စင်ကာပူရှိ ဗလီဝတ်ကျောင်းတော် တစ်လုံးသို့ ၀န်ကြီးချုပ် လီရှန်လွန်း သွားရောက်လည်ပတ်၊ မွတ်စလင်များနှင့် အတူ စုပေါင်းဝါဖြေခဲ့

ဇူလိုင် ၂၄ ၊ ၂0၁၄
M-Media

– စင်ကာပူဝန်ကြီးချုပ် လီရှန်လွန်းမှာ Queenstown အရပ်ရှိ မူဂျာဟစ်ဒင် ဗလီဝတ်ကျောင်းတော်သို့ တနင်္လာနေ့က သွားရောက်လည်ပတ်ခဲ့ပြီး မွတ်စလင်များနှင့် စုပေါင်းဝါဖြေခဲ့သည်ဟု သိရသည်။

အဆိုပါဗလီဝတ်ကျောင်းတော်ကို မကြာသေးမီက ပြုပြင်ထားခဲ့ပြီး အဓိက ၀တ်ပြုခန်းမ တိုးချဲ့ခြင်း၊ ဓာတ်လှေကား၊ ရိုးရိုးလှေကားများ ထပ်မံထည့်သွင်းခြင်းနှင့် စာသင်ခန်း အသစ်များ ဆောက်လုပ်ခြင်း စသဖြင့် ပြင်ဆင်မွမ်းမံထားသည်။

လီရှန်လွန်းမှာ SAFTI RSM အရာရှိသင်တန်းကျောင်းတွင် ခင်မင်ရင်းနှီးခဲ့သည့် အသက် ၈၂ နှစ်အရွယ် ဟာဂျီ ရှမ်ရှူဒင် ရှာဒန်နှင့်လည်း ထိုဗလီဝတ်ကျောင်းတော်တွင် တွေ့ဆုံခဲ့သည်။

၎င်း၏ လည်ပတ်မှုကို ကြိုဆိုခဲ့ကြသည့် မူဂျဟစ်ဒင် ဗလီဝတ်ကျောင်းတော် ဥက္ကဌ မစ္စတာ ခိုင်ရူလ် ဂျမီလ်းနှင့် ၀ိုင်းတော်သူဝိုင်းတော်သားများအားလုံးကို ကျေးဇူးတင်ကြောင်း၊ အသက် ၈၂ အရွယ်ရှိနေသော်လည်း တက်တက်ကြွကြွရှိနေသည့် ရှမ်ရှူဒင်ရှာဒန်အား တွေ့ရသည့်အတွက် ၀မ်းမြောက်မိကြောင်း လီရှန်လွန်းက ၎င်း၏ Facebook စာမျက်နှာတွင် ရေးသားဖော်ပြခဲ့သည်။

စင်ကာပူ၏ ၅ သန်းကျော်သော လူဦးရေတွင် အစ္စလာမ်ဘာသာကို သက်ဝင်ယုံကြည်သူ ၁၄ ရာခိုင်နှုန်းရှိပြီး အများစုမှာ မလေးနွယ်ဝင်မွတ်စလင်များဖြစ်ကြသည်။ နှစ်စဉ် အစ္စလာမ်ဘာသာဝင်များ၏ ရမ်ဇာန်ဥပုသ်လရောက်တိုင်း စင်ကာပူစိုးရမှာ ဂုဏ်ပြုသ၀ဏ်လွှာ ပေးပို့ခြင်း၊ စုပေါင်းဝါဖြေပွဲများ ပြုလုပ်ပေးလေ့ရှိသည်။

Ref: Lee Hsien Loong FB