မာလာဝီ လူ့အဖွဲ့အစည်း တိုးတက်အောင် ကူညီပေးခဲ့သည့် မွတ်စလင်များကို ဂုဏ်ထူးဆောင်ဆု ချီးမြှင့်မည်

သြဂုတ် ၂၁ ၊ ၂၀၁၄
M-Media

မာလာဝီမှ အမျိုးသမီးများ သက်ငယ် အိမ်ထောင်ကျမှု ကျဆင်းရေး ဟောပြောပွဲတခု

– မာလာဝီနိုင်ငံအတွင်း သာသနာ၏ သွန်သင် ဆုံးမမှုများ ပြန့်ပွားလာရန်နှင့် လူမှုစီးပွား တိုးတက်မှုများ အတွက် ကူညီဆောင်ရွက်ပေး ခဲ့သည့် မွတ်စလင် လူပုဂ္ဂိုလ်များနှင့် အသင်းအဖွဲ့များအား မာလာဝီ မွတ်စလင်ဝဘ်ဆိုက်(Malawi Muslim Official Website)မှ ဆုတံဆိပ်များ ချီးမြှင့်မည်ဟု သိရသည်။

“အစ္စလာမ်သာသနာနဲ့ နိုင်ငံအတွင်းအမှာရှိတဲ့ လူမှုစီးပွား ဖွံဖြိုးတိုးတက်မှုအတွက် မွတ်စလင်တစ်ဦး တစ်ယောက်ချင်းစီနဲ့ မွတ်စလင် အဖွဲ့အစည်းတွေရဲ့ အမျိုးမျိုးသော စွန့်လွှတ်စတေးမှုတွေ၊ ကူညီမှုတွေကို အသိအမှတ်ပြုဖို့ အတွက် ဒီလှုပ်ရှားမှုကို စတင်ခဲ့တာပါ” ဟု အဆိုပါ ၀ဘ်ဆိုက်ကို တည်ထောင်သူ မာရှယ်လ် ဒိုင်တန်က ပြောကြားခဲ့သည်။

ထိုကဲ့သို့ ချီးမြှင့်ခြင်းမှာ မာလာဝီမွတ်စလင်လူ့အဖွဲ့အစည်းအတွင်း ပထမဆုံးလည်းဖြစ်သည်။ ဒိုင်တန်ကမူ မာလာဝီနိုင်ငံ အတွင်း လူမှုစီးပွား ဖွံ့ဖြိုးတိုးတက်မှု အတွက် ကူညီမှုမှတစ်ဆင့် အစ္စလာမ်သာသနာ၏ အလှတရားကို မာလာဝီနိုင်ငံနှင့် ကမ္ဘာကြီးက သိရှိ လက်ခံလာစေရန် ရည်ရွယ်ခြင်းဖြစ်သည်ဟု ၎င်းက ထပ်လောင်းပြောကြားခဲ့သည်။

“နိုင်ငံတကာ မီဒီယာတွေက အစ္စလာမ်သာသနာကို မကောင်းတဲ့ ပုံစံတွေနဲ့ပဲ ဖော်ပြနေပါတယ်။ ကျွန်တော်တို့ဟာ အကြမ်းဖက်သမားတွေအဖြစ်၊ မကောင်းတဲ့ အရာအားလုံးနဲ့ ပတ်သက် ဆက်နွယ်နေသူတွေအဖြစ် ဖော်ပြခံနေရပါတယ်။ ဒါကြောင့်မို့လို့ မွတ်စလင်၊ အစ္စလာမ်တို့နဲ့ ပတ်သက်ပြီး လူတွေကျေးဇူး တင်သင့်တဲ့ ကောင်းကွက်တွေ ရှိတယ်ဆိုတာကို ကျွန်တော်တို့က ကမ္ဘာကြီးကို ပြချင်ပါတယ်”

အာဖရိကန် တောင်ပိုင်း နိုင်ငံတစ်ခုဖြစ်သည့် မာလာဝီနိုင်ငံသို့ အစ္စလာမ်သာသနာမှာ ၁၈၈၀ ခုနှစ်များက ရောက်ရှိခဲ့ခြင်းဖြစ်ပြီး၊ ယခုလက်ရှိတွင် နိုင်ငံလူဦးရေ၏ ၁၂ ရာခိုင်နှုန်းမှာ အစ္စလာမ်သာသနာကို သက်ဝင်ယုံကြည် ကြသူများဖြစ်သည်။

မာလာဝီတွင် မွတ်စလင်တို့မှာ ကြွယ်ဝသည့် သမိုင်းရှိပြီး လူ့အဖွဲ့စည်အတွင်း၌လည်းထဲထဲဝင်ဝင် ပါဝင်ဆောင်ရွက်ခဲ့ကာ လူ့အဖွဲ့အစည်း တိုးတက်ရန်အတွက် ကူညီမှုများရှိခဲ့သော်လည်း ထိုကူညီမှုများမှာ ပျောက်ပျက် သွားခဲ့သည်ဟု ဒိုင်တန်ကဆိုသည်။

“မာလာဝီမှာ မွတ်စလင်တွေမပါဘဲနဲ့ တိုးတက်ဖွံ့ဖြိုးခဲ့တဲ့ နယ်ပယ်ကဏ္ဍတွေကို ဆွဲထုတ်ပြဖို့ ခက်ပါတယ်။ လွတ်လပ်ရေးမရခင်နဲ့ လွတ်လပ်ရေးရပြီး နှစ်ပေါင်း ၅၀ အတွင်း နိုင်ငံရဲ့ ဖွံ့ဖြိုးတိုးတက်မှုတွေမှာ ကျွန်တော်တို့ဟာ တစ်စိတ်တစ်ပိုင်း ပါဝင်ခဲ့ကြပါတယ်။ အစ္စလာမ် သာသနာနဲ့ နိုင်ငံအတွက် မွတ်စလင်တစ်ဦးတစ်ယောက်ချင်းနဲ့ အဖွဲ့အစည်းအလိုက် ဆောင်ရွက်ခဲ့ကြတဲ့ စွန့်လွှတ်စတေးမှုတွေကို ကျွန်တော်တို့ အဆင့်သတ်မှတ်ချင်ပါတယ်။ သူတို့ရဲ့ စွန့်လွှတ်စတေးမှုဟာ အချီးအနှီး မဖြစ်စေရပါဘူး”

မွတ်စလင်တို့၏ ဆောင်ရွက်မှုများအတွက် အသိအမှတ်ပြုမည့် အဆိုပါဆုတံဆိပ် ချီးမြှင့်အရေး အစီအစဉ်ကို နိုင်ငံတ၀ှမ်း မွတ်စလင်ပညာရှင်များကလည်း ကြိုဆိုခဲ့ကြသည်။