နိုင်ငံတကာ လူငယ်များနေ့ အထိမ်းအမှတ် အဖြစ် ရန်ကုန်လူငယ် ပွဲတော်နှင့် လူငယ် အဖွဲ့အစည်းများပြပွဲ ကျင်းပပြုလုပ်

သြဂုတ် ၁၀၊ ၂၀၁၄
M-Media
လမင်း

ရန်ကုန်။         ။ သြဂုတ်လ ၁၂ ရက်နေ့တွင်ကျရောက်မည်ဖြစ်သော နိုင်ငံတကာလူငယ်များနေ့ အထိမ်းအမှတ်အဖြစ် ရန်ကုန်လူငယ်ပွဲတော်နှင့် လူငယ်အဖွဲ့အစည်းများပြပွဲကို ရန်ကုန်တက္ကသိုလ် စိန်ရတုခန်းမတွင် ယနေ့သြဂုတ်လ ၁၀ ရက်နေ့ နံနက် ၉ နာရီမှ ညနေ ၅ နာရီထိ ကျင်းပပြုလုပ်ခဲ့ပါသည်။

“လူငယ်တွေမှာက စွမ်းရည်တွေက အများကြီးရှိကြပါတယ်။ ဒီပွဲလေးမှာ လူငယ်တွေရဲ့ အတွေးအခေါ်တွေ တွေ့ကြုံနေရတဲ့ အခက်အခဲတွေကို ဆွေးနွေးကြမှာပါ။ ဦးဆောင် ဆွေးနွေးတဲ့သူတွေနဲ့ လူငယ်တွေ ဆွေးနွေးတာတာတွေကို အစီရင်ခံစာ တစ်စောင်ပြု လုပ်သွားမှာဖြစ်ပါတယ်” ဟု Myanmar Youth Network မှ မသဉ္ဖာရွှန်းလဲ့ရည်က ရှင်းလင်းပြောကြားသည်။

လူငယ်များအား စွမ်းဆောင်ရည်မှုများကို မြှင့်တင်ပေးနိုင်နှင့် လူငယ်များ စုစုစည်းစည်းနှင့် အလုပ်အကိုင်များကို လုပ်ကိုင်တတ်ရန်ကိုလည်း ဆွေးနွေး သွားကြမည်ဖြစ်ပြီး ယနေ့ပွဲတွင် ဆွေးနွေးပွဲများသာမက ဖျော်ဖြေရေး အစီအစဉ်များပါ ပါဝင် တင်ဆက်သွားမည်ဖြစ်ကြောင်းကို ၎င်းက ထပ်လောင်းပြောကြားခဲ့သည်။

“လူငယ်များကို စွမ်းရည်မြှင့်တင်ပေးခြင်းမှသည် ကျန်းမာဖွံ့ဖြိုးသော လူ့အဖွဲ့အစည်းဆီသို့” ဟူသော ခေါင်းစဉ်ဖြင့် ဆွေးနွေးခဲ့ကြပြီး “လူငယ်များအား စွမ်းဆောင်ရည် မြှင့်တင်ရာတွင် မိဘများထက် ဆရာများ၏ အခန်းကဏ္ဍ ပိုအရေးကြီးသည်” ဟူသည့်ခေါင်းစဉ်ဖြင့် အငြင်းခုံဆွေးနွေးပွဲကိုလည်း ပြုလုပ်ခဲ့ကြသည်။

ရန်ကုန်လူငယ်ပွဲတော်နှင့် လူငယ်အဖွဲ့အစည်းများပြပွဲတွင် နယ်ပယ်အသီးသီးမှ အရပ်ဖက် လူအဖွဲ့အစည်းများဖြစ်ကြသော လူငယ်အဖွဲ့အစည်းများမှ အဖွဲ့အစည်းပေါင်း ၂၀ ကျော်က ရန်ကုန်လူငယ် ပွဲတော်သို့လာရောက်ပြီး ယင်းအဖွဲ့တို့၏ လုပ်ဆောင်ချက် အသီးသီးကို လာရောက်ပြသခဲ့သည်။

“ဒီနေ့ပွဲကို သူငယ်ချင်းတွေက ခေါ်လို့လိုက်လာတာပါ။ ဒီရောက်တော့မှ အရမ်းကို ဗဟုသုတရမဲ့ပွဲလို့ထင်မိတယ်။ လူငယ်တွေအနေနဲ့ ဒီကဆွေးနွေးမှုတွေကို ပါဝင်ခွင့်ရမှာဖြစ်တဲ့ အတွက်လည်း ၀မ်းသာပါတယ်။ မြန်မာနိုင်ငံက လူငယ်တွေကလည်း နိုင်ငံတကာနဲ့ ရင်ဘောင်တန်းနိုင်ဖို့အတွက် ကြိုးစားရမဲ့ အချိန်ရောက်ပြီလို့ထင်ပါတယ်။ အားလုံး ၀ိုင်းဝန်းကြိုးစားရမှာဖြစ်ပါတယ်”ဟု ရန်ကုန်လူငယ်ပွဲတော်နှင့် လူငယ်အဖွဲ့အစည်းများပြပွဲ သို့မြောက်ဥက္ကလာမြို့နယ်မှ လာရောက်သော လူငယ်တစ်ဦးက ပြောကြားခဲ့သည်။

ရန်ကုန်လူငယ်ပွဲတော်သို့ အသက် ၁၆ နှစ်မှ ၃၅ နှစ်ကြားရှိ လူငယ်များနှင့် နယ်ပယ်အသီးသီးမှ လူငယ်ပညာရှင်များမှ လူငယ်များ၏ စွမ်းဆောင်ရည်၊ အခွင့်အရေးနှင့် တိုးတက်ရေးတို့အတွက် တက်ရောက်ဆွေးနွေးခဲ့ကြသည်။