လီဗာပူးလ်၊ ဗီလာတို့ အနိုင်ရခဲ့ပြီး အာဆင်နယ် သရေကျခဲ့တဲ့ ပရီးမီးယားလိဂ် ပွဲစဉ် ၃ စူပါ ဆန်းဒေး ပွဲများ

စက်တင်ဘာ ၁ ၊ ၂၀၁၄
M-Media

– ပရီးမီးယားလိဂ် ပွဲစဉ် ၃ ရဲ့ လက်ကျန် ၃ ပွဲကို မနေ့ညက ကစားခဲ့ပြီး လီဗာပူးလ်၊ အက်စတွန်ဗီလာတို့အနိုင်ရခဲ့ကာ အာဆင်နယ်ကတော့ သရေကျခဲ့ပါတယ်။

ပြီးခဲ့တဲ့အပတ်က မန်စီးတီးကို ရှုံးနိမ့်ခဲ့တဲ့ လီဗာပူးလ်တို့ ဒီတစ်ပတ်မှာတော့ စပါးအသင်းကို ၃ ဂိုးပြတ်နဲ့ အနိုင်ယူခဲ့ပါတယ်။ အေစီမီလန်က ခေါ်ထားတဲ့ ဘာလော့တယ်လီ ပွဲထွက်ခဲ့ပြီး ဂိုးသွင်းယူနိုင်ခြင်း မရှိခဲ့ပေမယ့် အသင်းအတွက် အကောင်းဆုံး ပံ့ပိုးပေးနိုင်ခဲ့ပါတယ်။

အိမ်ရှင်စပါးတို့ ပထမပိုင်းမှာ လီဗာပူလ်းကို ယှဉ်ကစားနိုင်ပေမယ့် မိနစ် ၆၀ ကျော်လာတဲ့အခါမှာတော့ လီဗာပူးလ်ကသာ ပွဲကို စိုးမိုးခဲ့ပါတယ်။ လီဗာပူးလ်အတွက် ဂိုးတွေကိုတော့ စတာလင်၊ ဂျရတ်နဲ့ မိုရီနိုတို့က သွင်းယူပေးခဲ့တာပါ။

ပွဲစဉ် ၂ မှာ အဲဗာတန်ကို နောက်ကလိုက်ကစားပြီး သရေကျခဲ့တဲ့ အာဆင်နယ် ဒီတစ်ပတ်မှာလည်း တန်းတက်လက်စတာစီးတီးကို ဦးဆောင်ဂိုး သွင်းနိုင်ခဲ့ပေမယ့် သရေသာ ရခဲ့ပါတယ်။ ဘောလုံးပိုင်ဆိုင်မှုမှာတော့ အာဆင်နယ်တို့ အပြတ်အသတ် အသာရခဲ့တာဖြစ်ပေမယ့် ဂိုးသွင်းခွင့်ကိုတော့ မဖန်တီးနိုင်ခဲ့ပါဘူး။

အာဆင်နယ်အတွက် ဂိုးကိုတော့ မိနစ် ၂၀ မှာ ဆန်းချက်က သွင်းယူပေးခဲ့တာဖြစ်ပြီး လက်စတာအတွက် ၂၂ မိနစ်မှာ လီယိုနာဒို အူလိုအာက သွင်းယူပေးခဲ့တာပါ။ ဒီဂိုးဟာ သူ့ရဲ့ ပရီးမီးယားလိဂ် ဒုတိယမြောက်ဂိုးလည်း ဖြစ်ပါတယ်။ ပွဲအပြီးမှတော့ ဂိုးသွင်းခွင့်တွေ မဖန်တီးနိုင်ခဲ့တဲ့ တိုက်စစ်ကို အာဆင်ဝင်းဂါးက ဝေဖန်ပြောဆိုသွားခဲ့ပါတယ်။

အက်စတွန်ဗီလာနဲ့ ဟားလ်စီးတီးတို့ရဲ့ပွဲမှာတော့ အက်စတွန်ဗီလာက ပထမပိုင်းသွင်းဂိုးတွေနဲ့ ဟားလ်စီးတီးကို အနိုင်ရခဲ့ပါတယ်။

ပရီးမီးယားလိဂ် ပွဲစဉ် ၃ ရဲ့ ရလဒ်များကတော့ အောက်ပါအတိုင်းဖြစ်ပါတယ်။

အက်စတွန်ဗီလာ ၂-၁ ဟားလ်စီးတီး
စပါး ၀-၃ လီဗာပူးလ်
လက်စတာ ၁-၁ အာဆင်နယ်
ဘန်လေ ၀-၀ မန်ယူ
မန်စီးတီး ၀-၁ စတုတ်
နယူးကာဆယ် ၃-၃ ခရစ္စတယ်ပဲလေ့စ်
ကျူပီအာရ် ၁-၀ ဆန်းဒါးလန်း
ဆွမ်ဆီး ၃-၀ ၀က်စ်ဘရွန်း
ဝက်စ်ဟမ်း ၁-၃ ဆောက်သက်တမ်
အဲဗာတန် ၃-၆ ချယ်ဆီး