၂၆ နှစ်မြောက် ၈ လေးလုံး အရေးတော်ပုံ အောက်မေ့ဖွယ် အခမ်းအနားအား ပြည်သူများမှ ပြုလုပ်ကျင်းပ

သြဂုတ် ၈၊ ၂၀၁၄
M-Media
သတင်း/ဓါတ်ပုံ လမင်း

ရန်ကုန်။      ။ ယနေ့ ၈.၈.၂၀၁၄ တွင်ကျရောက်သော ၂၆ နှစ်မြောက် ရှစ်လေးလုံးအရေးတော်ပုံအခမ်းအနားကို ယနေ့နံနက် ၈ နာရီ ၈ မိနစ်အချိန်တွင် ရန်ကုန်မြို့ မြို့တော်ခန်းမရှေ့တွင် ပြည်သူများက ၈.၈.၈၈ တွင်ကျဆုံးသွားသော ပြည်သူများအတွက် အောက်မေ့ဖွယ် အခမ်းအနားတစ်ခုကို ပြုလုပ်ကျင်းပခဲ့ပါသည်။

အရေးတော်ပုံကာလက ကျဆုံးခဲ့ကြတဲ့ ကျောင်းသား /သူ ရဟန်း ရှင်လူများသွေးမြေကျခဲ့သည့် အမှတ်သရုပ်အနေနဲ့ အနီရောင် ဆေးခြယ်ထားသည့် အနီရောင်အကွက် ရင်ပြင်နီကြီးကို မြို့တော်ခန်းမရှေ့တွင် ပြည်သူများမှ အမှတ်တရ ရေးဆွဲခဲ့ကြပါသည်။

“ပြည်သူတွေက အခုချိန်ထိအကြောက်တရားနဲ့အသက်ရှင်နေရတုန်းပါပဲ။ ၈၈တုန်း က အမှန်တရားအတွက် ပေးဆပ်ခဲ့ကြတဲ့သူတွေအတွက်၊ ကျေးဇူးတရားအတွက် အခုလို ရင်ပြင်နီကို ဒီနေ့ အမှတ်တရရေးဆွဲခဲ့ရခြင်းဖြစ်ပါတယ်” ဟု ရင်ပြင်နီရေးဆွဲရခြင်းနှင့် ပတ်သက်ပြီး ကိုဗိုလ်ဗိုလ်က ရှင်းလင်းပြောကြားခဲ့သည်။

သွေးစွန်းခဲ့တဲ့သမိုင်း ၂၆ နှစ်ရှိခဲ့ပြီး ပြည်သူလူထုမပါဝင်ဘဲ တိုင်းပြည်အရေးကိုဆောင်ရွက်လို့မရဘူးဆိုတာ ၈ လေးလုံးအရေးတော်ပုံကြီးက ပြသခဲ့ခြင်းဖြစ်ကြောင်း၊ ပြည်သူရဲ့အင်အားသည် တိုင်းပြည်အတွက် အများကြီးပြောင်းလဲစေခဲ့တယ်ဆိုသည်ကို မမေ့လျော့ပဲ ဒီမိုကရေစီအရေးကို ပြည်သူ့အားနဲ့ဆက်လက်ကြိုးပမ်းရမှာဖြစ်ပါတယ် လို့ တ.က.သ ကျောင်းသားခေါင်းဆောင်တစ်ဦးဖြစ်သူ ကိုစည်သူမောင်က သုံးသပ်ပြောကြားခဲ့သည်။

ရဟန်းသံဃာတော်များနှင့် ဘာသာအသီးသီးမှ ကျဆုံးသွားခဲ့သော ရဟန်းရှင်လူများအတွက် ဆုမွန်ကောင်းများတောင်းပေးခဲ့ကြပြီး ပြည်သူများမှ မဟာဗန္ဓုလပန်းခြံသို့တစ်ပတ်လှည့်လည်ပြီး ကျဆုံးသွားသော ရဲဘော်ရဲဘက်များအတွက် လွမ်းသူ့ပန်းခွေချ အလေးပြုကာ ဂုဏ်ပြုခဲ့ကြသည်။

“ဒီနေရာဟာ ကျွန်တော့သူငယ်ချင်းတွေရဲ့သွေးမြေကျခဲ့တဲ့နေရာပါ။ အဲ့ဒီအချိန်က သွေးမြေတွေကျခဲ့ရသောလည်း အခုထိ ရည်မှန်းထားတဲ့အရာတွေကတော့ အခုထိဖြစ်မလာခဲ့သေးပါဘူး။ မှုန်ဝါးဝါးနဲ့ဖြစ်နေတယ်။ အာဏာပိုင်ကိုပြောချင်တာက သွေးမြေကျခဲ့တဲ့အရေးအခင်းဆိုတာမရှိရင် လွှတ်တော်ဆိုတာ ဦးသိန်းစိန်ဆိုတာရှိလာစရာမရှိပါဘူး။သွေးနဲ့ရေးခဲ့တဲ့သမိုင်းတွေကို ကျေးဇူးမသိရင်နေပါ။ ပြည်သူတွေကိုတော့ငဲ့ညာပေးသင့်ပါတယ်” လို့ ၈လေးလုံးအရေးတော်ပုံတွင် ပါဝင်ခဲ့သူတစ်ဦးဖြစ်သူ ကိုဆန်းတင်ကျော် မှ ပြောဆိုခဲ့သည်။

ရှစ်လေးလုံးနေ့အတွက် ရှစ်လေးလုံးကျောင်းသားခေါင်းဆောင်များမှ ပေးပို့ခဲ့ကြသော သ၀ဏ်လွာများကို ဖတ်ကြားခဲ့ကြပြီး ကမ္ဘာမကြေဘူး တေးသီချင်းဖြင့် ကျဆုံးသွားခဲ့သော ရဟန်းရှင်လူ ပြည်သူများကို ဂုဏ်ပြုခဲ့ကြသည်။