မုဒိန်းမှုများ ထိရောက်စွာ အရေးယူပေးရန် ဒဂုံဆိပ်ကမ်းမှ ပြည်သူအချို့ဆန္ဒပြ

ဇူလိုင် ၁၅၊ ၂၀၁၄
M-Media
လမင်း

ရန်ကုန်။      ။ မြန်မာနိုင်ငံတွင် မုဒိန်းမှုများကို ထိရောက်စွာ အရေးယူပေးရန်၊ မုဒိန်းမှုပပျောက်ရေး၊ အရွယ်မရောက်သေးသော မိန်းကလေးများအား အဓမ္မပြုကျင့်ရေးမှ ရှောင်ကြဉ်ရေးတို့အတွက် ဒဂုံဆိပ်ကမ်းမှပြည်သူအချို့က ဇူလိုင်လ ၁၅ ရက်နေ့တွင် ရန်ကုန်မြို့ မြို့တော်ခန်းမရှေ့၌ ဆန္ဒဖော်ထုတ်မှုတစ်ရပ်ကို ပြုလုပ်ခဲ့ကြသည်။

“ကျွန်တော်တို့နိုင်ငံမှာ တရားဥပဒေစိုးမိုးရေး လုံးဝကို မရှိဘူးဖြစ်နေတယ်။ ကျွန်တော်တို့ ဆင်ခြေဖုံးရပ်ကွက်တွေမှာ မုဒိန်းမှုတွေက ခဏခဏဖြစ်နေတယ်။ အမှုသွားဖွင့်ရင်လည်း မုဒိန်းကောင်တွေက ရဲတွေနဲ့ လာဘ်ပေးလာဘ်ယူလုပ်ပြီး ပြီးသွားတယ်။ သမ္မတအနေနဲ့လည်း ဆင်ခြေဖုံးရပ်ကွက်တွေကို ကွင်းဆင်း လေ့လာသင့်ပါတယ်။ ပြောနေတဲ့ မိန့်ခွန်းနဲ့ လက်ရှိဖြစ်ပျက်နေတာတွေက တခြားစီဖြစ်နေတယ်” ဟု ဦးဆောင်ဆန္ဒပြသူ ဦးနေလင်းစိုးက သုံးသပ်ပြောကြားသည်။

တရားဥပဒေစိုးမိုးမှုမှာ တရားဥပဒေရဲ့ ချိန်ခွင်အထက်တွင် ပိုက်ဆံထုပ်များကို ယနေ့ချိန်ထိ မြင်တွေ့နေရဆဲဖြစ်ပြီး တရားဥပဒေ စိုးမိုးမှုမှာ မြန်မာနိုင်ငံတွင် ခိုင်မာမှုမရှိခဲ့ကြောင်း၊ ပိုက်ဆံပေးတဲ့လူတွေကို အစိုးရအနေနဲ့ ကာကွယ်ပေးမှုများကို ရပ်တန့်ကရပ်ပေးစေလိုကြောင်းကို ၎င်းကဆက်လက်ပြောကြားခဲ့သည်။

“ကျွန်မသမီးလေးက ကျပ်မပြည့်ပါဘူး။ ဇွန်လ ၁၄ရက်နေ့ ညက သမီးပြန်မလာတော့ ရဲစခန်းမှာ လူပျောက်တိုင်ထားတယ်။  ၁၆ ရက်နေ့ညကျတော့ သမီးကပြန်လာတယ်။ နားမှာလည်း နာကပ်ကပါမလာတော့ဘူး။ အဓမ္မကျင့်ခံလိုက်ရတယ်လို့ပြောတယ်။

ရဲစခန်းမှာအမှုသွားဖွင့်တယ် သိပ်မကြာဘူး အဲ့ဒီကောင်ကို အာမခံနဲ့ လွှတ်ပေးလိုက်တယ် အရေးယူမှုမရှိပါဘူး” ဟု ဆိပ်ကမ်းမြို့နယ်မှ အဓမ္မကျင့်ခံရသူ မိန်းကလေး၏ မိခင်တစ်ဦးက ဆိုသည်။

ယခုဆန္ဒပြခြင်းသည် ဒုတိယအကြိမ်မြောက်ဖြစ်ပြီး ခွင့်ပြုချက်မရရှိဘဲ ဆန္ဒပြခြင်းဖြစ်သည်ဟု သိရသည်။ ပထမအကြိမ်တွင် စီတန်းလမ်းလျောက်ကာ ဆန္ဒဖော်ထုတ်ခဲ့ကြသည်။ ဆက်လက်ပြီး မုဒိန်းမှု ပပျောက်ရေးနှင့် ပတ်သက်၍ဟောပြောပွဲများပြုလုပ်ရန်ရှိပြီး လိုအပ်ပါက သပိတ်စခန်းပါ ဖွင့်လှစ်သွားမည်ဟု သိရသည်