ယခုနှစ် ဟဂ်ျ ဘုရားဖူး ရာသီတွင် အီဘိုလာ ကင်းစင်ရေး ဆောင်ရွက်မှုများကို ဆော်ဒီစတင်

သြဂုတ် ၁၁၊ ၂၀၁၄
M-Media

– အီဘိုလာကင်းစင်သည့် ဟဂ်ျဘုရားဖူး ရာသီ ဖြစ်ရေးအတွက် ဆောင်ရွက်မှုများကို ဆော်ဒီတွင် လုပ်ဆောင်နေပြီး ကမ္ဘာ့တစ်ဝှမ်းမှ လာရောက်နေကြသည် ဟဂ်ျဘုရားဖူး ခရီးသွားများကို စတင်စစ်ဆေးနေပြီဖြစ်သည်။

“အနောက်နဲ့ အလယ်အာဖရိက နိုင်ငံတွေနဲ့ အခြားသော နိုင်ငံတွေက လာရောက်ကြတဲ့ ဘုရားဖူး ခရီးသွားတွေကို ကျွန်တော်တို့ စမ်းသပ်စစ်ဆေးမှုတွေ လုပ်နေပါတယ်။ ဘာ့ကြောင့်လည်းဆိုတော့ ရောဂါဖြစ်ပွားနေတဲ့ ဒေသတွေကနေ လေယာဉ် ပြောင်းစီးတာတွေ ရှိတာကြောင့် ဗိုင်းရပ်စ်ကို သယ်ဆောင်လာနိုင် ဖွယ်ရှိလို့ပါ” ဟု ဂျစ်ဒါ ကျန်းမာရေးဌာန အထွေထွေဒါရိုက်တာ ဆာမိ ဘာဒါဝုဒ်က ပြောကြားခဲ့သည်။

အီဘိုဘာဗိုင်းရပ်စ်ပိုး ဆိုးရွားစွာ ပြန့်နှံ့နေသည့် လိုက်ဘေးရီးယား၊ ဂီနီနှင့် ဆီရာ လီယိုနီ နိုင်ငံတို့အတွက် ဟဂ်ျဘုရာဖူးဗီဇာ ထုတ်ပေးခြင်းကို ဆော်ဒီအစိုးရက မကြာသေးမီကပင် တားမြစ်ပိတ်ပင်ခဲ့သည်။

ဘုရားဖူးလာရောက်ကြသူများတွင် အီဘိုလာဗိုင်းရပ်စ်ပိုး ကူးစက်ခံနေရသည့် လက္ခဏာများတွေ့ရပါက စစ်ဆေးကုသမှုများ ဆောင်ရွက်နိုင်ရန်အတွက်လည်း အထူး ကြပ်မတ်ကုသရေး စင်တာများကိုလည်း ဆော်ဒီအစိုးရက ပြုလုပ်ထားသည်။

အနောက်အာဖရိကနိုင်ငံများတွင် အဆိုပါ ဗိုင်းရပ်စ်ပိုးကြောင့် လူပေါင်း ၉၀၀ ကျော် သေဆုံခဲ့ပြီး WHO ကမူ နိုင်ငံတကာ ကျန်းမာရေးဆိုင်ရာ အရေးပေါ်အခြေအနေ ဖြစ်သည်ဟု ပြောကြားခဲ့သည်။

နောက်ဆုံးကူးစက်ခံရသည့် နိုင်ငံမှာ နိုက်ဂျီးရီးယားနိုင်ငံဖြစ်ပြီး သမ္မတ ဂွဒ်လက် ဂျိုနသန်က နိုင်ငံအား အရေးပေါ် အခြေအနေကြေညာခဲ့သည်။

အီဗိုလာဗိုင်းရပ်စ်ပိုး ကူးစက်ခံရသူ၏ ကနဦး လက္ခဏာများမှာ အဖျားတက်ခြင်း၊ ၀မ်းလျှောခြင်း၊ ခန္ဓာကိုယ် ကိုက်ခဲ့ခြင်း စသည်တို့ဖြစ်ပြီး နောက်ပိုင်းတွင် ခန္ဓာကိုယ် အတွင်းအပြင် သွေးယိုခြင်းထို့အထိ ဖြစ်ပွားနိုင်ကာ အသက်ဆုံးရှုံးနိုင်သည်။