ခွဲတမ်းဟဂ်ျ (၂၈၀) လျောက်ထားသူများ သြဂုတ်လ ၂၃ ရက်နေ့တွင် မဲနှိုက်ရွေးချယ်မည်

သြဂုတ် ၁၇ ၊ ၂၀၁၄
M-Media
.သီဟ

အစိုရမဲဟာဂျီလို့ သူသိများတဲ့ ခွဲတမ်းဟဂ်ျ (၂၈၀)ဦးအတွက် လျှောက်လွှာတင်ထားသူများကို သြဂုတ်လ ၂၃ ရက်နေ့မှာ အများရှေ့မှောက်မှာ မဲဖောက်ကြေညာသွားမယ်လို့ အစ္စလာမ်ဘာသာရေးအဖွဲ့ကြီးမှ ဦးဆောင်ဖွဲ့စည်းထားတဲ့ ဟဂ်ျစေလွှတ်ရေး ကြီးကြပ်မှုကော်မတီက ယနေ့ နေ့စွဲနဲ့ ထုတ်ပြန်ကြေညာလိုက်ပါတယ်။

ရွေးချယ်ခံရသူတွေဟာ သြဂုတ်လ ၂၃ ရက်နေ့မှ ၂၇ ရက်နေ့အတွင်း ကုန်ကျစရိတ် ၂၂ သိန်း ၅ သောင်းကို သတ်မှတ်ထားတဲ့ ဘဏ်အကောင့်အတွင်းသို့ ငွေပေးသွင်းရမှာဖြစ်ပြီး သတ်မှတ်ရက်အတွင်း ငွေပေးမသွင်းခဲ့ရင် အရန်ရွေးထားသူများကို အစားထိုးရွေးချယ်သွားမယ်လို့ ကြေညာချက်မှာ ဖော်ပြထားပါတယ်။

ခွဲတမ်းဟဂ်ျဖြင့် သွားရောက်ခွင့်ရရှိရင် ကုန်ကျငွေ ၂၂ သိန်း ၅ သောင်းကျသင့်မှာ ဖြစ်ပြီး လွန်ခဲ့တဲ့ ၂ နှစ် ထက် ၁၀ သိန်း နီးပါး ဈေးလျော့ကျသွားတာဖြစ်ပါတယ်။

ခွဲတမ်းဖြင့် မဟုတ်ဘဲ ပြင်ပမှာ ကုမ္ပဏီများဖြင့် ဟဂ်ျ သွားရောက်ခွင့်ရှိသည့် လူအရေအတွက်မှာ ၃၃၀၀ ခန့် ဖြစ်ကြောင်း ခန့်မှန်းကုန်ကျတွေ သိန်း ၅၀ မှ ၆၀ အကြား ပေါက်ဈေး ရှိကြောင်းသိရှိရပါတယ်။

ခွဲတမ်းဟဂ်ျ ကို ယခင်က သာသနာရေးဝန်ကြီးဌာနမှာ တိုက်ရိုက်ကိုင်တွယ်ခဲ့ပြီး ယခုနှစ်မှာ အစ္စလာမ် ဘာသာရေး အဖွဲ့ကြီးကို လုပ်ပိုင်ခွင့် လွှဲအပ်ခဲ့ပဲဖြစ်ပါတယ်။

အစ္စလာမ်ဘာသာဝင်တွေမှာ မဖြစ်မနေ လိုက်နာကျင့်သုံးရတဲ့ မဏ္ဍိုင်ကြီး (၅) ရပ်အနက် “ဟဂ်ျ” လို့ခေါ်တဲ့ ဆော်ဒီအာရေဗျနိုင်ငံ မက္ကာရွှေမြို့တော်သို့ သွားရောက်ပြီး သာသနာ့ကျင့်စဉ် ကိစ္စရပ်များကို ပြုမူ ဆောင်ရွက်ခြင်းဟာ တစ်ခုအပါအ၀င် ဖြစ် ပါတယ်။ ငွေကြေးတတ် စွမ်းနိုင်သူတို့အဖို့ မဖြစ်မနေ လုပ်ရမဲ့ တာဝန်တစ်ရပ်သာ ဖြစ်ပါတယ်။