အီဘိုလာ ရောဂါဖြစ်ပွားသော နိုင်ငံများမှ ဟဂ်ျ ဘုရားဖူးများ ယခုနှစ် ပိတ်ပင်

သြဂုတ် ၆ ၊ ၂၀၁၄
M-Media

ရိယာ့ဒ်။      ။ဟဂ်ျရာသီအတွင်း ဟဂ်ျခရီးသည်များအား ကာကွယ်စောင့်ရှောက်ရေးတာဝန်တစ်ရပ်အရ – အီဘိုလာရောဂါဖြစ်ပွားနေသော အနောက်အာဖရိကနိုင်ငံများမှ မွတ်စ်လင်မ်တို့ကို ဟဂ်ျခရီးစဉ် ယခုနှစ်၌ တားမြစ်ကြောင်း ဆော်ဒီအာရေဗျမှ ကြေညာလိုက်သည်။

“ဒေသတွင်းအ၀င်လေဆိပ်များက အာဏာပိုင်တွေအားလုံးကို ကျွန်တော်တို့ ညွှန်ကြားထားပါတယ်။ ကျွန်တော်တို့ရဲ့ဝန်ထမ်းတွေကို အီဘိုလာရောဂါလက္ခဏာ ဆန်းစစ်ရေး၊ တုန့်ပြန်ရေးနဲ့ ဗိုင်းရပ်စ် မကူးစက်အောင်ထိန်းချုပ်ရေးနဲ့  ပတ်သက်လို့ လေ့ကျင့် ထားပြီးလည်း ဖြစ်ပါတယ်” ဟု ဆော်ဒီ ကျန်းမာရေးဝန်ကြီးဌာန ပြောရေးဆိုခွင့်ရှိသူ ဒေါက်တာ ခါလစ် မရ်ဃလန်က Arabian Business သို့ သြဂုတ်လ (၄)ရက်၊ တနင်္လာနေ့တွင် ပြောကြားသည်။

ကမ္ဘာ့ကျန်းမာရေးအဖွဲ့၏အဆိုအရ စတင်ဖြစ်ပွားသော ဖေဖော်ဝါရီလမှစ၍ အီဘိုလာရောဂါကြောင့် ဂီနီနှင့် ဆိုင်ရာလီယွန် နှစ်နိုင်ငံ၌ သေဆုံးသူ ဦးရေ ၈၀၀ ၀န်းကျင်ရှိပြီဖြစ်ပြီး၊ ထိုနိုင်ငံများမှတဆင့် လိုက်ဘေးရီးယားသို့လည်း ကူးစက်လာခဲ့သည်။

အီဘိုလာရောဂါကို ကွန်ဂိုဒီမိုကရက်သမ္မတနိုင်ငံ၌ဖြစ်ပွားပြီးနောက် (၁၉၇၆)ခုနှစ်တွင် စူးစမ်းဖော်ထုတ်နိုင်ခဲ့သည်။ ယခုအခါ ကုထုံး မရှိသေးသောယင်းရောဂါဒဏ်ကို အပြင်းထန်ဆုံး ကူးစက်ခံစားနေရသည်မှာ ဂီနီ နိုင်ငံ ဖြစ်ကြောင်း သိရသည်။ ရောဂါကူးစက်ပြန့်နှံ့လျက် ရှိသည့် နိုင်ငံများသို့ လေကြောင်း ခရီးစဉ် ခေတ္တ ရပ်ဆိုင်းထားသည့်နိုင်ငံများအနက် ယူအေအီးသည်လည်း အပါအ၀င်ဖြစ်သည်။

ယခုနှစ် ဟဂ်ျခရီးသည်များ ရောဂါကူးစက်ခံရမှုမှ ကာကွယ်ရေးအတွက် သက်ဆိုင်ရာ ယာဉ်စခန်းနှင့် လေဆိပ်အားလုံးသို့ စည်းကမ်းချက်များ ပိုမိုတင်းကြပ်ရန် ညွှန်ကြားထားပြီးဖြစ်ကြောင်း ဆော်ဒီကျန်းမာရေးဝန်ကြီးဌာနမှ ဆိုသည်။

OnIslam