တရားခံ မပေါ်သေးသော သေဆုံးသူ အသုဘ ဖိတ်စာတွင် အမုန်းတရားများဖြင့် လှုံ့ဆော်ရေးသားထား

ဇူလိုင် ၄ ၊ ၂၀၁၄
M-Media
.သီဟ

ဇူလိုင် ၁ ရက် နှင့် ၂ ရက်နေ့ည များတွင် ဖြစ်ပွားခဲ့ မန္တလေးမြို့မှ ဘာသာရေးအသွင်ဆောင် အကြမ်းဖက်မှုများကြောင့် အနည်းဆုံး လူ၂ဦးသေဆုံးပြီး ၁၄ယောက် ဒဏ်ရာရရှိကြောင်း တိုင်းဒေသကြီး ရဲတပ်ဖွဲ့မှ သတင်းထုတ်ပြန်ခဲ့ပါတယ်။

သေဆုံးသူ အမျိုးသားနှစ်ယောက်ဟာ ဗုဒ္ဓဘာသာဝင် တစ်ယောက်နဲ့ အစ္စလာမ် ဘာသာဝင် တစ်ယောက်တို့ဖြစ်ပြီး အမည်မသိ လူအုပ်၏ အကြမ်းဖက် တိုက်ခိုက်မှုဖြစ်ကြောင်း ရဲတပ်ဖွဲ့ရဲ့ ထုတ်ပြန်ချက်မှာ ရေးပါတယ်။

သေဆုံးသူ အစ္စလာမ်ဘာသာဝင် ကိုစိုးမင်း ကို အစ္စလာမ်ဘာသာဝင်တို့ရဲ့ ဘာသာရေး ထုံးစံအတိုင်း မနေ့က မန္တလေးမြို့ အေးရ်ိပ်ငြိမ်က မွတ်စလင်သုဿန်မှာ ဇူလိုင်လ ၃ ရက်နေ့ နေ့လည် ၃ နာရီက မြှုပ်နှံသင်္ဂြိုလ်ခဲ့ပါတယ်။ နှစ်ဘက်ဘာသာဝင်များ အကြား စိုးရိမ်မှုတွေ ရှိနေပေမယ့် ပြဿနာ  တစုံတရာ မရှိဘဲ အေးချမ်းစွားဖြင့် ကိုစိုးမင်းရဲ့ အသုဘ အခမ်းအနား ပြီးသွားခဲ့ပါတယ်။

အခြားသေဆုံးသွားတဲ့ ဗုဒ္ဓဘာသာဝင် မောင်ထွန်းထွန်း(ခ) ရောင်ပြန် ရဲ့ အသုဘ အခမ်းအနားကို ယနေ့ နေ့လည်(၁) နာရီမှာ ပြုလုပ်မှာ ဖြစ်ကြောင်း အွန်လိုင်းစာမျက်နှာမှာ ပြန့်နှံ့နေတဲ့ အသုဘ ဖိတ်စာအရ သိရပါတယ်။

အဆိုပါ ဖိတ်စာတွင် ရဲတပ်ဖွဲ့ က ပြစ်မှုကျူးလွန်သူများကို မဖော်ထုတ်နိုင်သေးခင် မွတ်စလင်များမှ သတ်ဖြတ်ကြောင်း အမုန်းတရားပွားစေမည့် ပြင်းထန်သည့် အသုံးအနှုန်းများ သုံးပြီး ရေးသားထားတာကို တွေ့ရပါတယ်။ အဆိုပါဖိတ်စာကြောင့် ဒေသခံတွေဟာ မလိုလာအပ်တဲ့ ပြဿနာတွေ ဖြစ်လာမှာကို စိုးရိမ်နေကြပါပြီ။

” မန်းလေးမှာ သေဆုံးမှု ၂ ခုဖြစ်ခဲ့ပါတယ်။ ဗုဒ္ဓဘာသာ တယောက်နဲ့ အစ္စလာမ်ဘာသာဝင်တယောက်ပါ။ သူတို့နှစ်ယောက်လုံးကို အဖွဲ့တဖွဲ့တည်းက သတ်သွားတာမျိုးပါ။ ပြဿနာကို ကြီးထွားအောင် နှစ်ဖက်ဘာသာဝင်တွေကို လိုက်သတ်နေတဲ့ပုံပါ။ “

မန္တလေးမြို့ခံ တဦးဖြစ်ပြီး Facebook ဆိုရှယ်မီဒီယာမှာ လူသိများတဲ့ Naythit NT က သေဆုံးခဲ့သူ ၂ ဦး နဲ့ပတ်သက်ပြီး သူရဲ့ ကိုယ်ပိုင် စာမျက်နှာရေးသားပြီး သူအမြင်ကို ထုတ်ပြောခဲ့တာပါ။

ရွှေဝါရောင် အရေးခင်းကာလက လူသိများခဲ့တဲ့ နာမည်ကျော် ဘလောဂါ ကိုထိုက်ကတော့ အဆိုပါ အသုဘ ဖိတ်စာနဲ့ ပတ်သက်ပြီး “ရန်လိုနေသော ငါတို့ ဗုဒ္ဒဘာသာဝင်တွေပါလား …. ရှက်ဖို့ သိပ်ကောင်းတယ်။ “ ဆိုပြီး သူရဲ့ Facebook စာမျက်နှာမှာ မှတ်ချက်ပြုရေးသားခဲ့ပါတယ်။

သစ်ထူးလွင် ဘလောဂ်မှ မှုခင်းသတင်းတပုဒ်ကို မီဒီယာကျင့်ဝတ်မဲ့ ရေးသားခဲ့မှုကို ဦးဝီရသူအပါအဝင် ထပ်ဆင့် ဖြန့်ဝေသူ များစွာကြောင့် ဆူပူအကြမ်းဖက်မှုများ စတင်ဖြစ်ပွားခဲ့ပါတယ်။

ယခုတဖန် တရားခံ မပေါ်သေတဲ့ လူသေဆုံးမှု အသုဘ ဖိတ်စာပါ မုန်းတီးရေးလှုံဆော်သည့် အသုံးအနှုန်းများကြောင့် အကြမ်းဖက်မှုများ ထပ်မံဖြစ်ပွားလာမည်ကို မန္တလေးမြို့ခံ ပြည်သူများ စိုးရိမ်လျက်ရှိကြောင်းပါ။