“ချစ်ခြင်းမေတ္တာ အကြောင်း” ခေါင်းစဉ်ဖြင့် ဘာသာကြီး ၄ ခုမှ ခေါင်းဆောင်များ ဆွေးနွေးဟောပြော

သြဂုတ် ၂၃၊ ၂၀၁၄
M-Media
လမင်း

ရန်ကုန်။ ။ ဘာသာကြီး ၄ ခုမှခေါင်းဆောင်များမှ ချစ်ခြင်းမေတ္တာအကြောင်း ဆွေးနွေးပွဲ တစ်ရပ်ကို ယနေ့သြဂုတ်လ ၂၃ ရက်နေ့ ရန်ကုန်မြို့ ဆော်လမွန် တာဝါတွင် ဆွေးနွေးဟောပြောခဲ့ကြသည်။

မန္တလေးမြို့ ရန်ကင်းတောင်မှ ဘဒ္ဒန္တဇောတိက (ဓမ္မာစရိယ) ဆရာတော်မှ မည်သည့်ပြသာနာများကိုကြုံစေကာမှု ထိုသူတွင် အကောင်းမြင် ၀ါဒရှိလာပါက ဒေါသစိတ်များ ချုပ်ငြိမ်း သွားမည်ဖြစ်ပြီး မေတ္တာ တရားများရှိလာမည်ဖြစ်ကြောင်း ၊ မိမိစိတ်ကို စွမ်းအားပေးနိုင် ရန်လည်း မေတ္တာ တရားသာ လိုအပ်ကြောင်း ဆရာတော်မှ ပုထုစဉ်လူသားမှန်သမျှ မေတ္တာ တရားကို လက်ကိုင်ထားရန်လိုအပ်ကြောင်းကို ဟောကြားခဲ့သည်။

အစ္စလာမ်ဘာသာဝင်တွင်လည်း ဘုရားသခင်၏အချက်အချာကျသော မှတ်ယူချက်များထဲမှ တစ်ခုမှာ ချစ်ခြင်းမေတ္တာဖြစ်ပါသည်။ ကုရ်အာန် ကျမ်းတော်မြတ်၏ ဖော်ပြချက်ပါ ချစ်ခင်ကြင်နာခြင်းများနှင့် ပြည့်ဝသော သူဟု ဘာသာပြန်ဆိုထားချက် အကြောင်းအား အစ္စလာမ် ဘာသာရေး ခေါင်းဆောင် တစ်ဦးဖြစ်သူ မုဖ်သီ ဒေါက်တာမြင့်သိန်းက ရှင်းလင်းပြောကြားခဲ့သည်။

“ကျွန်တော်တို့ဘာသာတရားက ညွန်ပြထားတာက ရန်သူကိုပင် မေတ္တာ တရားထားရမယ်လို့ ဆိုပါတယ်။ မိမိကိုယ်တိုင်က မည်သည်တစ်ဦး တစ်ယောက်ကိုမှ ကျူးကျော် ပိုင်ခွင့် မရှိစေရပါဘူးလို့လည်း ဆိုထားပါတယ်” ဟု ဆက်လက်ရှင်းလင်းပြောကြားခဲ့သည်။

အချစ်သည် ကမ္ဘာဦးအစကပင် စတင်ဖြစ်ပေါ်ခဲ့ပြီး အချစ်ကြောင့် ကမ္ဘာကြီးတွင် ကမ္ဘာသူ၊ ကမ္ဘာသား သားသမီးရတနာများစွာ မွေးဖွားခဲ့ကြပြီး သမိုင်းတွင်ကမ္ဘာကြီးအတွက် ငြိမ်းချမ်းရေးကို ထူးကဲပြောင်မြောက်စွာ စွမ်းဆောင်သူများရှိသကဲ့သို့ ကမ္ဘာကြီးနှင့်ငြိ်မ်းချမ်းရေးကို ဆိုးဝါးစေသောဘက်သို့ ပို့ဆောင်ခဲ့သူများလည်းရှိခဲ့ကြောင်း ဟိန္ဒူဘာသာရေး ခေါင်းဆောင်တစ်ဦးဖြစ်သူ ဦးဆန်းမင်းနိုင်က ရှင်းလင်းပြောဆိုခဲ့သည်။

“ကျွန်တော်တို့ရဲ့ယေရူခရစ်တော်ဟာ မေတ္တာတရားကိုပဲ အခြေခံပြီး ငြိမ်းချမ်းရေး တရားကိုပဲ ဟောပြောခဲ့တယ်။ “God is Love” ဘုရားသခင်ဟာ ချစ်ခြင်းမေတ္တာဖြစ်တော် မူတယ်လို့ ပြောခဲ့ပါတယ်။ လူအချင်းချင်း အပြစ်ကို အပြစ်လို့ မမြင်မိအောင် မေတ္တာတရားထားနိုင်ရင် အကောင်းဆုံးဖြစ်မှာပါ” ဟု ခရစ်ယာန်ဘာသာရေး ခေါင်းဆောင် ဒေါက်တာစောလှိုင်ဘွား မှ မေတ္တာတရားနဲ့ပတ်သက်ပြီး ဆွေးနွေးတင်ပြခဲ့သည်။

ဘာသာကြီး လေးခုာမှ ခေါင်းဆောင်များနှင့် တက်ရောက်လာသော ပရိတ်သတ်များမှ မေတ္တာတရား အကြောင်းများနှင့် ချစ်ခြင်းမေတ္တာများ၏ သက်ရောက်မှု အကြောင်းတရားများကို အပြန်အလှန်ဆွေးနွေး ခဲ့ကြသည်။