ဓာတ်ခွဲစစ်ဆေးမှုအရ ကူးစက်မြန် အီဘိုလာ သံသယရှိသူများ ရောဂါပိုး လုံးဝ မရှိကြောင်း သိရှိရ

စက်တင်ဘာ ၂ ၊ ၂၀၁၄
M-Media

ကူးစက်မြန် အီဘိုလာရောဂါ စောင့်ကြပ်ကြည့်ရှုရေး လုပ်ငန်းဆောင်ရွက်မှု အရ ဝေဘာဂီအထူးကု ဆေးရုံကြီးတွင် ဆေးကုသမှု ခံယူလျက်ရှိသော လူနာနှင့် ၎င်းနှင့် အနီးကပ်ထိတွေ့သူ (၄)ဦးတို့၏ ကျန်းမာရေး အခြေအနေမှာ လုံးဝကောင်းမွန်လျက် ရှိကြောင်း သိရှိရပါသည်။

၎င်းတို့ (၅)ဦး၏ ဓာတ်ခွဲနမူနာကို ကူးစက်မြန် အီဘိုလာရောဂါ ဟုတ်-မဟုတ် အတည်ပြုနိုင်ရန် (၂၉-၈-၂၀၁၄) ရက်နေ့တွင် ဂျာမနီနိုင်ငံ၊ ဟန်းဘတ်မြို့ရှိ ဗိုင်းရပ်စ်ဗေဒ ဓာတ်ခွဲခန်းသို့ ပေးပို့စစ်ဆေးခဲ့ရာ (၅)ဦးစလုံး၏ ဓာတ်ခွဲနမူနာတွင် ကူးစက်မြန်အီဘိုလာ ရောဂါပိုး လုံးဝမရှိကြောင်း ကျန်းမာရေး ဝန်ကြီးဌာနမှ သတင်းရရှိသည်။

ဩဂုတ် (၁၉) ရက်နေ့ ညပိုင်းက အီဘိုလာ ပြန့်ပွားနေသည့် အာဖရိက အနောက်နိုင်ငံ တခုတွင် အလုပ်လုပ်ကိုင်ပြီး ပြန်လာသည့် မြန်မာနိုင်ငံသား တစ်ဦး၌ အဖျားရောဂါတွေ့ရှိပြီးနောက် ရန်ကုန်အပြည်ပြည်ဆိုင်ရာ လေဆိပ်ကျန်းမာရေးအဖွဲ့က သံသယ လူနာအဖြစ် သတ်မှတ်၍ ဝေဘာဂီ အထူးကု ဆေးရုံသို့ လွှဲပြောင်းပြီး လိုအပ်သော ဓာတ်ခွဲစမ်းသပ် စစ်ဆေးမှုများပြုလုပ် ခဲ့ခြင်းဖြစ်သည်။

ကိုးကား- MOI