နေးမာ၏ဒဏ်ရာကို တားမြစ်သုံးပြီး မကုရန် ဘရာဇီးဘောလုံးအဖွဲ့ချူပ် သတိပေး

ဇူလိုင် ၈ ၊ ၂၀၁၄
M-Media

– ဒဏ်ရာရနေသည့် ဘရာဇီးဘောလုံးစတား နေးမာအား ပြိုင်ပွဲတွင် ၀င်ရောက်ကစားရန် တာမြစ်ဆေးဝါး အသုံးပြုကာ ကုသပေးခြင်း မပြုရန် ဘရာဇီးလ်ဘောလုံးအဖွဲ့ချုပ်က သတိပေးပြောဆိုလိုက်သည်။

ကိုလံဘီယာနှင့် ကွာတားဖိုင်နယ်ပွဲတွင် ရရှိခဲ့သည့် နောက်ကျောဒဏ်ရာကြောင့် ဘရာဇီး၏ လက်ကျန်ပွဲစဉ်များတွင် ပါဝင်နိုင်တော့မည် မဟုတ်ဟု ဘရာဇီးအသင်း ဒေါက်တာ လူအစ်ဇ်ရန်ကိုက ကြေညာခဲ့သည်။ သို့သော်လည်း နေးမာ၏ အသင်းဟောင်း ဆန်းတို့မှ ဆေးအဖွဲ့ကမူ ထိုဒဏ်ရာအား ကမ္ဘာ့ဖလား နောက်ဆုံး ဗိုလ်လုပွဲမတိုင်ခင် ပျောက်ကင်းအောင် ကုသနိုင်မည်ဟု နေးမာနှင့် ၎င်း၏ မိသားစုကို ပြောကြားခဲ့သည်။

ထို့ကြောင့် ဘရာဇီးလ်ဘောလုံးအဖွဲ့ချုပ်က ယခုကဲ့သို့ သတိပေးလိုက်ခြင်းဖြစ်ပြီး  ဆေးပညာကျင့်ဝတ်ကို ချိုးဖောက်ကာ တားမြစ်ထားသည့် အကိုက်အခဲပျောက် ဆေးထိုးကာ ကုသပေးသည့် မည်သည့် ဆရာဝန်ကိုမဆို ရဲတပ်ဖွဲ့အား တိုင်ကြားမည်ဟု ပြောဆိုခဲ့သည်။

“အနာကျက်ဖို့လိုအပ်နေတဲ့ သူ့(နေးမာ)ရဲ့ ကျောရိုးက နာဗ့်ကြောဒဏ်ရာဟာ အခုအချိန်မှာ တည်ငြိမ်တဲ့အနေအထားမှာရှိပါတယ်။ တကယ်လို့ ဒီဒဏ်ရာကို ထပ်ပြီးထိခိုက်မယ်ဆိုရင် ပိုပြီး ဆိုးရွားသွားနိုင်ပါတယ်။ ဒါဆိုရင် နေးမာတင်မကဘဲ လူသားထုတစ်ရပ်လုံးအတွက် ပြဿနာဖြစ်စေနိုင်ပါတယ်” ဟု ဘရာဇီးလ်အသင်းဆရာဝန် ရန်ကိုက ပြောကြားခဲ့သည်။

ဘရာဇီးအသင်းမှာ ယနေ့ညတွင် ဆီမီးဖိုင်နယ်ပွဲစဉ်အဖြစ် ဂျာမနီအသင်းနှင့် ယှဉ်ပြိုင်ကစားရမည်ဖြစ်သည်။