ဝဲလ်ဘတ် ဂိုးစသွင်းပြီး အာဆင်နယ်နိုင်၊ လီဗာပူးလ်တို့ တတိယမြောက် ရှုံးပွဲတွေ့

စက်တင်ဘာ ၂၁ ၊ ၂၀၁၄
M-Media

ဝဲလ်ဘတ် ဂိုးစသွင်းပြီး အာဆင်နယ်နိုင်၊ လီဗာပူးလ်တို့ တတိယမြောက် ရှုံးပွဲတွေ့ခဲ့ရတဲ့ ပရီးမီးယားလိဂ် ပွဲစဉ် ၅ စနေနေ့ည ပွဲစဉ်များ

– ပရီးမီးယားလိဂ် ပွဲစဉ် ၅ ရဲ့ ၆ ပွဲကို မနေ့က ကစားခဲ့ပြီး အာဆင်နယ်တို့ ၄ မိနစ်အတွင်းရတဲ့ ၃ ဂိုးနဲ့ အနိုင်ရခဲ့ပါတယ်။ ပွဲစဉ် ၃ အထိ ရာနှုန်းပြည့်အနိုင်ရခဲ့တဲ့ ဆွမ်းဆီးတို့ မနေ့ကပွဲမှာလည်း ရှုံးနိမ့်ခဲ့ပြီး၊ လီဗာပူးကလည်း ၀က်စ်ဟမ်းကို အရေးနိမ့်ခဲ့ပါတယ်။

ချန်ပီယံလိဂ်မှာ ဂိုးပြတ်ခြေပြတ်နဲ့ ရှုံးခဲ့ရတဲ့ ၀င်းဂါးရဲ့ အာဆင်နယ်ကတော့ မနေ့က ကစားခဲ့တဲ့ပွဲမှာ အက်စတွန်ဗီလာကို အနိုင်ရခဲ့ပြီး ချန်ပီယံလိဂ်အရှုံးအတွက် သိက္ခာပြန်ဆယ်နိုင်ခဲ့ပါတယ်။ ဘောလုံးပိုင်ဆိုင်မှုအသာနဲ့ ကစားနိုင်ခဲ့တဲ့ အာဆင်နယ်တို့ ပွဲကစားချိန် နာရီဝက်ကျော်တဲ့အထိ ဂိုးမသွင်းနိုင်ခဲ့ပေမယ့် ၃၂၊ ၃၄၊ ၃၆ မိနစ်တွေမှာ အနိုင်ဂိုး ၃ ဂိုး စလုံးရခဲ့ပါတယ်။ ပထမဂိုးကို ခြေစွမ်းကျနေလို့ ဝေဖန်ခံနေရတဲ့ ကွင်းလယ်လူ အိုဇေးလ်က ၀ဲလ်ဘတ်ရဲ့ ဖန်တီးမှုကတစ်ဆင့် တည်တည်ငြိမ်ငြိမ်နဲ့ သွင်းယူပေးခဲ့တာဖြစ်ပြီး၊ ဒုတိယဂိုးကိုတော့ ၀ဲလ်ဘတ်ကိုယ်တိုင် သွင်းယူပေးခဲ့တာပါ။ တတိယဂိုးကတော့ ဗီလာနောက်ခံလူ စစ်ဆိုခိုရဲ့ ကိုယ့်ဂိုးကိုယ်သွင်းမှုကြောင့် ရခဲ့တာဖြစ်ပါတယ်။ ပွဲအပြီးမှာတော့ ၀င်းဂါးက အသင်းရဲ့လုပ်အားနဲ့ စုစည်းမှုကို ကျေနပ်ကြောင်း ပြောကြားခဲ့ပါတယ်။

အပြောင်းအလဲတွေနဲ့ ခြေမငြိမ်သေးတဲ့ လီဗာပူးလ်ကလည်း အဝေးကွင်းမှာ ၀က်စ်ဟမ်းကို ရှုံးနိမ့်ခဲ့ပါတယ်။ ပွဲအစ ၇ မိနစ်အတွင်း ၂ ဂိုးပေးလိုက်ရတာက လီဗာပူးတို့အတွက် ထိုးနှက်မှုတစ်ခုဖြစ်ခဲ့ပြီး ၂၆ မိနစ်မှာ စတာလင်က ချေပဂိုး ၁ ဂိုး ပြန်သွင်းနိုင်ခဲ့ပေမယ့် ပွဲပြီးကာနီမှာ နောက်ထပ်တစ်ဂိုး ပေးလိုက်ရတာကြောင့် ၃ ဂိုး ၁ ဂိုးနဲ့ ပွဲသိမ်းခဲ့ပါတယ်။ ပြီးခဲ့တဲ့နှစ်က ခြေစွမ်းပြကာ ချန်ပီယံဆုကိုပါ ခြိမ်းခြောက်နိုင်ခဲ့တဲ့ လီဗာပူးလ် ယခုနှစ် ပရီးမီးယားလိဂ် ၅ ပွဲပြီးချိန်မှာ ၃ ပွဲအထိ ရှုံးနိမ့်ထားပါတယ်။

ပြီးခဲ့တဲ့တစ်ပါတ်က ချယ်ဆီးကိုရှုံးခဲ့တဲ့ ဆွမ်ဆီးတို့ မနေ့ကပွဲမှာလည်း ဆောက်သက်တမ်ကို နောက်ကျဂိုး တစ်ဂိုးတည်းနဲ့ အရှုံးပေးခဲ့ရပါတယ်။ ပွဲစဉ် ၃ အထိ ရာနှုန်းပြည့်အနိုင်ရခဲ့တဲ့ ဆွမ်ဆီးတို့ ပွဲအစပိုင်းကတည်းက ဆောက်သက်တမ်ကို ဖိကစားနိုင်ပေမယ့် ၃၈ မိနစ်မှာ ဘိုနီအထုတ်ခံလိုက်ရတာက ပွဲကို အလှည့်အပြောင်းဖြစ်စေခဲ့ပါတယ်။ ဆောက်သက်တမ်အတွက် အဖိုတန်အနိုင်ဂိုးကိုတော့ လူစားဝင်ကကစားသမား ဗစ်တာ ၀မ်ယာမာက မိနစ် ၈၀ မှာ သွင်းယူပေးခဲ့တာပါ။

ပရီးမီးယားလိဂ် ပွဲစဉ် ၅ ရဲ့ စနေနေ့ အနိုင်အရှုံးရလဒ်များကတော့ အောက်ပါအတိုင်းဖြစ်ပါတယ်။

ကျူပီအာရ် ၂-၂ စတုတ်စီးတီး
အက်စတွန်ဗီလာ ၀-၃ အာဆင်နယ်
ဘန်လေ ၀-၀ ဆန်းဒါးလန်း
နယူးကာဆယ် ၂-၂ ဟားလ်စီးတီး
ဆွမ်ဆီး ၀-၁ ဆောက်သက်တမ်
ဝက်စ်ဟမ်း ၃-၁ လီဗာပူးလ်