ပြည်သူ့ကျန်းမာရေး ဖောင်ဒေးရှင်း မှ ရန်ကုန် ဆင်ခြေဖုံးများတွင် ကျန်းမာရေး စောင့်ရှောက်မှုများပိုလုပ်မည်

သြဂုတ် ၂၁၊ ၂၀၁၄
M-Media
လမင်း

ရန်ကုန်။ ။ ရန်ကုန်မြို့ ဆင်ခြေဖုံးဒေသရှိ ပြည်သူလူထုများ၏ ကျန်းမာရေးစောင့်ရှောက်မှုများကို အရပ်ဖက် လူမှု အဖွဲ့အစည်းများ ပူးပေါင်းကာ ယခင်ကထက် ပိုမို လုပ်ဆောင်သွားမည် ပြည်သူ့ကျန်းမာရေး ဖောင်ဒေးရှင်း မှ ဒေါက်တာကျော်ကျော် ဆေးရုံအုပ်ကြီး(ငြိမ်း) ကပြောဆိုခဲ့သည်။

“မြို့ပြကလူတွေနဲ့ ဆင်ခြေဖုံးကလူတွေက နေထိုင်တာစရိုက်ချင်းက လုံးဝမတူဘူး။ ဆင်ခြေဖုံးက လူအများစုဟာ စီးပွားရေး ပြသာနာတွေကြောင့် ကျန်းမာရေး ပြသာနာတွေပါ ဖြစ်နေကြပါတယ်။ အဲ့ဒီပြသာနာတွေရဲ့ အဖြေကို ဒီကနေ့ ကျွန်တော်တို့သက်ဆိုင်ရာ ပုဂ္ဂိုလ်တွေကနေ အဖြေရှာကြမှာဖြစ်ပါတယ်” ဟု၎င်းက ဆက်လက်ပြောဆိုခဲ့သည်။

ရန်ကုန်မြို့တော် ဆင်ခြေဖုံးဒေသရှိပြည်သူလူထုများ၏ ကျန်မာရေး စောင့်ရှောက်မှုအတွက် ပြည်သူ့ကျန်းမာရေး ဖောင်ဒေးရှင်းမှ ဦးစီးပြီး ကျန်းမာရေး ၀န်ကြီးဌာန၊ ရန်ကုန်မြို့တော် စည်ပင်သာယာရေး ကော်မတီ၊ မြို့နယ် စည်ပင်သာယာရေး ကော်မတီနှင့် မြို့နယ်ဖွံ့ဖြိုးရေး အထောက်အကူပြုအဖွဲ့များ၊ ဆင်ခြေဖုံး ရပ်ကွက်များမှ ကျန်းမာရေး ၀န်ထမ်းများ နှင့် သက်ဆိုင်ရာဌာနမှ တာဝန်ရှိပုဂ္ဂိုလ်များ စုစည်းပြီး ရန်ကုန်မြို့ Park Royal Hotel တွင်အလုပ်ရုံ ဆွေးနွေးပွဲတစ်ရပ်ကို ကျင်းပပြုလုပ်ခဲ့ကြသည်။

ရန်ကုန်မြို့တွင် ဆင်ခြေဖုံး ရပ်ကွက်တွင် နေထိုင်သောလူဦးရေမှာ လူဦးရေ၏ ၇၀ ရာခိုင်နှုန်းနီးပါးရှိနေသောကြောင့် ကျန်းမာရေးဆိုင်ရာ စောင့်ရှောက်မှုများကို ပိုမိုပြုလုပ်ရမည်ဖြစ်ကြောင်းကို ကျန်းမာရေး ၀န်ထမ်းတစ်ဦးက သုံးသပ်ပြောကြားခဲ့သည်။

ပြည်သူ့ကျန်းမာရေးဖောင်ဒေးရှင်းသည် ပြည်တွင်း၊ ပြည်ပ အကူအညီများကိုရယူ၍ ကျေးလက်နှင့်မြို့ပြ ဆင်ခြေဖုံးဒေသများ၌ ပြည်သူများအတွက် ပြည်သူ့ကျန်းမာရေးဖွံ့ဖြိုးမှု လုပ်ငန်းများကို ဆောင်ရွက်ပေးမည့် လွတ်လပ်သော အစိုးရမဟုတ်သော လူမှုအထောက်အကူပြုလုပ်ငန်းများကို ဦးတည်ဆောင်ရွက်ရေးနှင့် အဖွဲ့အစည်းများအတွင်း ကြားခံပေါင်းကူးဆောင်ရွက်သည့် အဖွဲ့အစည်းတစ်ရပ်ဖြစ်ကြောင်းသိရသည်။