ်ဦးချင်းထိုးဖောက်မှုတွေကိုလည်း ဆွဇ်နောက်တန်းက တည်တည်ငြိမ်ငြိမ်နဲ့ ဟန့်တားနိုင် ခဲ့ပါတယ်။ ဒီပွဲအနိုင်ကြောင့် ၆ မှတ်ရပြီး အုပ်စုဒုတိယနဲ့ နောက်တစ်ဆင့်ကို တက်ရောက်နိုင်ခဲ့ကာ အာဂျင်တီးနားနဲ့ တွေ့ဆုံရမှာဖြစ်ပါတယ်။

အုပ်စု F

အာဂျင်တီးနား ၃-၂ နိုက်ဂျီးရီးယား
ဘော့စနီးယား ၃-၁ အီရန်

ပထမနှစ်ပွဲမှာ ကပ်နိုင်ခဲ့တဲ့ နာမည်ကြီး အာဂျင်တီးနားတို့ နိုက်ဂျီးရီးယားနဲ့ပွဲမှာလည်း ၃ ဂိုး ၂ ဂိုးနဲ့ ကပ်နိုင်ခဲ့ပါတယ်။ အာဖရိကဖလား ချန်ပီယံ နိုက်ဂျီးရီးယားတို့ နောက်တစ်ဆင့် တက်ဖို့ သရေ တစ်မှတ်သာလိုပေမယ့် ပြိုင်ဘက် အီရန်က ဘော့စနီးယားကို ရှုံးခဲ့တာကြောင့် ဒီပွဲရဲ့အဖြေဟာ အရေးမပါတော့ပါဘူး။ ပွဲအစ ၃ မိနစ်မှာပဲ မက်ဆီက ဦးဆောင်ဂိုးသွင်းပေးခဲ့ပေမယ့် ၁ မိနစ်သာခံခဲ့ပြီး မူဆာက နိုက်ဂျီးရီးယားအတွက် ချေပဂိုးပြန်သွင်းခဲ့ပါတယ်။ ပထမပိုင်းနာကျင်အချိန်ပိုမှာ မက်ဆီက ဒုတိယဂိုးထပ်သွင်းပေးခဲ့ပါတယ်။ ဒါပေမယ့် ဒုတိယပိုင်အစမှာ မူဆာကပဲ ချေပဂိုး ပြန်သွင်းနိုင်ခဲ့ပါတယ် အာဂျင်တီးနားအတွက် အနိုင်သေချာစေမယ့်ဂိုးကိုတော့ မိနစ် ၅၀ မှာ ရိုဂျိုက သွင်းယူပေးခဲ့တာပါ။ အာဂျင်တီးနားတို့ ဒီထက်ပိုပြီးတော့ ဂိုးရသင့်ပေမယ့် တိုက်စစ်မှူးတွေ အဆုံးသတ် ညံ့ဖျင်းခဲ့တာကြောင့် ၃ ဂိုးနဲ့ပဲ ကျေနပ်ခဲ့ရပြီး ဒီပွဲမှာ ၂ ဂိုးသွင်းခဲ့တဲ့ မက်ဆီကတော့ ဂိုးသွင်းအများဆုံးစာရင်းမှာ ထိပ်ဆုံးက ဦးဆောင်နေပါတယ်။

ကစားပုံကောင်းခဲ့ပြီး ကံတရားရဲ့ဖေးမမှု မရရှိခဲ့တာကြောင့် ပထမနှစ်ပွဲပြီးကတည်းက အိမ်ပြန်ဖို့ သေချာခဲ့တဲ့ ဘော့စနီးယားတို့ အီရန်ကို အကောင်းဆုံးအနိုင်ယူနိုင်ခဲ့ပြီး ကမ္ဘာ့ဖလားနောက်ဆုံးအဆင့်ပြိုင်ပွဲမှာ ပထမဆုံးရမှတ်ကို ရယူနိုင်ခဲ့ပါတယ်။

အီရန်က ဒီပွဲနိုင်ရင် နောက် တစ်ဆင့်တက်ဖို့ အခြေအနေကောင်းလာနိုင်ပေမယ့် ဘော့စနီးယားကို မယှဉ်နိုင်ခဲ့ပါဘူး။ ဘော့စနီးယားအတွက် ဂိုးတွေကိုတော့ ဇက်ကို၊ ဂျာနစ်၊ ဗာဆာဂျီဗစ်တို့က သွင်းယူပေးခဲ့တာပါ။

၁၆ သင်းအဆင့် ရှုံးထွက်အဖြစ် ပြင်သစ်နဲ့နိုက်ဂျီးရီးယားတို့ပွဲကို ဇွန်လ ၃၀ ရက်နေ့ ည ၁၀ နာရီခွဲမှာ ကစားမှာဖြစ်ပြီး အာဂျင်တီးနားနဲ့ ဆွဇ်လန်တို့ရဲ့ပွဲကိုတော့ ဇူလိုင် ၁ ရက်နေ့ ည ၁၀ နာရီခွဲမှာ ကစားမှာဖြစ်ပါတယ်။